Read Timugon Murut AMSAL 17 Bible Online

AMSAL 17 - Timugon Murut bible

AMSAL 17

¹Moonsoi poyo mangakan sapunjut ayuk akanon ra kalinuos ayuk, ka mangakan kasuang giu' ra baloi ra kumuliasou-asou mansasangor.

²Ulipon ra mapintar kuasaan no anak ru tuan nano ra mapakauyu', am tungkuson no santayaran ra rapu' no.

³Mas am pirok kinamin ru apui, kaa' guang ru ulun kinamin ru TUHAN.

⁴Ulun malaat mangapu ra pamaguangan malaat, am ulun maabau-abau masaga' mangkirongog ra ragu-ragu abau.

⁵Osoi-osoi magasab ra ulun musikin, magasab ri Aki Kapuuno' ondo' namangun risilo. Osoi-osoi maansukan ra ulun ondo' najamaran io ukumin.

⁶Ulun matutuo maansukan ra akupu koson ra anak maansukan ra matuo.

⁷Ulun ra urumaton moonsoi kalo magabau, am ulun sasambungon kalo makaindagu ra atan ondo' mokoonong.

⁸Sanganuan ulun mindagu rasua makabaal ra kaimuagan; mangintopot ilo ra ngaangai' no mabaal ru rasua.

⁹Amon ru kasagain ru ulun, ampuno' noyo kasalaan binaal nilo. Mapasingkual ra kasalaan makaukat ra pangkubayawan.

¹⁰Rondo' pansawayan maayo toojo arati' nano ra ulun mapintar, ka saratus ruli' lapos ra ulun sasambungon.

¹¹Kapatayan matong koson ra ulun sinusub ondo' malaat kaga' mongoi ra ulun malaat ondo' masalok mapalabui ra kaayatan.

¹²Moonsoi poyo maguma' ra ina' ru baawang ondo' natatakan ra anak nano, ka maguma' ra ulun sasambungon ondo' masalok mambaal ra sambung nano.

¹³Ulun ondo' mambalos ra kaansayan no ra kalaatan, kalo makapagiru' kalaatan ru baloi nano.

¹⁴Talimpuun ru pansangaran koson ra sansag lumata'; ampangi' min pansangaran ra kalo poyo makatalimpuun.

¹⁵Masisang TUHAN ra napalabusan ra ulun malaat am sumonsol ra ulun kolondo' sala.

¹⁶Papalo ayuk ru ulun sasambungon mangai' ra ruit maguyum ra kapintaran, sabap ra iono kolondo' guang.

¹⁷Kubayau masalok montotogom ra rondo' am bokon, am pongkotob masalok mansaan ra kapaganan ra rondo' am bokon.

¹⁸Ulun ra kolondo' guang ayuk masaga' mansaan ra utang ru ulun bokon.

¹⁹Ulun ondo' masaga' ra tula masaga' mansasangor. Ulun ondo' masalok masawat ragu[17] maguyum ra kapaganan.

²⁰Ulun ra mamparuung kolondo' kaansukan; ulun ra majamol kabang makaalap ra kajamaran.

²¹Anak ondo' mambaal ra kalo matanda' mantipagon am mampangiluk ra guang ru matuo nano.

²²Guang ondo' makaansuk mapaligag ra inan; guang ra mangiluk mapakapalo ra guang.

²³Akim ra kalo mabanis guang suminok mangapu ra rasua am kalo nampaugar ra katimpakan.

²⁴Kuayan ru ulun mapintar ioginio mompogogot ra kapintaran, kaa' kuayan ru ulun sasambungon kolondo' onong.

²⁵Anak ra sasambungon mantipagon ra guang ru ama' nano am mapangiluk ra guang ru ina' nano.

²⁶Kalo matimpok mangukum ra ulun kolondo' sala, am kalo matimpok mangukum ra ulun moonsoi.

²⁷Ulun masuang katutunan kalo masuang ragu. Ulun mapintar kalinuos ayuk.

²⁸Ulun sasambungon pana magu' karaan ra mapintar am mapandai amon ru ilo mongkoror am kalo mindagu.