Read Timugon Murut RIMBAI PANGAMPARAN 3 Bible Online

RIMBAI PANGAMPARAN 3 - Timugon Murut bible

RIMBAI PANGAMPARAN 3

¹Rondom karondom, giu' ra katil kuno, maupi ku ambai kuno; uyumon ku io kaa' kalo matuum ku.

²Liniput ku ugar ra bandar, mugar ra ngaangai' ralan am babayaan boborok. Maguyum aku ra karulau kuno, maguyum aku riso, kaa' kalio natuum ku io.

³Magagalung ra bandar makakito raki'. Mangkuot aku risilo, “Natuum min kia ambai kuli?”

⁴Kakalikar ku ayuk nangiruan risilo, katuum ku ambai kuno. Gapuso' ku io am kalo boo labusin ku, saboi inibit ku io minuli' ra baloi ru ina' kuno, ra lamin ri ina' ondo' naganak raki'.

⁵Pangatang no ra bantu', alii ra ralaa-ralaa ru Jirusalim, ralalom inggalan ru tambang am paus giu' ra limayak, ra kalo mangiis kau ra pangkubayawan maino.

⁶Atan kia minatong intor ra tana' kaagisan, koson ra kuliampun ru lisun? Maamis owou nano koson ra kaminyan am mur ondo' tinalan ru mantatalan.

⁷Ilai' ginio bandasan ru Raja' Salomo, liniputan ru onom ngoopor ngaulun saujor, ulun-ulun tutumula' ondo' baani maikang giu' ra Israil.

⁸Ngaangai' no matasik mamakai ra ilang, am masuang kaintutunan bulintok mangayou. Sigagama' nanangilang, nakatampos noyo mangayou bulintok molondom.

⁹Raja' Salomo nambaal ra rondo' bandasan nano galama' ondo' binaal intor ra tataun mokotog ra moonsoi kaga'.

¹⁰Lugu' nano binaal intor ra pirok, am sandigan nano intor ra mas. Turungan nano inapinan ra konoon makabatik ra matanggilung, ondo' binatu ra guang maansukan ru ralaa-ralaa ru Jirusalim.

¹¹Ingkual no, alii ralaa-ralaa ru Sion, ilai' min Raja' Salomo. Nangkaraun io ra ondo' pinasampak ru ina' nano, orou ra paguatan nano, orou ra io maansukan.