Read Timugon Murut AMSAL 4 Bible Online

AMSAL 4 - Timugon Murut bible

AMSAL 4

¹Alii ra anak kau ngai', rongogo' pangilaan ri ama' mino. Rongogo' min toojo maa' raginio masauk kau ra mapintar.

²Pangilaan kutu ramuyun ti moonsoi, ginio ra karaa' min pangilaan kuno.

³Bulintok ra lakat aku poyo lalaing, koson ra sangulun buayoi langkuir,

⁴i ama' masalok mangila' raki'. Kono, “Karaa' noyo pangilaan kuno am pai' noyo liliani'. Baalo' noyo atan nanusuban kuli, maa' raginio kaayagan muno makaansuk.

⁵Sauk no ra mapintar am malaga'. Pai' liliani' kapoam impayi' bilin kuno.

⁶Gonggomo' mu kapintaran, am kapintaran pana mangampin rirun; tagami' noyo kapintaran, am kapintaran pana magalung rirun maa' raginio moonsoi kaayagan muno.

⁷Baal ra maatang kaga' ondo' musiti' muno baalon ioginio mompogogot ra kapintaran. Atan pana ilowon muno, ondo' maatang kaga' no mompogogot ra pangaratian.

⁸Tagami' noyo kapintaran, am okou pana painsawaton. Gapuso' noyo[2] kapintaran, am okou pana urumaton kaga'.

⁹Kapintaran manaak ra karaun koson pasampakon rirun.”

¹⁰Alii ra anak kuno, rongogo' noyo ragu kutu. Imansain mu toojo bilin kutu maa' raginio maawar painawo muno.

¹¹Inila' tokono ra kapintaran am ralan kaayagan ra motopot.

¹²Amon ru maayag kou koson raginio, kolondo' mokoompong rirun bulintok ra okou mangkiralan, am kalo makasaru kou bulintok ra okou masimbul.

¹³Kasalok no mangkara' ra pangilaan ondo' pinataak kuno rirun. Tagami' pangilaan kuno sabap ra pangilaan raginio magibit ra ampos ru kaayagan muno.

¹⁴Pai' bayaa' ralan ru ulun malaat, am pai' tiluo' binaal nilono.

¹⁵Polosoo' ilo ayuk. Inggalur intor risilo am rayusi' ugar muno.

¹⁶Ulun malaat kalo mokororot amon ru kalo poyo makapambaal ilo ra malaat. Kalo matikoolong ilo amon ru kalo poyo maninduol ilo ra ulun bokon.

¹⁷Kalaatan am mampatoi pangkaraan nilo koson ayuk mangakan am manginum.

¹⁸Kaayagan ru ulun moonsoi koson ayuk ra sirang ru mato ru orou, buoi kabuoi matawang kaga' saboi mamai'.

¹⁹Kaa' kaayagan ru ulun malaat molondom koson ra rondom. Makasaru ilo am maratu', kaa' kalo mapandayan nilo atan sabap no.

²⁰Alii ra anak kuno, guango' noyo bilin kutu. Rongogo' noyo ragu-ragu kutu.

²¹Pai' min impayi'. Karaa' noyo am bulii' ralalom ru guang mino.

²²Ulun ondo' makarati' ra bilin kutu, maayag ilo am masauk ra maligag.

²³Totomolo' noyo atan karaan mino, sabap ra pangkaraan mino mangatang ra kaayagan mino.

²⁴Pai' raguo' atan kalo motopot. Pai' pagabau am mindagu ondo' mangkinibit ra ulun makalayau.

²⁵Ilai' noyo saang mabaya' ra guang mangintopot ra sotopot-topot no, am pai' pakukuo' ulu mino sabap ra mauyu'.

²⁶Ilalai' noyo atan ondo' atangon mino maa' raginio atan ayuk pana baalon mino makaampos ra moonsoi.

²⁷Painggaluro' noyo inan mino intor ra kalaatan am kaayag no ra guang mabanis. Pai' lisang intor ra ralan motopot.