Read Timugon Murut AMSAL 20 Bible Online

AMSAL 20 - Timugon Murut bible

AMSAL 20

¹Inumon ra mampagauk mambaal ra ulun magauk am mambutok. Sasambungon noyo ulun manginum saboi magauk.

²Malaa' ra raja' sumangit nogondo' niayuk laa' bulintok singa' mansangal. Ulun mangkinibit ra raja' sumangit iono mamuso ra inan galama'.

³Ulun sasambungon ayuk masaga' mantataam; paliso ra omporon ioginio minggalur ra pantataaman.

⁴Ulun ondo' matiar mantagumo ra bulintok nano, kolondo' ampos ru tana' no ra bulintok mangkumos.

⁵Pangkaraan ru ulun koson ra timug ru tulubong ondo' malandom, kaa' ulun mapintar makapansagou.

⁶Masuang ulun mangku ra ilo gumagaya', kaa' ulun topot-topot gumagaya', mapagon matuum.

⁷Pakaansuk noyo anak-anak ondo' mokoondo' ra ama' ondo' mabanis guang am matimpok.

⁸Bulintok ra raja' mangakim, makito ru raja' atan ondo' malaat.

⁹Makakau' kia ulun mindagu ra sotopot-topot no ra guang nilono mapasau, am tula nilono inampun?

¹⁰Masisang TUHAN ra ulun mamparuung ra timbangan am tutuku' ondo' kalo matimpok.

¹¹Intor ra binaal ru sangulun anak paliso nano maimansaan; mapandayan min paliso nano moonsoi kapoam malaat.

¹²Inanian takau ru TUHAN ra mato koson magilong am talingo koson mangkirongog.

¹³Ulun ra mobobolong masauk ra musikin. Ulun ra mapirot mangandoi makaalap masuang akanon.

¹⁴Ulun mambali masalok magalabo ra kuliamos talanon no mologo, kaa' kalupus nambali, naansukan io ra logo no.

¹⁵Ragu-ragu ra mapintar mologo atang nano ka mas kapoam intan.

¹⁶Sasambungon ga ulun ondo' mansaan ra utang ru ulun bokon; longgom nano musiti' alapon koson jamin ru bantu' nano.

¹⁷Ampos intor ra namparuungan talimpuun nano moonsoi, kaa' pupus nano malimanan koson toojo ra agis.

¹⁸Pakitaak ra bilin maa' raginio makaampos. Pai' ongoi pangayou amon ru kolondo' inatangan.

¹⁹Ulun masalok mangalimut kalo makapampauli ra inopot, pai' pakimangkubayau ra ulun ondo' masuang ragu.

²⁰Osoi-osoi magulas ra matuo nano, bayag nano maliom koson ra lampung malasa' ra intok molondom.

²¹Kinalangkayaan ra matasu' moowot, kolondo' barakat.

²²Kalaatan pai' balasi' ra kalaatan; pangintopot no ra TUHAN am mangindangan Io ramuyun.

²³Timbangan ra kalo matimpok, kasisangin ru TUHAN.

²⁴Ralan kaayagan ru ulun inaru' ru TUHAN; ginio sabap ra ulun kalo makarati' ra ralan kaayagan nilo.

²⁵Karaa' noyo toojo ra kalo poyo mangiou kau ra bantu' ri Aki Kapuuno' ra taak simbalui maa' raginio kalo pansagulian guang min.

²⁶Raja' ra mapintar makaulig ra ulun malaat; kalo makaasi' raja' no mangukum risilo.

²⁷Inanian takau ru TUHAN ra utok am guang; ginio ra kalo makapagabau takau ra inan galama'.

²⁸Amon ru raja' mamarinta ralalom guang mabanis, katagaman am katimpakan, am io pana magulayun makakuasa'.

²⁹Ulun mamulok ansukon sabap ra kaikangan nano, am ulun matutuo urumaton sabap ra uan.

³⁰Sanganuan kaintutunan ra mapait mampaliom ra kalaatan am mamasau ra guang ru ulun.