Read Timugon Murut KAPINTARAN RI SALOMO 14 Bible Online

KAPINTARAN RI SALOMO 14 - Timugon Murut bible

KAPINTARAN RI SALOMO 14

¹Koon raginio noyo ulun ondo' masaga' masundoi ra raat ondo' maayo kaga' kinulun. Makiasi' io ra saputul tataun ondo' maamok toojo intor ra kapal ondo' sinakayan nano.

²Kapal raginio inatang ru sangulun ondo' maringkumaa', am baalo' boo ru sangulun manukang ondo' mapandai kaga'.

³Kaa' pamimiara' Muno noyo ondo' mampaugar raginio, iou Ama', sabap ra Okou mangani' riso ra ralan ondo' moonsoi sumail ra kinulun-kinulun giu' ra raat.

⁴Kolondo' kapandayan pana ulun makasundoi, sabap ra Okou napainono' ra Okou makapamayag ra ulun intor ra ngaangai' kalungganangan.

⁵Kalo masaga' Kou ra kandoi-kandoi kapintaran Muno kolondo' ampos. Ginio sabap ra ulun nampaintopot ra bayag nano ra saputul tataun ondo' kolondo' onong am rakit no sumasak ra raat ondo' mangkinulun saboi makasaguli' ra lantur ra maayag.

⁶Koon raginio niayuk paat ra galing i poyo bulintok bansa' sumintolong ondo' malaat kaga' pinuso. Ondo' nasauk ra kalansanan ru tana' ti mamayag ra inan galama' ra rasawat ru rakit; Okou mampaugar no ra kaikangan Muno am makanatatang ra papag ru ulun ra orou rumatong,

⁷sabap ra Okou nambarakat ra kapal tataun ri Nuu ondo' namparatong ra katapatan.

⁸Kaa' Okou nagulas ra sinungkalalaing binaal ru ulun, sabap kuliamos ondo' kalo motopot no piawon ri Aki Kapuuno'. Inulas Mu niayuk ulun ondo' nambaal no sabap ra kandoi nano.

⁹Sangulun malaat am ampos ru kalaatan nano nogondo' kasisangin ri Aki Kapuuno',

¹⁰am mangukum Io ra ulun no am niayuk kuliamos binaal nano.

¹¹Ginio ra sinungkalalaing ru bansa' ra bokon niayuk natiu' ra ukuman ri Aki Kapuuno', sabap ra giu' ra tatanga' ri Aki Kapuuno' sinungkalalaing raginio masauk ra kuliamos malaat, batu kasaruan koson ra ulun am jajaling ra tayar ru ulun sasambungon.

¹²Ra natuuman ra sinungkalalaing tumalimpuun boo kalisangan, am intor raginio niayuk nabunsai boo kaayagan ru ulun.

¹³Sinungkalalaing no kolondo' ra talimpuun i, am kalo mokosoroi koson ra sabuoi-buoi no.

¹⁴Sinungkalalaing minujak ra tana' ti sabap ra guguangon ru ulun, ginio noyo sabap no pupus nali ra mataki' inatang.

¹⁵Mokoondo' sangulun ama' ondo' malumpus toojo sabap ra anak nali minatoi. Baalo' no boo sinungkalalaing pinatilu ra anak nali ondo' minatoi ra kalo poyo nasaboi paat no. Ulun ondo' raitii' ni baangkai, urumaton no koson ra tuhan am ulipon ra sinusub nano maa' raginio mampaugar ra sambayang am upacara.

¹⁶Buoi-kabuoi kaindalaman ru kalaatan no lumanja' maikang am saukon ra undang-undang. Mabaya' ra susuban ru ilo ondo' nanguasa', sinungkalalaing ondo' pinaat no sambaan.

¹⁷Ulun ondo' minayan maalur intor ra raja' am kalo makapangurumat riso ra makainggaar, karaan nilo ayuk bulos ru raja' ondo' urumaton nilo, am mambaal ra panginuuyan ondo' makito. Koon raginio ra ilo mapirot makimasi' ra raja' no, koson ayuk ra io nakasaang ra intok nilo.

¹⁸Seniman ondo' pinantuyang ra urumat mangkimait am mampagaai ra sumamba raginio mulu' ra gino ngai' ru ulun ondo' kalo nakaulig ra raja' no.

¹⁹Seniman ondo' makaguang lair mangambi' ra guang ru raja', mambaal ra panginuuyan ondo' moonsoi poyo intor ra ulun nano.

²⁰Kandoi seni no mamunduk ra guang ru mamagun saboi ondo' pagulu i inurumat koson ra ulun, raino kinara' musiti' omporon.

²¹Baal raginio koson ra jajaling ra ulun, sabap ra ulun ondo' naintupan ru karaat kapoam naimbolo' ra kuasa' ru raja', mangalap ra kuliamos intor ra batu am tataun am urumaton nilo ginio koson ri Aki Kapuuno'.

²²Rayus nali, ra kalo poyo sama' ra ilo nakalayau ralalom pampaguangan nilo intor ri Aki Kapuuno'. Liliwa' maayag ralalom ru kalo naaruan sabap ru kabuduan nilo, baal malaat no sabiton nilo koson ra kaansayan.

²³Pinaugar nilo upacara ra mampili' pinabaya' ra pamatayan ra lalaing-lalaing, kapoam kandoi-kandoi sakti ondo' inopot, kapoam bunsagan ra kalo maaru'-aru' pinabaya' ra kaulayan ondo' kalo naaruan.

²⁴Ilo kalo boo nagalung ra kapasawan ru kaayagan am paguguatan, magail ak mampapatoi ra rondo' am bokon ra sumaindang kapoam mantipagon ra rondo' am bokon ra mansasawa'.

²⁵Ati-ati ayuk gagayan ru mampapatoi am raraa' sangiruayak, mantakou, mamparuung, rasua, magabau, kajajawan am ibot kalo motopot,

²⁶manguliso ra ulun moonsoi, kolondo' guang ru paringkuanangan, paliso kalo moonsoi, mambaal ra makauyuyu', mangali, mansasawa' am kalaatan.

²⁷Sumamba ra sinungkalalaing ondo' inggalan no kalo musiti' sabiton no puun am pupus, am niayuk sasaban am kinibit intor ra moonong kalaatan.

²⁸Ilo ondo' sumamba ra sinungkalalaing kalo nagalung ra inan galama' sabap ra minantak guang galama'. Mokoondo' inala' ra abau am mokoondo' poyo ondo' naayag ra laat kapoam ibot ra kalo motopot.

²⁹Sabap ra ilo mangintopot ra sinungkalalaing ondo' kolondo' painawo, kalo nangkara' ilo ra ukumin sabap ra nagibot ra kalo motopot.

³⁰Kaa' pupus no ukumin ilo niayuk sabap ra ruo sasaban. Kasaa', sabap ra mokoondo' ilo ra pangkaraan ra kalo motopot intor ri Aki Kapuuno' ra sumamba ra sinungkalalaing. Karuo, sabap ra kalo mampalio ilo ra kapasawan am nagibot ra abau koson mamparuung ra ulun.

³¹Amon ru ulun malaat mambaal ra tula, ilo musiti' ukumin, sala' ka sabap ra kuasa' ru sinungkalalaing ondo' inanian ra ibot, kaa' sabap ra koson sangulun ondo' makatula ilo musiti' ukumin.