Read Timugon Murut KAPINTARAN RI SALOMO 13 Bible Online

KAPINTARAN RI SALOMO 13 - Timugon Murut bible

KAPINTARAN RI SALOMO 13

¹Sasambungon toojo ulun ondo' kalo nakaulig ri Aki Kapuuno'. Makito nilo ngaangai' ondo' moonsoi ra libung nilo kaa' kalo makainguu mangulig ri Aki Kapuuno'. Migigila' ilo ra ampos ru binaal Nano, kaa' kalo makaulig Riso ondo' nambaal risilo.

²Indoson nilo tana' ti kinuasa' ru dewa-dewa ondo' koson ra angin kapoam apui, bagiu' mapuor kapoam timug sumimpor, bibiag-bibiag kapoam atan-atan makasilau ra gaun no.

³Masaga' ilo toojo ra kinoonsoi nano, saboi kuliamos-kuliamos raginio karaan nilo koson ri Aki Kapuuno'. Musiti' ilo makarati' ra Mangunguasa' ra ngaangai' no matulai poyo toojo, sabap no Ama' ru ngaangai' moonsoi raginio noyo ondo' nambaal ra ngaangai' no.

⁴Nakasioro' ilo ra kuasa' am baal ru kandoi ru ngaangai' ondo' mokoondo'. Ginio nai ra ilo musiti' no makatutun ra Io ondo' nambaal ra ngaangai' no makakuasa' poyo toojo.

⁵Raino pagandingon ra gayo am kinoonsoi ru ngaangai' ru binaal, ulun makaulig Riso ondo' nambaal ra ngaangai' no.

⁶Kaa' ilo kalo najanjayan makasala. Maaru' lair ilo nakalayau ra buoi ru mingkotog koson maguyum ri Aki Kapuuno'.

⁷Rumayus ilo migigila' ra inangun ri Aki Kapuuno' ra libung nilo am nabunduk toojo ru atan ondo' makito nilo, sabap ra topot ra moonsoi ngaangai' no.

⁸Kaa' kabalu' pana koson raginio ilo kalo maalap kaampun,

⁹sabap ra amon ru masaga' ilo migigila' ra kinasuang ru ginio am maalap kaimumuyi' suang ru tana' ti, musiti' ilo mataki' makatuum ra Mangunguasa' ru ngaangai' no.

¹⁰Kaa' aibui boo ra ulun ondo' lumansan ra atan ondo' matoi am ondo' sumamba ra kuliamos baalon ru ulun, lukison tiluon ra bibiag intor ra pirok kapoam mas, kapoam intor ra batu ra kolondo' onong ondo' paaton bulintok ra galing i poyo.

¹¹Maaru' ra sangulun manukang ra tataun ondo' mapandai kaga' nampagaragaji' ra rondo' tataun ondo' maluoi kondoyon. Inanit no kulapa' ra matuyu' am binaal no toojo koson ra inaru' no am tuyuon no sauko' ra kuliamos ra mokoonong.

¹²Tampias no binaal ra luton koson mangansak ra akanon. Io pana mangakan saboi maasug.

¹³Kaa' intor ra tampias ru luton alapon no saputul ondo' kolondo' onong, ondo' lair mandikong am makatabubukinol no. Paat io kolondo' kondoyon, amarin no tataun no ra matuyu' masauk ra bulos ru ulun

¹⁴kapoam sanginan bibiag ondo' malaat. Sinungkalalaing no saaton ra malia' am moonong napilat no saaton no.

¹⁵Baalin no boo ra papaulian ra rinding intok pamakuan no ra sinungkalalaing no.

¹⁶Alungin no maa' raginio kalo maratu', sabap ra makapandai io ra kuliamos no sinungkalalaing ayuk ondo' musiti' indanganon sabap ra kalo mapandai mangindangan ra inan nano galama'.

¹⁷Kaa' kalo mauyu' io makiasi' ra sinungkalalaing ondo' kolondo' painawo no koson paguatan nano, anak-anak nano, am longgom nano. Ra sinungkalalaing ondo' kolondo' painawo, makiasi' io makitaak ra kaligagan.

¹⁸Ra sinungkalalaing ondo' matoi, makitaak io ra kaayagan. Intor ra sinungkalalaing ondo' kolondo' kaikangan, malansan io mangani' ra indangan, am intor ra kuliamos kalo makaugar, makitaak io ra pangkiralanan moonsoi.

¹⁹Kalindu' ru sinungkalalaing no kalo makaimbuor, kaa' makiindangan io riso maa' raginio makaampos pirot nano koson maguyum ra ruit, am niayuk ralalom ru kandoi nano.