Read Timugon Murut AMSAL 15 Bible Online

AMSAL 15 - Timugon Murut bible

AMSAL 15

¹Taam ra molomoi mapalinos ra sangit, kaa' ragu-ragu ra moporos mapasingkual ra sangit.

²Ragu-ragu ru ulun mapintar mambaal ra katutunan mamunduk ra guang, kaa' ragu-ragu ru ulun sasambungon jajajou ayuk.

³Makito ru TUHAN atan kasaukan ru titikop intok; magilong Io ritakau, nambaal kia ra moonsoi kapoam malaat.

⁴Ragu-ragu ra moonsoi mangunsu' ra guang, kaa' ragu-ragu masangit mampalawo ra guang.

⁵Ulun sasambungon mangimpai ra ilaan ru ama', kaa' ulun mapintar mampalio ra sawai.

⁶Kinalangkayaan ru ulun moonsoi mantilayun, kaa' kinalangkayaan ru ulun malaat mapuso bulintok makakapaganan.

⁷Katutunan pinatanou ru ulun mapintar, sala' ka ulun sasambungon.

⁸Iowon ru TUHAN bulintok ulun moonsoi makiasi', kaa' masisang Io ra taak simbalui ondo' pinataak ru ulun malaat.

⁹Masisang TUHAN ra ralan kaayagan ru ulun maanggal-anggal, kaa' tagamin No ulun ondo' gumogot mambaal ra kasagaan Nano.

¹⁰Ulun mambaal ra kalaatan ukuman no maagat; ulun marara' mangapu ra pansawayan matoi.

¹¹Amon ru makapandai TUHAN no ra nansalinut baal intor ra tana' ru ulun minatoi, maaru' mapandayan No niayuk pangkaraan ru ulun.

¹²Ulun ra malilimbau kalo masaga' sawayon; kalo igogondo' io pakibilin intor ra ulun mapintar.

¹³Guang ra maansukan mambaal ra bulos matakau; guang ra mangiluk mapakapalo ra guang.

¹⁴Ulun ra mapintar masaga' migigila', kaa' ulun sasambungon maansayan ra sambung.

¹⁵Kaayagan ru ulun musikin masalok mapagon, kaa' ulun ra makaansuk masalok makaliman ra bayag.

¹⁶Moonsoi poyo musikin am malaa' ra TUHAN, ka langkaya' ondo' magalabo.

¹⁷Moonsoi poyo mangakan ra sansam ondo' sumbayaan ru katagaman, ka mangakan ra kual malanging ondo' sumbayaan ru kasisangan.

¹⁸Ulun mataki' sumangit mapalabui ra pansangaran, kaa' ulun ra mosorot guang maparatong ra pababansayan.

¹⁹Ulun matiar masalok makaliman ra kapaganan, kaa' ulun mabanis guang kalo mokoowot ra kapaganan.

²⁰Anak ra mapintar mapabansuk ra guang ru ama' nano; anak ra sasambungon magasab ra ina' nano.

²¹Ulun sasambungon maansayan ra sambung, kaa' ulun mapintar mambaal ra atan ondo' motopot.

²²Inatangan masauk amon ru sumbayanin ra masuang bilin; inatangan kalo masauk amon ru kalo sumbayanin ra kamaanan ru guang.

²³Ragu-ragu ra pinasalula' nakatuma' ra bulintok no maparatong ra kaansukan.

²⁴Ulun mapintar maya' ra ralan magaloi mongoi ra kaayagan, sala' ka ralan tumuun ra kapatayan.

²⁵Lunsayon ru TUHAN baloi ru ulun malilimbau, kaa' tana' longgom ru sangulun napuor sindungin No.

²⁶Masisang TUHAN no ra pangkaraan ondo' majamol, kaa' iowon Nano ragu-ragu ra moonsoi.

²⁷Ulun maguyum ra mauli' kaa' ralalom ralan kalo matanda', mapakapagon risilo sambaloi. Ulun ra kalo maambi' maawar painawo.

²⁸Ulun moonsoi mangkara' galing ra kalo poyo tumaam. Ulun malaat tumaam ra kalo mangkara' saboi maparatong ra kapaganan.

²⁹Rongogon ru TUHAN pakiasian ru ulun moonsoi, kaa' kalo lioon No ulun malaat.

³⁰Bulos ra maansukan mapabansuk ra guang, am tanou ra moonsoi makaansuk ra guang.

³¹Ulun ondo' mampalio ra pansawayan, makasimpung ra ulun mapintar.

³²Ulun ra marara' migigila', kalo mangurumat ra inan nilono. Ulun mangkirongog ra pansawayan, masauk ra mapintar poyo.

³³Urumat am malaa' ra TUHAN ginio ralan mokoowot ra kapintaran. Urumat siguluin ru ingganaan ru guang.