Read Timugon Murut MAMPATANOU 5 Bible Online

MAMPATANOU 5 - Timugon Murut bible

MAMPATANOU 5

¹Guango' galing ra kalo poyo mindagu, am pai' lingasi' makimabantu' ri Aki Kapuuno'. Soroi Io giu' ra suruga' am okou soroi ra tana' ti, pai' indagu amon kalo maatang.

²Gumaai kaimamangan ru guang muno, maaru' lair okou makaupi ra malaat. Jumanjai suang rinagu muli, gumaai poyo okou mampaingkual ra ragu-ragu kalo motopot.

³Amon makimabantu' kou ri Aki Kapuuno', suguto' noyo bantu' muli ra mataki'. I Aki Kapuuno' kalo masaga' ra ulun kolondo' katutunan. Suguto' noyo bantu' muno.

⁴Moonsoi poyo ra kalo makimabantu' intor ra kalo suguton bantu' no.

⁵Pai' polosoo' ragu muno mangkinibit rirun makatula saboi iowon mu kalalaat ra imam ra okou nasala makimabantu'. Kua nua' napasingkual kou ra sangit ri Aki Kapuuno' rirun suku' namuso Io ra ngaangai' kandoi muli?

⁶Kalo untobon ra mapara' suang ru guangon muli, kapoam mapara' suang ru pirot muli ondo' kolondo' onong, kapoam mapara' suang ru ragu muli, musiti' okou magulayun malaa' ri Aki Kapuuno'.

⁷Pai' pangimuag amon makakito ra ulun manguasa' mangimbolo' ra ulun musikin am mampagaau ra ngaangai' longgom nilo, am kalo nangani' risilo ra katimpakan. Moonong pagawai inampin ru pagawai maningganai risilo, am karuruo no inampin ru pagawai ondo' masawat poyo intor risilo.

⁸Raja' pana malansan ra ampos kinumos.

⁹Ulun ondo' ruit ayuk kakaraan, kalo majala'. Ulun ondo' moogot lumangkaya', kalo makaalap ra ngaangai' ondo' gogoton ru guang. Ngaangai' no kolondo' onong toojo.

¹⁰Jumanjai poyo suang ru langkaya' mino, jumanjai niayuk suang ru saanin min. Kalo makaalap kau ra atan-atan kaulian, makapandai kau ayuk ra akau ti ulun langkaya'.

¹¹Maaru' lair ra ulun mangandoi maukop ra akanon kapoam kalo, kaa' ilo mokororot. Kaa' suai boo, ulun langkaya' makarapu' ra masuang kaga' saboi kalo mokororot ilo sabap maimamang.

¹²Nakakito aku ra ondo' mampangiluk ra guang ra tana' ti: mokoondo' ulun ondo' nanimung ra ruit koson lutu' paat ra ilo makapakuan.[3]

¹³Kaa' ruit raginio natatak ralalom ru pirot nilo mantalan, saboi kolondo' atan pana ondo' pinatungkus ra lalaing nilo.

¹⁴Mangiruan takau ra tana' ti koson ra itakau inanak, ra kolondo' atan-atan pana! Kalo makapagibit takau ra atan ayuk intor ra pirot ru kandoi takau.

¹⁵Baal ragitio kalo natimpok. Inugaran takau koson ra itakau minatong. Gumogot takau koson mangilou ra angin am atan nua' ampos nano?

¹⁶Kaayagan takau ralalom ru kalandaman am kangilukan ru guang,[4] pagalabaan, kasangitan, am niayuk karualan.

¹⁷Pamatasan kuno koson ragitio: moonsoi ulun mangakan, manginum, am sumia' ra ampos ru kandoi nilo ralalom ru kaayagan mariwa' ondo' tinaakan ri Aki Kapuuno'. Ginio noyo nasip ru ulun.

¹⁸Amon ru nangani' i Aki Kapuuno' ra ulun ra rapu' am kalangkayaan, am mangiou risilo sumia' ra kalangkayaan no, ilo musiti' maringkuanang am sumia' ra ampos ru kandoi nilo. Ginio niayuk tinaakan ri Aki Kapuuno'.

¹⁹Sabap i Aki Kapuuno' mangiou risilo maansukan, kalo magalabo ilo kaga' ra mapara' riwa' ru kaayagan ti.