Read Timugon Murut AMSAL 8 Bible Online

AMSAL 8 - Timugon Murut bible

AMSAL 8

¹Rongogo' noyo! Mapintar[5] mampipiau; kapintaran mapaining ra bolos.

²Mapintar migor ra munung ru bulur, ra kiing ru ralan, am niayuk lisangon ru ralan.

³Giu' ra kulobon garabang, subalan mongoi ra bandar, giu' no maining bolos nano.

⁴“Alii ra ulun kau, mikikimasi' aku ramuyun; moonong ulun ra tana' urioo' pampiawan kuno.

⁵Akau ra kolondo' poyo katutunan, igigila' kau sumauk ra mapintar; akau ondo' kalo matanda', igigila' noyo maa' raginio makapangkara'.

⁶Rongogo' noyo ragu-ragu kutu, sabap ra ngaangai' no motopot am mokoonong.

⁷Atan ondo' raguon kutu, ngaangai' no motopot, sabap ra masisang aku ra abau.

⁸Ngaangai' ondo' raguon kuno motopot, kolondo' rondo' pana mampalayau kapoam nasala.

⁹Pangkaraan ru ulun mapintar, rinagu kuno motopot, pangkaraan ru ulun masuang katutunan, ngaangai' no matanda'.

¹⁰Guango' min pangilaan kuno makasail poyo intor ra pirok; kaatango' min noyo katutunan makasail poyo ra mas kopoyo.

¹¹Aku noyo mapintar. Mokologo aku po ka intan, am aku kalo maalap pogondoon ra atan ayuk gogoton mino.

¹²Aku noyo kapintaran; mokoondo' aku ra pangaratian, katutunan, am mapintar.

¹³Mangurumat ra TUHAN arati' no masisang ra kalaatan; masisang aku ra malilimbau am masawat ragu, paliso ra malaat am ragu-ragu ra mamparuung.

¹⁴Aku noyo manaak ra pambalaan ra moonsoi, am niayuk namuun no. Mapintar aku am maikang.

¹⁵Mangindangan aku ra raja'-raja' mapaugar ra pamarintaan nano, ngaangai' mangunguasa' indanganon ku mapaundok ra katimpakan.

¹⁶Sabap ra nangindanganan kuli, ngaangai' mangangandoi ru parinta am ulun bangsawan namarinta am mapaugar ra katimpakan.

¹⁷Tagamin ku ulun ra motogom raki', ondo' totopot maguyum raki', makatuum raki'.

¹⁸Kalangkayaan am urumat, am kalo igondo' mailusan am makasugut intor noyo raki'.

¹⁹Ondo' maalap intor raki' makasail poyo ra mas kopoyo; mologo poyo intor ra pirok kopoyo.

²⁰Mugar aku ra ralan kabanisan ru guang, am maya' ra ralan katimpakan.

²¹Ulun ra monogom raki', pasaukon ku langkaya'; baloi nano sosokon ku ra rapu'.

²²Aku pinagulu sauko' ru TUHAN, aku noyo ampos ru kandoi Nano ondo' pinagulu bulintok ra galing i poyo.

²³Aku pagulu binangun, ra kalo poyo binangun tana' ti.

²⁴Naanak aku no ra kalo poyo binangun raat, ra kalo poyo siminalula' taur-taur ru timug.

²⁵Aku inanak ra kalo poyo nakabigor ngaangai' gunung am ra kalo poyo nakabigor ngaangai' bulur,

²⁶ra kalo poyo binangun ru TUHAN no tana' am limayak, am niayuk ra kolondo' poyo kunol ru tana' ra kasaa'.

²⁷Bulintok ra Io namingkal ra limbowon, nakatainono' aku, am bulintok ra limbowon pinaatang No ralimbou ru raat,

²⁸bulintok ra TUHAN nangaru' ra gaun intokon ra limbowon, bulintok inukab No taur ru timug ra raat,

²⁹bulintok ra Io manusub ra timug ru raat maa' raginio kalo boo makasail ra polos ondo' inaru' Nano. Soroi aku noyo paat ra lonor ru tana' ti pinabanta' No.

³⁰Soroi aku minumbir Riso koson ra anak tagamin Nano,[6] moonong orou aku noyo puun ru kaansukan Nano, masalok aku maansukan ra saang Nano.

³¹Maansukan aku ra tana' Nano, am niayuk kinoonsoi ru ulun namagun no.

³²Raino, rongogo' min aku, alii ra ulun mamulok! Gagayaa' min nanuluan kuli, akau pana makakaansayan.

³³Apuo' min pangilaan kuno am kasauk no ra mapintar; pai' min polosoo' ginio.

³⁴Pakaansuk noyo ulun ondo' mangkirongog raki', ondo' moonong orou manturung maginaa ra kulobon ru baloi kuno, am ondo' maginaa ra garabang ru baloi kuno.

³⁵Osoi ondo' makatuum raki' makaalap io ra kaayagan, am TUHAN mangiou riso.

³⁶Osoi kalo makatuum raki' mamungawo io, am ulun masisang raki', gumogot ra kapatayan.”