Read Timugon Murut AMSAL 31 Bible Online

AMSAL 31 - Timugon Murut bible

AMSAL 31

¹Gitio noyo bilin ru ina' ru Raja' Limuil intor ra Masa ondo' posoboyon ra raja':

²“Okou anak tagamin ku, taam ru pakiasian kuno ondo' iniou ru TUHAN. Atan kia paraguon kuno rirun?

³Pai' koyoo' ikang muno ra ruandu', am pai' awayo' ruit muno ra ruandu'; masuang noyo raja' rinatuan nilo.

⁴Rongogo' noyo, alii ri Limuil. Raja' sotopot no kalo manginum ra wain, kapoam masuolok ra inumon mampagauk.

⁵Bulintok ra raja' no manginum raginio, koson mampalilian ra ukum am mangimpai ra pagapuan ru ilo ondo' kolondo' lulu'.

⁶Inumon mampagauk no inumon koson ulun matikapatoi am ondo' naimbolo'.

⁷Polosoon noyo ilo manginum koson mampalilian ra kamusikinan am kaimbalaan.

⁸Sungkaa' noyo ulun ondo' kalo makasungka' ra inan galama'. Sindungi' noyo pagapuan ru ngaangai' ulun ondo' kolondo' lulu'.

⁹Sungkaa' ilo no am kasauk no ra akim ondo' matimpok. Sindungi' noyo pagapuan ru ulun musikin am ulun makakapaganan.”

¹⁰Andu' ondo' matanda' mapagon matuum. Mologo io poyo ka intan.

¹¹Ralaki nano malansan riso am kolondo' atan-atan maawai riso.

¹²Buoi ru painawo nano, moonsoi io ayuk ra ralaki nano am kalo mambaal io ra atan-atan malaat riso.

¹³Marajin io manimung ra bulu ru domba am rami, am baalon no ra bayang.

¹⁴Maparatong io ra akanon intor ra intok maalur koson ra ondo' binaal ru kapal ra mantatalan.

¹⁵Mololondom poyo ra susuab ti kumarat io koson manampos ra akanon nilo sambaloi, am koson manusub ra ngaangai' ulipon ruandu' nano.

¹⁶Maguyum io ra sampila' tana', am balion no am tanamin no ra anggur intor ra ruit tinimung no ra buoi ti.

¹⁷Tumampos io koson mingkotog mangandoi.

¹⁸Nakapandai io kandoi raginio makaampos toojo, am mangandoi io saboi malandaman.

¹⁹Pambiliton no gantian am baalon no ra konoon nano galama'.

²⁰Mataau io ra ulun musikin am mapagon.

²¹Bulintok masimu' matong kalo magalabo io, sabap ra ilo sambaloi makabayang malasu'.

²²Mambaal io ra permaidani am bayangon nano binaal intor ra linon matanggilung ondo' mologo.

²³Ralaki nano tingganai ru nasuangan ulun, am sangulun maayo pangkat.

²⁴Mambaal io ra bayangon am mambaal ra abot koson talanon ra mantatalan.

²⁵Mapintar io am urumaton ru ulun. Kalo magalabo io ra kasaukan ra maagu no.

²⁶Mapintar ra io mindagu am molomoi.

²⁷Masalok io mangandoi am mampaguang ra kaukapan ru ilo sambaloi.

²⁸Urumaton io ru anak-anak nano am omporon ru ralaki nano.

²⁹Kon ru ralaki nano, “Mokoondo' masuang ruandu' moonsoi, kaa' okou noyo moonsoi kaga' intor risilo no.”

³⁰Kinantalur ti mamparuung ra mato, am kalo mantilayun; kaa' sangulun ruandu' mangurumat ra TUHAN musiti' io omporon.

³¹Balasi' noyo ngaangai' binaal nano. Io ruandu' ondo' maaya' urumaton ru ngaangai' ulun.