Read Timugon Murut AMSAL 22 Bible Online

AMSAL 22 - Timugon Murut bible

AMSAL 22

¹Inggalan ra moonsoi mokologo poyo ka rapu' ra masuang; tagamin ru ulun moonsoi poyo ka aniin ra pirok kapoam mas.

²Ulun langkaya' am ulun musikin mokoondo' rondo' pogondo': Karuruo no binangun ru TUHAN.

³Ulun mapintar miliu ra makalalaa' amon ru makito no, kaa' ulun budu polosoon no inan nano malumpa' ru karaat am pansagulian guang nano ra tauli no.

⁴Ulun mangurumat am malaa' ra TUHAN, am niayuk minggana' guang mokoowot io ra kalangkayaan, urumaton, am maawar umur.

⁵Ulun ondo' malubatan ra painawo nano musiti' io minggalur intor ra jajaling am landak ondo' pinataan ra ralan ru ulun malaat.

⁶Ilaa' noyo anak no ra ralan kaayagan ondo' motopot, am saboi matutuo pana kaayagan nano kon raginio.

⁷Ulun musikin kuasaan ru ulun langkaya'. Ulun ondo' magira' kuasaan ru ulun nampaira' no.

⁸Ulun mapatias ra kalo matimpok mangkumos ra karaat, am kuasa' nano koson mangimbolo' ra ulun bokon pupusin.

⁹Ulun mataau am mantayar ra akanon no ra ulun musikin, barakaton io ru TUHAN.

¹⁰Inggalari' ulun ra magasab, bagu no kolondo' pansangaran, pagansangan, am magulas.

¹¹Ulun ra mabanis guang am molomoi ra mindagu masauk ra rangan ru raja'.

¹²Kasaga' ru TUHAN katapatan alungin am singkualon no pagabawan ru ulun magabau.

¹³Ulun matiar masaga' morondon ra baloi. Mindagu io saamon io kunu' ru singa' amon ru mingkual io.

¹⁴Pangambian ru ruandu' mantalan ra inan koson ra luang malandom: ulun ondo' sangitin ru TUHAN maratu' ra ralalom no.

¹⁵Lalaing maubas mambaal ra baal ra saasala', kaa' lalapos makaila' risilo mangulau ra paliso.

¹⁶Osoi mangimbolo' ra ulun musikin koson ra ralan no sumauk langkaya' kapoam manaak ra tangguang ra ulun langkaya', pupus nano tumamusikin.

¹⁷Rongogo' noyo, ilaan takamin ra pinson ru ulun mapintar. Guango' pangilaan nilo.

¹⁸Pakaansuk noyo ulun ondo' makakara' ra pangilaan no am alapon no bulintok makapakuan.

¹⁹Kasaga' kuno mangintopot kau ra TUHAN, ginio sabap ra ilaan takamin raino.

²⁰Tinulisan ku talu ngoopor pinson ondo' mokoondo' ra katutunan am bilin moonsoi,

²¹ondo' topot-topot mangila' ramuyun ra motopot. Maagu no, amon ru kuatin kau, makataam kau ra motopot.

²²Pai' ruungo' ulun musikin sabap ra kinamusikin nilo, pai' ilo ruungo' giu' ra makama.

²³Saungon ilo ru TUHAN, am butuson painawo ru ulun mangimpai risilo.

²⁴Pai' pangkimangkubayau ra ulun mataki' sumangit am mataki' angitan.

²⁵Pai' kau baya' ra paliso nilono, am kalo makakulau ra kaindalaman raginio.

²⁶Pai' bantuo' koson manampilon ra utang ru ulun bokon.

²⁷Amon ru kalo makabayar kau ra utang, kaalangan mino pana gaawon.

²⁸Pai' pabandingo' bait ru tana' ondo' inaru' ru kinamatuaan mini.

²⁹Ulun maturasik mangandoi pongondoyon ru raja'-raja' am sala' ka ulun kasuangan.