Read Timugon Murut MAMPATANOU 3 Bible Online

MAMPATANOU 3 - Timugon Murut bible

MAMPATANOU 3

¹Ngaangai' mokoondo' ra tana' ti masauk ra paat ondo' inaru' ri Aki Kapuuno'.

²Io no nangaru' ra paat koson maganak am paat ra patayan, paat ra mantanom am paat ra bubulon,

³paat ra mamatoi am paat ra mamabas, paat ra mamunsag am paat ra mambaal.

⁴Io nangaru' ra paat koson mantangi' am paat ra makakurit, paat ra mangulir am paat ra lumigo',

⁵paat ra mansilar am paat ra mongorot ra inan, paat ra gumanggol am paat ra mongorot ra guang.

⁶Io nangaru' ra paat koson mokoowot am paat ra matatakan, paat ra koson mambuli am paat ra mamatir,

⁷paat ra mamparilak am paat ra mampikit, paat ra mongkoror am paat ra mindagu.

⁸Io nangaru' ra paat koson tumogom am paat ra masisang, paat ra mangayou am paat ra mobonsoi.

⁹Atan nua' ampos ru binaal takau ti?

¹⁰Nakapandai aku noyo ra i Aki Kapuuno' nangani' ra kapaganan ondo' maagat kaga' ritakau.

¹¹Io noyo nangaru' ra paat ondo' motopot toojo ra ngaangai' baal. Io niayuk ondo' nangani' ritakau ra kasagaan koson makapandai ra paat orou rumatong, kaa' kalo nangani' Io ra karatian intor ra ngaangai' binaal Nano intor ra talimpuun saboi ra pupus.

¹²Ginio ra, nakaliman aku boo ra ondo' moonsoi baalon takau iono masalok maansukan am mirot toojo paat ra itakau lakat poyo maayag.

¹³Itakau ngaangai' musiti' mangakan, manginum am makasia' ra ampos ru binaal takau sabap ra ngaangai' no tinaakan ri Aki Kapuuno'.

¹⁴Makapandai aku ra ngaangai' ondo' binaal ri Aki Kapuuno' ti mantilayun. Ulun kalo makapamparuang kapoam mangiruru' raginio. Nambaal i Aki Kapuuno' koon raginio maa' raginio urumaton takau Io.

¹⁵Atan ayuk ondo' masauk kapoam masauk ra maagu no nasauk noyo ra galing i. I Aki Kapuuno' nangaru' maa' raginio atan ondo' nasauk raino, masauk poyo saguli'.

¹⁶Suai raginio, nakito ku niayuk ra tana' ti, giu' ra intok ondo' musiti' mokoondo' ra katimpakan am moonsoi, giu' no mokoondo' ra kalaatan.

¹⁷Karaan kuno, mangakim i Aki Kapuuno' ra ulun moonsoi am malaat, sabap ra moonong baal am moonong binaal masauk ra paat ondo' naaru'.[1]

¹⁸Gitio noyo guangon kuno: Mangkinam i Aki Kapuuno' ritakau koson manulu' ra nasip takau nogondo' ra nasip ru bibiag.

¹⁹Sala' ka kia ulun am bibiag no nogondo' ayuk nasip nilo? Karuruo no ondo' naayag am mapandai matoi. Ulun kalo niayuk moonsoi poyo intor ra bibiag, sabap karuruo no maayag am kolondo' onong.

²⁰Karuruo no sumaguli' ra intok nogondo' — ralalom ru tana'. Karuruo no intor ra tana' am sumaguli' niayuk ra tana'.

²¹Osoi kia' makapandai ra ambiluo ru ulun mongoi ra rasawat am ambiluo ru bibiag mongoi ralalom ru tana'?

²²Ginio ra, aku nakaliman ra kolondo' ondo' moonsoi kaga' ra tayar ru ulun intor ra sumia' ra ampos ru kandoi nano. Suai raginio kolondo' atan ondo' maalap kabaal.[2] Kalo lair makapandai takau ra ondo' baal masauk malupus ra itakau matoi.