Read Timugon Murut KAPINTARAN RI SALOMO 18 Bible Online

KAPINTARAN RI SALOMO 18 - Timugon Murut bible

KAPINTARAN RI SALOMO 18

¹Kaa' ulun Muno natampulau ru sinda ondo' mapaang. Pantula' mokorongog ra bolos, kaa' kalo makito bulos nilono. Manabit ilo ra ulun Muno makaansuk sabap kalo maimbolo'.

²Naringkuanang ilo sabap ra ulun ru Israil ondo' malaat pinamakuan nilo kalo mansuli', am ilo nakimaap ra pantulaan nilo.

³Okou pana naningganai ra ulun Muno mansail ra ralan ondo' kalo poyo nakatanda' ilo. Koson manulu' ra ralan Okou nangani' risilo ra rondo' lugu' ru apui. Apui no suminda ra mapaang koson ra mato ru orou, kaa' kalo makajajou risilo ra pangkiralanan ondo' matulai no.

⁴Kaa' pantula' nilo inaput ra ralalom kalandaman am kalo iowon makakito ra sinda. Ginio noyo ukuman ondo' nontopot ra tayar nilo sabap nangaput ilo ra ulun Muno. Alika ulun Muno musiti' mampasaboi ra sinda mantilayun ru Ukum Muno ra tana' ti.

⁵Kopongo pantula' namatas ra mamatoi ra anak-anak ru ulun Muno, mokoondo' sangulun anak pinatiran kaa' binayag. Okou pana nangukum boo ra pantula' ra namatoi ra masuang anak nilo. Nangala Kou risilo pinagampan giu' ra ralalom ru kinulun maayo ru timug.

⁶Kaa' kinamatuaan mai binalaan noyo kalalair atan ondo' masauk ra rondom raginio. Koon raginio ilo maansukan sabap ra makapandai toojo intor ra bantu' Muno ondo' inintopot nilo.

⁷Ulun Muno mangintopot ra Okou mamayag ra ulun ondo' gumagaya' Rirun am mamuso ra pantula' nilo.

⁸Ra rondo' ak buor Okou mangukum ra pantula' mai am nangani' ramon ra katulayan nalupus akai piniau nasauk ra ulun Muno.

⁹Liliwa' raginio ulun Muno, papag ru kinamatuaan ondo' moonsoi, simininok nampataak ra taak simbalui ru Paska. Nababaya' ilo nambantu' ra gumagaya' toojo ra ukum Muno am manutun ra rangan ralalom ru baal kaansayan am poyo ralalom baal ru kapaganan. Kalo poyo raginio narimbai ilo noyo ra rimbai pangamparan ru kinamatuaan.

¹⁰Kaa' rimbai-rimbai raginio tinaam ra tangi' ondo' malumpus intor ra pantula'. Sinulaboi ru ulun ondo' nantangi' ra anak-anak nilo norongog saboi maalur.

¹¹Ulipon pana am tingganai pana inukum ra pinogondo' ak kaimbalaan. Raja' am mamagun nano nababaya' naimbolo'.

¹²Anak nilo ngaangai' minatoi ra nogondo' ak baal. Suang no kalo nauntob, saboi ulun ondo' naayag kalo naukop koson mompolobong risilo, sabap ra igondo' lamba' anak nilo ondo' mologo toojo pinatoi.

¹³Ngaangai' ru ulun no kalo mangintopot ra atan ayuk sabap ra minsaau ra ilimu' sihir nilo. Kaa' kapatoi boo anak-anak ra katuaan nilono, bagu no mangiou ilo ra bansa' ru Israil koson ra anak ri Aki Kapuuno'.

¹⁴Liliwa' raginio ngaangai' no masiluk toojo, am rondom ra mariwa' ondo' nalintanga' noyo nasailan,

¹⁵pulusat boo ru ragu Muno ondo' kalo naala no nagindibok intor nanturungan Muno giu' ra suruga' am tuun ra pagun ondo' makaasi'-asi' no. Rinatangan no koson ra saujor ondo' kalo makaasi'.

¹⁶Susuban Muno ra malasang no pinaugar no ra nanangilang ondo' malarom. Minigor io toojo, kalayam nano nokosonor ra tana' am ulu nano nakasuku' ra limbowon, am napasuku' io boo ra kapatayan giu' ra titikop ru pagun.

¹⁷Pulali' ru ulun inuliso ru inupi ondo' makalalaa' toojo am kinuasa' ru kalaanan ondo' namulali'.

¹⁸Ulun ondo' mamaar matoi sangirulooi ra ati-ati ayuk, liliwa' mindagu atan sabap ra ilo matoi.

¹⁹Baal raginio pinabala' risilo ralalom ru inupi ondo' makalalaa' no, maa' raginio kalo matoi ilo ra kalo nakapandai atan sabap ilo linumpa' ru karaat.

²⁰Kapatayan niayuk minatong ra ulun Muno, sabap ra masuang ilo minatoi giu' ra tana' kaagisan. Kaa' sangit Muno kalo nabuoi.

²¹I Arun, ondo' kolondo' pipilat, nagindibok koson mangampin risilo. Koson ra imam, nakiasi' io am solobo' no kaminyan koson makiampun ra tula nilono. Ra pakiasian am kaminyan koson ra kinandoi mangayou, io nangampin ra sangit Muno am namupus ra karaat no. Ra binaal raginio io nambala' ra io ulipon Muno.

²²Nampalinos io ra sangit Muno[3] sala' ka panggol ru inan kapoam ikang ru kinandoi mangayou, kaa' ioginio ra pakiasian, am mampakara' Rirun ra nabantuan ondo' tinaakan Muno nabaya' ra ibot ra kinamatuaan mai.

²³Baangkai gumilooi nakapagigintun, kaa' i Arun minigor ra tatanga' koson mongorot ra sangit Muno am mangampin riso mamuso ra ulun ondo' lakat poyo naayag.

²⁴Sukub nano ondo' maawar makagambar ra tatandu' ru limbowon am tana' ti. Pinataub ra kubab nano tinulisan ra apat ngambaris balian ondo' inukir ra inggalan-inggalan ru kinamatuaan mai. Linimpor ra serban nano tatandu' ru katulayan Muno.

²⁵Tatandu'-tatandu' raginio nambaal ra malaikat mamatoi liminugut ra malaa'. Ulun Muno nakaili' noyo ra sangit Muno, am nailian raginio sama' noyo risilo.