Read Timugon Murut KAPINTARAN RI SALOMO 16 Bible Online

KAPINTARAN RI SALOMO 16 - Timugon Murut bible

KAPINTARAN RI SALOMO 16

¹Ginio nai ra musiti' ulun raginio ukumin am imboloon ru bibiag-bibiag koson raginio.

²Kaa' ulun Muno kalo ukumin Mu ra koon raginio. Kaa' makaasi' Kou piboo risilo. Okou namparatong ra susuit tantarau, akanon ondo' maamis koson ra mapakasuung risilo.

³Bulintok boo ru pantula' maitilan, ilo kalo matiakan sabap ra bibiag-bibiag ra makalalamu ondo' inataran Muli. Ulun Muno sangkinolor ayuk maitilan, am inanian Mu ra akanon maamis.

⁴Topot noyo ra ulun ondo' nangimbolo' ra ulun Muno naimbolo' ra natutusan ra kolondo' ampun, am ondo' ulun Muno magilong ayuk ra atan koson pantula'-pantula' nilo imboloon.

⁵Bulintok ra ulun Muno sansaron ru bibiag-bibiag masangit am ilo matoi sabap ra tininduk ru kukuo ondo' saguguliom, sangit Muno kalo makarayus saboi ra pamupusan.

⁶Sangkinolor poyo ilo liniangan koson ra pampakaraan, am mangani' Kou risilo ra tatandu' ru pamayagan koson mapakara' risilo ra Ukum Muno.

⁷Osoi-osoi ayuk ondo' magilong ra tatandu' raginio bayagon, sala' ka sabap ru atan ondo' ilain nano, kaa' sabap Okou, Mamamayag ra ulun.

⁸Ginio ra Okou nampaintopot ra pantula'-pantula' mai ra Okou noyo namayag ramon intor ra ngaangai' karaat.

⁹Pantula' mai matoi sabap ra kokoton ru gapu' am bulongor. Kolondo' tatapis ondo' makapamayag ra painawo nilo, sabap ra ilo maaya' ukumin ra bibiag-bibiag koson raginio.

¹⁰Kaa' tinduk ru kukuo ondo' mangabisa' kalo makalungganang ra ulun Muno, sabap ra Okou makaasi' am mangindangan am niayuk mamabas risilo.

¹¹Tindukon ilo maa' raginio mantilayun mangkara' ra susuban-susuban Muno. Kaa' intakion ilo babason maa' raginio tojojo kalo boo makalilian Rirun kapoam makalabus intor ra sangit Muno.

¹²Babason ilo ra sala' ka tatapis kapoam salap, kaa' ra bala' Muno, iou Tuhan, ondo' makababas ra ngaangai' no.

¹³Okou manguasa' ra bibiag am matoi; Okou makapampatuun ra ulun mongoi ra kapatayan am manirong risilo saguli'.

¹⁴Ulun malaat makapamatoi ra ulun bokon, kaa' ilo kalo makabayag risilo saguli' am kalo makapangingkual ra salibuor ondo' nakasuang noyo ra ralalom ru intok ru ulun namagatoi.

¹⁵Kolondo' sangulun pana makalabus intor ra kuasa' Muno.

¹⁶Bansa' ra malaat ondo' kalo masaga' mulig Rirun inukum Mu ra kuasa' Muno ondo' maayo. Nalumpa' ilo ru rasam maawas, rasam batu, am bagiu' mapuor kaga', am nakai' boo kosolob ru apui.

¹⁷Rorondo' ondo' nakaimuag toojo nasauk: timug ondo' kaindalaman no makalasa' ra apui, kaa' mampagaai piboo napasimbula'. Ngaangai' kaikangan ru limbowon am tana' ti mingkotog koson manaung ra ulun mabanis guang.

¹⁸Sanganuan simbula' ru apui no lumook maa' raginio kalo mokosolob ra bibiag-bibiag ondo' atarin koson mamuso ra ulun malaat. Paat makakito ra baal raginio musiti' ilo makaliman ra ilowon ilo ru ukuman ri Aki Kapuuno'.

¹⁹Kaa' sangkinolor poyo ra bokon, ra tatanga' ru rasam, bilak ru ganit ondo' mapaang toojo intor ra apui nonolob ra ampos ru umo ru ulun malaat.

²⁰Kaa' ulun Muno kalo nalumpa' ru karaat. Alika inanian Mu ilo ra akanon ru malaikat. Intor ra suruga', nampatuun Kou ra ruti' ondo' akanon ayuk boo, am ilo kalo boo mampatampos. Ruti' no maamis kaga' am sama' toojo ra suung ru moonong ulun.

²¹Akanon ondo' pinataak Muno manulu' ra Okou motogom ra anak-anak Muno. Akanon no sama' ra kasagaan ru moonong ulun koson mampajala' ra suung ru sigagama'.

²²Akanon raginio lumiot amon matiu' ra sinda ru mato ru orou, kaa' tumaan ralalom lasu' ru apui. Binaal Mu ginio maa' raginio ulun Muno makaliman ra ampos ru umo ru pantula' pusoon ru apui ondo' nanimbula' ralalom ru rasam batu am bagiu' mapuor.

²³Kaa' apui no lumook kuasa' nano maa' raginio ulun ondo' gumagaya' Rirun makaalap ra akanon.

²⁴Okou namingkal ra limbowon am tana' ti am ngaangai' no ralalom ru kuasa' Muno. Ngaangai' binaal Muno minikang koson mangukum ra ulun malaat, kaa' mongorot ra inan am mambaal ra moonsoi ra ulun ondo' mangintopot Rirun.

²⁵Koon raginio ondo' binaal Muno masalok mindalom koson manulu' ra atan koson Okou mataau guang mamiara' ra ngaangai' ulun sumugut ra kasagaan am gogot nilo.

²⁶Binaal Mu ginio, iou Tuhan, maa' raginio ulun ondo' tagamin Muno makaliman ra ilo naayag sala' ka ayuk intor ra ampos ru umo nilai. Bala' Muno raginio noyo ondo' mamiara' ra ulun ondo' mangintopot Rirun.

²⁷Akanon ondo' kalo maalap katutuk ru apui lumuab ayuk koon raginio amon matiu' ra sinda ru mato ru orou ondo' kakasirang ayuk poyo.

²⁸Arati' no maa' raginio akai makaliman ra akai musiti' tumirong ra susuab ra kalo poyo sumirang mato ru orou koson makiasi' am mampasaboi ra ragu paringkuanangan Rirun.

²⁹Koon raginio baal no, sabap ra kalansanan ru ulun ondo' kalo mapandai maringkuanang mataki' lumiot koson ra bolobou kumotog ondo' lumiou am timug ondo' mapatiran.