Read Timugon Murut KAPINTARAN RI SALOMO 17 Bible Online

KAPINTARAN RI SALOMO 17 - Timugon Murut bible

KAPINTARAN RI SALOMO 17

¹Iou Tuhan, kapatasan Muno nasalangan toojo am mapagon sunuron. Ginio ra ulun ondo' kalo inila' makalayau.

²Ulun malaat mangkara' ra ilo makapanguasa' ra ulun Muno ondo' mapasau. Atika ilo galama' naaput ralalom ru kalandaman ru rondom ondo' maawar. Naaput ilo ra baloi nilo galama', nakatuliar intor ra namiaraan Muli ondo' mantilayun.

³Indoson nilo ra nakasibuni tula nilo am kalo nakito sabap ra matauban ru tabir ru lilian. Kaa' malaa' ilo toojo, nasapuong am posongonsol nakakito ra babara' ru riwato.

⁴Mulu' piboo ra intok pansibunian nilo kalo makapanindung risilo intor ra laa'. Bolos ondo' mampalaa posoloos ra kiing nilo. Riwato-riwato ra mangalaut bulos nilo ra parikarus sumalula' ra saang nilo.

⁵Kolondo' apui ondo' makapangani' risilo ra sinda, am butitin-butitin ondo' mapaang pana kalo makatampulau ra rondom ondo' malaat no.

⁶Ondo' makito nilo apui ayuk ra mangilaa' ondo' kalo paangin ru kalindu' ru ulun. Kopongo kuliamos ondo' nakito i liminiot, magulayun ilo malaa' am atan nakito nilo karaan ra makalalaa' poyo kaga'.

⁷Papalo ayuk ngaangai' ruung ampos ru ilimu' sihir nilo am ngaangai' ru kapandayan ondo' sinunur nilo topot-topot kolondo' onong.

⁸Mokoondo' ulun ondo' nambantu' koson mangiru' ra ngaangai' kalaanan am jajajou intor ru ulun ondo' mantuyang. Kaa' raino ilo galama' ondo' marualan sabap ra laa' ondo' sotopot no kuritin.

⁹Alika kolondo' atan-atan ondo' makalalaa', maliangan ilo sabap ra tambiag ondo' mansail kapoam kukuo ondo' pasangisis.

¹⁰Ilo pana matoi boo, totontol ra malaa'. Marara' ilo magilong ra atan totopot nasauk, kabalu' pana ra kalo maalap kailiwi'.

¹¹Topot ra ulun malaat ioginio matalou. Ukumin ilo ru intopot ru guang nilo galama'. Imboloon ilo ru bolos ru guang nilo, saboi kapaganan nilo rumuang-ruang,

¹²sabap ra laa' no kolondo' ra bokon intor ra mampalabus ra pangkaraan ondo' moonsoi.

¹³Gumorok-gorok boo pangintapatan ru ulun ra pangkaraan ondo' moonsoi nilo, gumayo-gayo boo kolondo' kapandayan nilo intor ra sasaban ru kaimbalaan raginio.

¹⁴Nosorondom ilo narurumak ra mombolong am magalabo, kabalu' pana rondom raginio topot kolondo' kuasa' risilo, sabap ra minatong intor ra pompor ru tana' ti ulun minatoi ondo' kolondo' lulu' no.

¹⁵Ilolowon ilo ru babara' ru riwato ondo' makalalaa', am kiminotog ilo sabap ra kolondo' kalansanan. Nalumpa' ilo ra laa' ondo' namulali' am kalo nakapangkuliman.

¹⁶Osoi ak soroi ra giu' no maaba' am maaput ra ralalom ru nangingiatan ru rondom ra kolondo' ompong.

¹⁷Ulun manangumo, ulun magagalung, am kuli' ondo' mangandoi ra lisar nauma'-uma' am nalumpa' ra nogondo' nasip ondo' kalo mailiwan. Ilo ngaangai' binangkil ru kalandaman ra nogondo' rantai.

¹⁸Monontol ilo malaa' ra bolos ru angin am siuk ru susuit giu' ra puun ru tataun, kapoam bolos ru timug maaug, kapoam bolos ru batu-batu mangaluir ra ragana', kapoam kinurasai ondo' kalo makito intor ra bibiag ondo' satindak-tindak, kapoam bolos ru bibiag mangasangit, kapoam bolos mamintanou ondo' maining giu' ra kabuluran.

²⁰Liliwa' raginio giu' ra intok ra bokon ra tana' ti, mato ru orou sumirang ra mapangit toojo, am ulun kumantisuk ra kandoi nilo ra kolondo' maniwot.

²¹Pantula'-pantula' ayuk ru ulun Muno liniputan ru kalandaman ondo' molondom kaga'. Kalandaman raginio noyo babara' intor ra kalandaman ru kapatayan ondo' maginaa risilo. Nasauk ilo ra bagat ra tayar ru inan nilo, bagat ondo' maagat poyo intor ra kalandaman no galama'.