Read Timugon Murut AMSAL 16 Bible Online

AMSAL 16 - Timugon Murut bible

AMSAL 16

¹Ulun mambaal ra inatangan, kaa' i Aki Kapuuno' mamatas.[14]

²Moonong baalon ru ulun maaru' lair moonsoi ra pangkaraan nano galama', kaa' TUHAN mangaru' ra logo gogot ru guang nano.

³Ngaangai' kandoi muno pataako' noyo ra TUHAN, am inatangan muno pana masugut.

⁴Nansalinut binaal ru TUHAN mokoondo' ra kuayan, am kuayan ru ulun malaat ioginio kaluusan.

⁵Masisang TUHAN ra ulun malilimbau; kalo polosoon No ilo makalabus intor ra ukuman.

⁶Ulun ondo' gumagaya' ri Aki Kapuuno' ampunon No. Ulun ondo' mangurumat am malaa' ra TUHAN makainggalur intor ra kalaatan.

⁷Amon ru mangansuk kau ra guang ru TUHAN, ngaangai' pantula' masauk min ra rangan.[15]

⁸Ralalom kandoi matanda' moonsoi poyo kalo kukula' maalap, ka masuang maalap kaa' kandoi ra kalo matanda'.

⁹Ulun mambaal ra inatangan, kaa' i Aki Kapuuno' mangaru' ra ralan kaayagan ru ulun.

¹⁰Raja' mangapu ra kuasa' intor ri Aki Kapuuno'; am ginio ra pamatasan ru raja' masalok motopot.

¹¹Kasaga' ru TUHAN timbangan am tutuku' ra motopot; pai' pamparuung bulintok mangindapu'.

¹²Raja' inggalarin mopoloso ra kalaatan,[16] sabap ra katimpakan mapaikang ra pamarintaan.

¹³Raja' masaga' mangkirongog ra atan ondo' motopot; raja' maansukan ra ulun mindagu ralalom kabanisan ru guang no.

¹⁴Amon ru raja' sumangit, magu' mokoondo' ulun potoyon; ulun ra mapintar gogoton no mampalinos ra sangit ru raja'.

¹⁵Taak ru raja' koson ayuk ra gaun maparatu' ra rasam bulintok tampio; taak nano manaak ra kaansukan ru bayag.

¹⁶Moonsoi poyo makaalap ra kapintaran am katutunan ka makaalap ra mas am pirok.

¹⁷Ulun moonsoi tumuliar ra ralan kalaatan; ulun magalung ra ralan ru kaayagan nano, mangampin ra inan nano galama'.

¹⁸Lumimbau mangkinibit ra kapusaan am karatuan.

¹⁹Moonsoi poyo minggana' guang am musikin, ka maya' ra ulun malilimbau am mangapu ra tayar kuliamos ondo' ginaau nilo.

²⁰Ulun ondo' mampaguang ra pangilaan ampos nano moonsoi; ulun ondo' mangintopot ra TUHAN makakaansukan.

²¹Ulun mapintar omporon sabap ra kapintaran nano. Gumaai lomoi ru raguon nano, gumaai poyo intopoton ru ulun ragu nano.

²²Kapintaran iono uur ru kaansukan ra bayag ru ulun mataau; ulun sasambungon naimbolo' ru sambung nilo galama'.

²³Ulun mapintar mangkara' galing ra kalo poyo mindagu; ginio ra ragu-ragu nano makasubol ra guang.

²⁴Ragu-ragu ra molomoi koson ra ruu' maningot — matamis am niayuk makaligag ra inan.

²⁵Ralan ondo' kinara' ra moonsoi no pupus nali tumingkuang ra kapatayan.

²⁶Tiakanon magibit ra sasangulun no mangandoi toojo, sabap ra masaga' io mampajala' ra suung nano.

²⁷Ulun malaat masalok gumogot mangimbolo' ra ulun bokon; ragu-ragu nilo malaat koson ra apui monolob.

²⁸Ulun malaat mangalimut; susukon nilo rangan saboi mantataam am mapatuliar ra gino ngai' mangkubayau.

²⁹Ulun malaat mamparuung ra rangan-rangan nano, am magibit risilo ra makalalaa'.

³⁰Ilalai' min ilo ondo' mampajingit am manguliorom ramuyun ra mato; ginilo mangatang ra kalaatan.

³¹Ulun mabanis guang aniin ra umur maawar; uan nano koson ra karaun ondo' pangansukan.

³²Moonsoi poyo oroton guang ka mangunguasa'. Moonsoi poyo matutunan ru ulun mongorot ra guang ka manguasa' ra titikop ru bandar.

³³Ulun magugundi' koson mangulig ra kasagaan ri Aki Kapuuno', kaa' i Aki Kapuuno' galama' mangaru' ra taam nano.