Read Timugon Murut MAMPATANOU 8 Bible Online

MAMPATANOU 8 - Timugon Murut bible

MAMPATANOU 8

¹Sangulun ondo' mapintar ayuk makapandai ra arati' ru ngaangai' baal. Kapintaran mampasauk riso makakurit am bulos nano matakau.

²Gagaya' no susuban ru raja', am pai' no kalingas makimabantu' ri Aki Kapuuno'.

³Raja' makapambaal maya' ra kasagaan ru guang; ginio ra, inggalur no intor ra raja'. Pai' ongoi ra intok ondo' makalalaa' no.

⁴Mingkuor raja' no mabaya' ra kuasa' nano, am kolondo' sangulun pana makapansawai ra atan ayuk baalon ru raja'.

⁵Maayag kou ra sabuoi no amon mangintopot kou ra parinta ru raja', am ulun mapintar makapandai ra bulintok am ralan gumagaya' riso.

⁶Ralalom moonong baal no musiti' makabulintok am ralan galama' mambaal, kaa' kalo masuang napandayan takau.

⁷Itakau ngaangai' kalo makapandai ra baal ondo' masauk ra orou rumatong no, am kolondo' sangulun pana mambala' ritakau.

⁸Kolondo' sangulun pana makainggalur kapoam mapainjul ra orou patayan nano. Patayan ti rondo' pangayawan ondo' kalo mailiwan kabalu' pana ra mamparuung.

⁹Nakakito aku no ra ngaangai' baal ragitio paat ra aku mangkara' ra ngaangai' baal ondo' nasauk ralalom ru tana' ti. Sampiruo ulun makakuasa', kaa' ulun ru bokon naimbolo' kalalaat ra ragana' ru kuasa' nilo.

¹⁰Nakaili' aku nakakito ra ulun malaat ondo' minatoi am linobong. Kaa' paat ra ilo minuli' intor ra kalabangan, ngaangai' ulun mongongompor ra ulun minatoi i, giu' ra bandar intok nambaalan nilo ra kalaatan. Ngaangai' no kolondo' onong!

¹¹Masaga' toojo ulun mambaal ra kalaatan sabap ulun ondo' nambaal no kalo inukum ra mataki'.

¹²Kabalu' pana ulun makatula' nambaal ra maatus kalaatan, ilo lakat poyo maayag. Nakapandai aku ra ulun mindagu, “Ulun ondo' gumagaya' ri Aki Kapuuno' maayag ra sabubuoi no,

¹³kaa' ulun malaat maayag makakapaganan. Kaayagan ru ulun malaat mataki' mansail koson ra babara', am matoi ilo paat ra ilo mamulok sabap ra kalo gumagaya' ri Aki Kapuuno'.”

¹⁴Kaa' baal raginio kalo motopot. Ilai' noyo atan ondo' nasauk ra tana' ti; sanganuan ulun moonsoi ti mangapu ra ukuman ondo' sotopot no apuon ru ulun malaat, am ulun malaat mangapu ra taak ondo' sotopot no inapu ru ulun moonsoi. Baal ragitio niayuk kolondo' onong.

¹⁵Ginio ra, mangintopot aku ra ulun musiti' makaansuk. Mangakan, manginum ayuk am maansukan ondo' kasiaan nilo. Ginio ayuk mabaal ra tatanga' bagui ru kandoi nilo sabuoi ru kaayagan ondo' tinaakan risilo ri Aki Kapuuno' ra tana' ti.

¹⁶Paat ra aku nangkinam makaalap ra kapintaran am makarati' ra ngaangai' ondo' masauk ra tana' ti, nalimanan ku kabalu' pana ra itakau kalo mombolong orou am rondom,

¹⁷itakau kalo niayuk makarati' ra binaal ri Aki Kapuuno'. Kabalu' pana gogot ru guang takau kuminam, kalo niayuk makarati' takau. Ulun ondo' mapintar no mangiou ra makarati' ilo, kaa' sotopot no kalo.