Read Timugon Murut RIMBAI PANGAMPARAN 5 Bible Online

RIMBAI PANGAMPARAN 5 - Timugon Murut bible

RIMBAI PANGAMPARAN 5

¹Matong aku ra intok pagitatanaman kuno, alii ra ambai am uoton kuno, manimung aku ra mur am apa' pampagamis ra akanon kuno; mangkan aku ra ruu' ru maningot am tambaloi nano, manginum aku ra gatas am wain kuno. Pangakan kau, rangan ku ngai', am panginum kau saboi kau magauk ra laai.

²Mombolong aku kaa' guang kuno kalo mokororot. Iningo' noyo, ambai kuno nanitik ra kulobon. Iowo' aku mumpos, okou kalumpusan kuno, susuit asang kuno, kawa' ru guang kuno. Naasa' ulu kuno sabap ra bolobou, am abuk kuno natikop ra posok ru bolobou ru rondom.

³Bayang kuno inalus ku noyo; kua kinua' sulungi' ku saguli'? Kalayam kuno pana binaguan ku noyo; kua kinua' jamali' ku poyo?

⁴Gaak-gaak ayuk guang kutu, sabap ra ambai kuno giminuut ra pangukaban ra kulobon.

⁵Aku pana siminukal mongoi pangukab ra kulobon koson mampasubol ra ambai kuno. Mur nomosok intor ra kalindu' am bubua' ru kalindu' kuno namasa' ra pangukaban ra kulobon.

⁶Ukabin ku ambai kuno ra kulobon, kaa' minugar iono. Moondom aku kaga' ra bolos nano. Uyumon ku io kaa' kalio natuum ku; piawon ku io, kaa' kalo tumaam io.

⁷Magagalung ra bandar nakatuum raki'; linamba' am jinamaran nilo aku; magagalung ra timbok ru bandar nampagaau ra sakiking kuno.

⁸Pangatang no ra bantu', alii ra ralaa-ralaa ru Jirusalim, amon ru matuum min ambai kuli, balai' io ra laai kuno riso tutuyangon ku.

⁹Alii ra ralaa ra mantalur kaga', moonsoi poyo kia ambai muno ka ambai ra bokon? Atan kia moonsoi ra ambai muno saboi susubon mu akai mangatang ra bantu'?

¹⁰Ambai kuno maikang am maindon; kolondo' mokogondo' riso kabalu' pana suang ru ulun no mopor ngaribu.

¹¹Ulu nano koson ra mas, mas ra pinasau, abuk nano talilingkong, maitom koson ra susuit bangkaak.

¹²Mato nano koson ra susuit asang ra taur ru timug, susuit asang nariu' ra gatas, giu' ra tobo ru susungoi.

¹³Pingas nano koson ayuk ra umo ru apa' pampagamis ra akanon ondo' maamis owou. Bibil nano koson ayuk ra bunga' bakung ondo' mopoposok ra mur tumanu'.

¹⁴Kalindu' nano moonsoi, am sinulungan no sinsing mas am intan. Inan nano koson ra gading binungaan ra batu nilam.

¹⁵Kalayam nano koson ra lugu' ru marmar mapulak, ondo' inangkupan ra mas pinasau. Ugar nano maikang kaga' koson ra gunung-gunung giu' ra Libanon, am kinaindon nano koson ra puun ru tataun sidar.

¹⁶Molomoi kaga' ragu-ragu nano, atan linonggom nano namunduk ra guang kutu. Gitio noyo ambai kuno am rangan kuno, alii ra ralaa-ralaa ru Jirusalim.