Read Timugon Murut AMSAL 29 Bible Online

AMSAL 29 - Timugon Murut bible

AMSAL 29

¹Amon ru sangulun gumaai mokotog guang ra moonong sawayon, sangarawan matutuk io ondo' kalo boo makatapuli'.

²Amon ru ulun matimpok no mamarinta, mamagun maansukan. Amon ru ulun malaat no mamarinta, mamagun maimbolo'.

³Osoi maringkuanang ra mapintar, mapabansuk ra ama' nano. Osoi masalok lumatok ra ruandu' mantalan ra inan mampalubat ra ruit.

⁴Amon ru raja' mapaundok ra katimpakan, karajaan nano maikang, kaa' amon ru raja' mangangkum ra ruit, karajaan nano maaba'.

⁵Ulun ondo' mongompor ra rangan nano, mapataan ra pampajaling ra inan nano galama'.[23]

⁶Ulun malaat masulungan ru tula nilo galama', kaa' ulun mabanis guang maansayan am maansukan.

⁷Ulun moonsoi makapandai ra pagapuan ru ulun musikin, kaa' ulun malaat kalo makarati' ra baal koson raginio.

⁸Ulun ondo' masaga' magagasab makajajou ra titikop ru bandar, kaa' ulun mapintar makasimayo ra baal koson raginio.

⁹Amon ru ulun mapintar mantagi' ra ulun sasambungon giu' ra makama, ulun sasambungon no gumabu' am mampalakak ayuk saboi mapatabual ra kajajawan.

¹⁰Ulun malaat kaga' masisang ra ulun mabanis guang, kaa' ulun moonsoi mangampin[24] risilo.

¹¹Ulun sasambungon pasalulaan no ngai' sangit nano, kaa' ulun mapintar mosorot am oroton no sangit nano.

¹²Amon ru sangulun mangunguasa' mampaguang ra tanou kalo motopot, ngaangai' mangngandoi nano masauk ra malaat.

¹³Ulun musikin am ulun ondo' mangimpai riso no nogondo' ayuk: TUHAN nanaak ra mato risilo karuo-ruo.

¹⁴Amon ru raja' manungka' ra pagapuan ru ulun musikin, pamarintaan nano maikang ra sabuoi-buoi no.

¹⁵Pangubasan am pansawayan mapasauk ra ulun mapintar. Anak ra masalok gagayaan kitaakon nano mapakauyu' ra ina' nano.

¹⁶Amon ru ulun malaat makakuasa', kalaatan sumingkot, kaa' ulun mabanis guang makakito ra ilo matutuk.

¹⁷Ubaso' noyo ngaangai' anak mino; am manimayo ilo ramuyun am bansukon kau.

¹⁸Bansa' ra kolondo' indangan ri Aki Kapuuno' masauk ra bansa' kumuliasou-asou. Pakaansuk noyo ulun ondo' gumagaya' ru ukum ri Aki Kapuuno'.

¹⁹Sangulun ulipon kalo maila' ru ragu-ragu ayuk. Magu' makarati' io, kaa' kalo lioon no.

²⁰Maayo poyo kalansanan ru ulun sasambungon ka ulun ondo' mindagu ra kalo mangkara' galing.

²¹Ulipon ra layaan intor ra boborok, pupus no masauk ra ulun mokotog ulu.[25]

²²Ulun ra mataki' sumangit mapatabual ra masuang pansangaran am kapaganan.

²³Malilimbau mangkinibit ra karatuan, kaa' sangulun ondo' minggana' guang urumaton io.

²⁴Ulun ondo' kumubayau ra mantatakou arati' no masisang io ra inan galama'. Amon ru akunin no giu' ra makama, ukumin io; amon ru kalo akunin no, ulason io ri Aki Kapuuno'.

²⁵Malaa' ra guangon ru ulun bokon mangkinibit ra kapaganan. Pangintopot no ra TUHAN, am bayagon kau.

²⁶Masuang ulun lumansan ra sungka' ru mangunguasa', kaa' TUHAN ayuk manaak ra katimpakan.

²⁷Ulun moonsoi masisang ra ulun malaat; ulun malaat pana masisang ra ulun moonsoi.