Read Timugon Murut KAPINTARAN RI SALOMO 15 Bible Online

KAPINTARAN RI SALOMO 15 - Timugon Murut bible

KAPINTARAN RI SALOMO 15

¹Kaa' Okou, i Aki Kapuuno' mai, moonsoi guang, mampagagaya' am mokoorot. Okou mamarinta ra ngaangai' no ra katagaman maayo.

²Mulu' ru amon makatula akai, akai ti magulayun longgom Muno sabap ra akai mangiou ra kuasa' Muno. Kaa' marara' akai makatula sabap ra makatutun akai ti longgom Muno;

³ra makaulig Rirun ioginio pangindanganan ondo' moonsoi toojo am mangiou ra kuasa' Muno ioginio talimpuunan ru bayag mantilayun.

⁴Topot ra akai kalo palayawon ru ampos kesenian baalon ru ulun ondo' makakuayan ra malaat kapoam ru lukisan ondo' kolondo' onong baalon ru sasangulun mampalukis kapoam ru gambar ondo' saaton ra mansalinut batik.

⁵Kuliamos raginio mapasingkual ra laai ru guang galama' ru sasangulun sasambungon ondo' magilong no, saboi moondom io ra gambar ondo' minatoi am kolondo' painawo.

⁶Ngaangai' ondo' nambaal ra sinungkalalaing kapoam masaga' riso kapoam sumamba riso ioginio malaai ra kalaatan, am musiti' makaapu ra atan ondo' sotopot no sabap ra malansan ra kuliamos koson raginio.

⁷Koon raginio niayuk sangulun manukang ru pagangan manuyu' ra tana' lia'. Tana' ondo' malami' no tuyuon no ra mapagon toojo masauk ra atan ayuk ondo' mokoonong ritakau. Ngaangai' pagangan binaal intor ra tana' ondo' nogondo' ra pambabaal no, tawa ru koson ra pakuan ra mapasau kapoam pakuan ra malaat. Ulun mambaal ra pagangan no mangaru' ra kapakayan ru moonong kuliamos nano.

⁸Intor ra tana' lia' no niayuk io mambaal rondo' ondo' malaat, ioginio mambaal ra sinungkalalaing ondo' kolondo' onong. Atika io galama' ulun ondo' kalo poyo nabuoi raginio binaal intor ra tana' niayuk. Kalo boo mabuoi io musiti' mapasaguli' ra painawo ondo' ra buoi ti iniraan no, am sumaguli' io ra tana' intor nali.

⁹Bayag nano mariwa'. Sangkinolor poyo matoi io, kaa' kalo lioon no. Masaga' io gumondo' ra ulun manukang ra mas, ulun manukang ra pirok am ulun mampapasasar ra liau. Liminimbau io nakapambaal ra kuliamos kalo motopot.

¹⁰Guang nano intor ra kaau am lansan nano maulas poyo intor ra agis. Bayag nano kalo mologo intor ra tana' lia',

¹¹sabap ra io kalo nakaulig ri Aki Kapuuno' ondo' nambaal riso, ondo' napasampui ra painawo am paminawo napabiag ra ralalom nano.

¹²Bayag ru ulun karaan no ra pangkulian ayuk toojo, rondo' pasar magibit ra kalabaan. Pangkaraan nano musiti' io maguyum ra kalabaan ra atan ayuk baal, am poyo ra mambaal ra kalaatan.

¹³Ulun manukang ra pagangan no nambaal ra balanga ondo' matapu am sinungkalalaing intor ra nogondo' tana'. Io nakapandai toojo intor ra ulun bokon ra io makatula.

¹⁴Kaa' ondo' sasambungon toojo am naimbolo' poyo intor ra lalaing boborok ioginio ngaangai' pantula' ondo' nangimbolo' ra ulun Muno.

¹⁵Ngaangai' sinungkalalaing ondo' sambaan ru bansa'-bansa' no karaan nilo ra tuhan, kabalu' pana sinungkalalaing no kalo mapandai magilong ra mato nano, kalo mamainawo ra arung nano, kalo mokorongog ra talingo nano, kalo mapandai manguliau ra kalindu' nano am kalo makaugar ra kalayam nano.

¹⁶Ngaangai' sinungkalalaing no binaal ru ulun ondo' salibuor nilo galama' iniraan ayuk. Kolondo' sangulun ra ulun makapambaal ra rorondo' sinungkalalaing ondo' mamainawo koson riso galama'.

¹⁷Io ulun ra mapandai matoi, atan ayuk ondo' baalon nano ra kalindu' nano ondo' malaat ioginio kuliamos ra matoi. Io galama' moonsoi poyo ka kuliamos anggakon no sabap ra io makapainawo, kaa' ondo' binaal nali topot-topot kolondo'.

¹⁸Sinamba nilo bibiag-bibiag ondo' naulas, saboi ra ondo' magana' kaga' polos no.

¹⁹Baal ru bibiag no kalo moonsoi kapoam makabunduk ra guang, saboi i Aki Kapuuno' nansail riso paat ra Io nongompor am nambarakat ra inangun Nano ra bokon.