Read Timugon Murut AMSAL 7 Bible Online

AMSAL 7 - Timugon Murut bible

AMSAL 7

¹Alii ra anak kuno, karaa' bilin kutu, am pai' liliani' panusuban kuno.

²Gagayaa' noyo panusuban kuno, maa' raginio maayag kau. Pagigilai' min sumugut ra pangilaan kuno koson niayuk ra akau magalung ra mato min galama'.

³Guuto' noyo pangilaan kuno ra moonong bulintok am bulii' ralalom ru guang muno.

⁴Kapintaran karaa' min koson ra pabukat min am kapandayan koson ra rangan molongkot min.

⁵Kapintaran mapainggalur ramuyun intor ra andu' ru ulun bokon, am intor ra ruandu' ondo' mantaligamis.

⁶Sangarawan ragili nampulolou aku intor ra pagimpalan ru baloi kuno,

⁷am makito ku masuang kamulakan ungkuyon kolondo' poyo katutunan, kaa' mulu' ra sangulun ayuk ulun kalo matanda' urioon ku intor ra risilo.

⁸Minugar io ra rondo' linsuk ru ralan, mamaar ra baloi ru sangulun ruandu'. Minugar io inggaar ra baloi ru ruandu' no

⁹bulintok mamai', am lumondom galing noyo.

¹⁰Ruandu' no minuma' riso. Nambayang ruandu' no ra bayang koson ra babayangon ru sangulun ruandu' mantalan ra inan am mangatang ra gogot ru guang nano.

¹¹Kalo totomolon no ra io mindagu am kalo mauyu'. Kalo mokosoloro' io migor,

¹²kapoam maginaa io ra linsuk ru ralan; sanganuan giu' ra ralan, sanganuan giu' ra pasar.

¹³Gapuson no buayoi no am alakin no. Kalo maringkauyu' io mindagu,

¹⁴“Orou raiti' napataak aku ra taak simbalui, am ragino mokoondo' poyo suwo intor ra taak simbalui no.

¹⁵Ginio ra aku miningkual maguyum rirun, am ragino natuum tokou.

¹⁶Kaalangan kuno inapinan ku ra konoon linon ondo' babatikan intor ra Misir.

¹⁷Kinupilan ku kaalangan no ra owou maamis ru mur, gaharu am kaningau.

¹⁸Ragino, parulug to liliwa' mangundasa' ra bansuk saboi matawang.

¹⁹Ralaki kuno kalio ra baloi. Minongoi io ra intok maalur

²⁰am nagibit ra ruit masuang. Kalo muli' io buoi ruo ngaminggu'.”

²¹Ginio noyo pantaligamis ru ruandu' no ra buayoi no saboi nasinggayawan guang ru buayoi no.

²²Kalo nakapangkara' io, tuluisuot no ayuk minaya' ra ruandu' no; buayoi no koson ra sapi' ondo' simbaluyon am koson ra tambang ondo' siminulung ra jajaling;

²³sangkinolor poyo anak ru panah mansabut ra pusu' nano. Buayoi no koson ra susuit mansiab jumuung ra landak. Kalo natutunan no ra painawo nano ralalom kapaganan.

²⁴Ginio ra, alii ra anak kau, rongogo' aku no am karaa' min bilin kuli.

²⁵Pai' polosoo' ruandu' koson raginio makabunduk ra guang mino. Pai' min io uyumo',

²⁶sabap ra masuang ungkuyon pinatibusu nano, am ondo' naimbolo' kalo mauntob suang no.

²⁷Amon ru mongoi kau ra baloi nano, arati' no mongoi kau ra pagun ru ulun matoi. Ginio noyo ralan magantos sumuku' ra kapatayan.