Read Timugon Murut AMSAL 2 Bible Online

AMSAL 2 - Timugon Murut bible

AMSAL 2

¹Alii ra anak kuno, apuo' atan ondo' inila' kuno am pai' mu liliani' panusuban kuno.

²Rongogo' min atan ondo' kapintaran am kinami' min aratio'.

³Iou, pakiasi' kano toojo maa' raginio makaalap ra katutunan am pakiarati' no.

⁴Uyumo' min baal raginio koson maguyum ra pirok am rapu' nasibuni.

⁵Bagu matutunan mu arati' ru malaa' ra TUHAN, am makaalap kou ra katutunan intor ri Aki Kapuuno'.

⁶TUHAN noyo manaak ra kapintaran. Katutunan am karatian Io namuun.

⁷Manaak Io ra pangindanganan am panindungan ra ulun ondo' mabanis guang.

⁸Ampinin No ulun ondo' mabanis guang, mangampin ra ulun ondo' gumagaya' Riso.

⁹Amon ru rongogon min bilin kutu, mapandayan min atan ondo' motopot, matimpok, kalo maagat ra sapapa'. Mapandayan min atan sotopot no baalon min.

¹⁰Masauk kau ra mapintar, am katutunan mino mapabansuk ra guang muno.

¹¹Karatian am kapintaran muno mangampin rirun,

¹²am niayuk mansawai ramuyun maya' ra kaayagan ra kalo moonsoi, am mapainggalur ramuyun intor ra ulun maabau-abau.

¹³Ulun koson raginio nanatang ra ralan kaayagan ra moonsoi, am ralan molondom binaya' no ondo' napanu' ra tula.

¹⁴Makaalap ilo ra kaansukan intor ra binaal nilo ra kalo matanda' am malaat.

¹⁵Ilo kalo lansanin am kolondo' mangintopot risilo.

¹⁶Marara' kau gumagaya' ra pagambian ru ruandu' mantalan ra inan ondo' gumogot koson mangalap ra guang am mantaligamis ramuyun.

¹⁷Ruandu' no kalo gumagaya' ra ralaki nano, am nampalilian ra bantu' nano ri Aki Kapuuno'.

¹⁸Amon ru mongoi kau ra baloi nano, makatingkuang kau ra patayan. Mongoi ra giu' nogondo' ayuk mongoi ra tana' ru ulun minatoi.

¹⁹Ulun ondo' minongoi riso iono kalo igondo' sumaguli' ra ralan tumingkuang ra kaayagan.

²⁰Intor raginio, musiti' tiluon min kaayagan ru ulun moonsoi, am musiti' no kaayagan mino sumugut ra kasagaan ri Aki Kapuuno'.

²¹Ulun ondo' sumugut ra kasagaan ri Aki Kapuuno', ioginio ulun ondo' mabanis guang maayag geu'ra ondo' binantu' ri Aki Kapuuno'.

²²Kaa' ulun malaat am makatula paingkualon ri Aki Kapuuno' intor ra pagun raginio, koson ra sakot binubul intor ra tana'.