Read Timugon Murut MAMPATANOU 1 Bible Online

MAMPATANOU 1 - Timugon Murut bible

MAMPATANOU 1

¹Ragu-ragu ragitio intor ra Ulun Mangkara', raja' giu' ra Jirusalim. Io anak ungkuyon ri Raja' Daut.

²Ngaangai' kolondo' onong am kolondo' ampos, kon ru Ulun Mangkara'. Kaayagan no kolondo' onong, ngaangai' kolondo' ampos.

³Ngaangai' ulun gumogot kaga' mangandoi ralalom ru kaayagan nilo, kaa' ati nua' ampos ondo' naalap nilo?

⁴Rondo' papag matong am papag ra bokon poyo mugar, kaa' tana' ti lakat poyo nogondo'.

⁵Mato ru orou sumirang am tumolop, am maagou-agou sumaguli' ra intok io sumirang.

⁶Angin sumiob ra rabugus am ra ralayo, lumibut am sumaguli' poyo.

⁷Ngaangai' sungoi tumuun ra raat, kaa' kalo niayuk mototop. Sumaguli' timug no giu' ra ralayo ru sungoi, am tumuun poyo saguli'.

⁸Ngaangai' makajala', kalo maragu. Mato kalo majala' magilong, talingo kalo majala' mangkirongog.

⁹Baal ondo' nasauk ra galing i, masauk poyo saguli'. Atan ondo' binaal ra galing i, baalon poyo saguli'. Kolondo' nakabagu ra titikop ru tana' ti.

¹⁰“Ilai' ga,” kon ru ulun, “gitio noyo baguon!” Kaa' ngaangai' no lair noyo nasauk ra itakau kalo poyo inanak.

¹¹Kolondo' ulun nangkara' ra kasaukan ra galing i; kasaukan ra raino am orou matong no kalo karaan ru osoi pana paat ra orou rumatong no.

¹²Aku, i Ulun Mangkara', mamarinta giu' ra Jirusalim koson raja' ru Israil.

¹³Gumogot aku koson migigila' toojo am mintutun ra atan ayuk binaal ralalom ru tana' ti. Kaayagan ondo' inaru' ri Aki Kapuuno' ra tayar ru ulun ra tana' ti makangiluk kaga'.

¹⁴Nakakito aku no ra ngaangai' binaal ru ulun ra tana' ti, am sotopot no ngaangai' no kolondo' onong koson mangilou ra angin.

¹⁵Ondo' napikong i kalo maalap banison; ati kolondo' i kalo mauntob.

¹⁶Mindagu aku ralalom ru guang kuno, “Nasauk aku no ra maatang kaga', mapintar poyo intor ra ngaangai' ulun ondo' namarinta ra Jirusalim ra kalo poyo bulintok kuno. Nakapandai aku no ra masuang kapintaran am katutunan ondo' motopot.”

¹⁷Gumogot aku toojo koson makapandai ra nansasalaan ru katutunan am kabuduan, kapintaran am sasambungon. Kaa' nakito ra aku ti koson mangilou ra angin ayuk.

¹⁸Amon ru gumaai suang ru kapintaran, gumaai suang ru pangalabaan. Amon ru gumaai suang ru katutunan, gumaai suang ru kaimbalaan.