Read Timugon Murut AMSAL 27 Bible Online

AMSAL 27 - Timugon Murut bible

AMSAL 27

¹Pai' pamanggo atan kasaukan ra susuab, sabap ra kalo poyo natutunan min atan kasaukan no.

²Polosoon ulun ra bokon mongompor ramuyun — kapoam ulun suai. Pai' pagiompor ra inan galama'.

³Batu am agis lakat mamaan, amon ru pogondoon ra kapaganan intor ra sasambungon.

⁴Sangit no malaat kaga' am niayuk makatutuk, kaa' kolondo' sangulun pana makatingkuang ra kaingatan.

⁵Moonsoi poyo sailon ragu ra mansawai ka togom ra masibuni.

⁶Sangulun rangan mamalamba' ralalom katagaman, kaa' ilalai' min amon ru sangulun pantula' gumanggol ramuyun.

⁷Amon ru maasug, ruu' ru maningot pana kararain; amon ru maitilan, mapait pana maamis ayuk pamalimanan.

⁸Ulun ondo' maalur intor ra baloi, koson ra susuit kolondo' bunsut.

⁹Umau ra maamis owou makaansuk ra guang, kaa' kapaganan makaimamang.

¹⁰Pai' liliani' pangkubayau muno kapoam pangkubayau ru ama' muno. Bulintok ra akau makakapaganan, pai' ongoi ra baloi ru pabukat mino; pinasambalayan poyo makapangindangan ka pabukat ra maalur.

¹¹Alii ra anak kuno, kapintar kano, maa' raginio maansukan aku am makataam bulintok ra aku sindualin.

¹²Ulun ra mapintar iliwin no kalaanan amon ru makito no, kaa' ulun sasambungon polosoon no io malumpa' ra karaat am tauli no pansagulian guang nano.

¹³Sasambungon nai ulun ondo' masaga' manampilon ra utang ru ulun bokon;[22] longgom nano alapon koson panampilon ra bantu' nano.

¹⁴Tabi' ra gumolok bulintok ra kakatawang ra susuab nogondo' ayuk ra pagulasan.

¹⁵Andu' ondo' mabaji' koson ayuk ra posok ru timug ondo' kalo tumaru'-taru' bulintok rumasam.

¹⁶Mailo io susubon mongkoror, nogondo' ra angin mailo ingain, am umau mailo gonggomon.

¹⁷Koson ra basi' asaan ra basi', ginio niayuk ra ulun migigila' ra rondo' am bokon.

¹⁸Ulun magalung ra puun ru nunuk makaakan ra kawa' nano; ulun magalung ra tuan nano tagamin io.

¹⁹Koson ra timug mampakito ra bulos, koson niayuk ra guang mampakito ra ulun ra sotopot no.

²⁰Pagun ru ulun minatoi, masalok makaintok; ginio niayuk ra gogot ru guang galama' ru ulun kolondo' palasan nano.

²¹Mas am pirok kinamin ra apui; ulun urioon maya' ra paliso nano ra omporon.

²²Kabalu' pana ulun sasambungon lambaan saboi malausan, sambung nano kalo matatak.

²³Alungi' noyo toojo bibiag mino,

²⁴sabap ra kinalangkayaan ti kalo mantilayun. Kuasa' koson mamarinta pana kalo lumayun ra sabuoi-buoi no.

²⁵Tatason min sakot am timungon koson pamamakan ra bibiag mino, kaa' liliwa' raginio sakot ra nakabagu tumuu'.

²⁶Makapambaal kau ra bayang intor ra bulu ru domba. Makapambali kau ra tana' intor ra logo ru kambing.

²⁷Kambing ra bokon no makagatas ra pagaan koson rirun, akau sambaloi, am niayuk ruandu'-ruandu' mangandoi rirun no.