Read Timugon Murut MAMPATANOU 9 Bible Online

MAMPATANOU 9 - Timugon Murut bible

MAMPATANOU 9

¹Lair noyo aku mangkara' ra baal raginio saboi malandom toojo, am napandayan ku ra i Aki Kapuuno' nanguasa' ra ngaangai' binaal ru ulun mapintar am ulun moonsoi, am poyo amon ru ilo motogom am masisang ra ulun. Kolondo' sasangulun pana makapandai ra baal ondo' masauk paat ra orou rumatong.

²Topot nogondo' ayuk nasip ru ngaangai' ulun![7] Nasip ru ulun mabanis guang am malaat nogondo' ayuk, kabalu' pana ulun moonsoi am malaat,[8] ulun ondo' mapasau am poyo majamol, ulun ondo' nampataak ra taak simbalui am poyo ulun ondo' kalo nampataak ra taak simbalui. Ulun moonsoi kalo niayuk moonsoi poyo kaayagan nilo intor ra ulun makatula', am ulun ondo' nagibot kalo moonsoi poyo kaayagan intor ra ulun ondo' kalo magibot.

³Nasip ru ngaangai' ulun nogondo' am baal raginio kalo motopot, koson ra ngaangai' baal ru bokon ralalom ru tana' ti. Buoi ra kaayagan ru ulun, guang nilo napanu' ra kalaatan am kolondo' katandaan, am pulali' ayuk boo matoi.

⁴Kaa' osoi ondo' lakat poyo maayag ra tana' ti makakalansanan. Sala' ka kia uku' ondo' maayag moonsoi poyo intor ra singa' ondo' minatoi?

⁵Ulun ondo' lakat poyo maayag makapandai ra matoi ilo, kaa' ulun ondo' minatoi noyo kalo makapandai ra atan-atan pana. Kalo boo makaalap ilo ra gaji', am lilianin ilo ru ulun.

⁶Katagaman, kasisangan, am kasagaan ru guang nilo galama', ngaangai' no linimiot mabaya' risilo. Ilo kalo boo mangalap ra tayar ralalom atan-atan baal ondo' masauk ra tana' ti.

⁷Pangakan no, panginum no, am pakaansuk no! Panginum no ra wain am pakaansuk no; kalo manginggalar i Aki Kapuuno'.

⁸Polosoon noyo akau masalok maansukan am bulos mino matakau.

⁹Sia' no ra kaayagan ti mabaya' ra andu' katagaman muno, sabuoi ra kaayagan muno ondo' kolondo' onong, ondo' tinaakan ri Aki Kapuuno' rirun ra tana' ti. Sia' no ra moonong orou kabalu' pana kolondo' onong sabap ginio ayuk maalap muno intor bagui ru kandoi muno.

¹⁰Tandaa' toojo kandoi min, sabap giu' ra tana' ru ulun minatoi kolondo' kandoi, pangkaraan, katutunan, kapoam kapintaran poyo; giu' noyo angayan min.

¹¹Mokoondo' poyo ondo' nakito ku ra tana' ti: ulun masimbul ondo' maribok kalo masalok manang, am ulun ondo' baani kalo masalok manang ralalom pangayawan. Ulun mapintar kalo masalok makaalap ra ruit, ulun mapandai kalo masalok masauk ra langkaya', am ulun ondo' maikang kalo masalok makaalap ra intok masawat kaga'. Nasip malaat lumumpa' ra moonong ulun.

¹²Ulun kalo makapandai ra bulintok ratangan ru karaat. Koson ra susuit ondo' nakasulung ra landak, am papait ondo' nakasulung ra ralo, nogondo' ayuk ra ulun ondo' linumpa' ru karaat ondo' kalo napandayan.

¹³Nakakito aku niayuk ra tiluan moonsoi intor ra atan koson kapintaran ondo' karaan ru ngaangai' ulun ra tana' ti.

¹⁴Mokoondo' rondo' bandar boborok am mamagun nano kalo masuang. Sangulun raja' ondo' maikang mamulunsar ra bandar no, magawang am tumampos koson mamunsai ra timbok ru bandar no.

¹⁵Giu' ra bandar no mokoondo' sangulun ulun musikin ondo' mapintar. Mabaya' ra kapintaran nano io sotopot no makapamayag ra bandar no, kaa' kolondo' sangulun pana nangkara' riso.[9]

¹⁶Buoi ti naragu ku noyo ra kapintaran moonsoi poyo intor ra kaikangan, kaa' kapintaran ru ulun musikin asabin. Ragu ru ulun musikin kalo linio.

¹⁷Moonsoi poyo mangining ra ragu-ragu molomoi intor ulun ondo' makakapandayan ka golok ru panguasa' ralalom pantitimungan ru ulun kalo matanda'.

¹⁸Kapintaran moonsoi poyo intor ra kinandoi pangayawan, kaa' sangulun makatula nampalunsai ra masuang baal ondo' moonsoi.