Read Timugon Murut KAPINTARAN RI SALOMO 19 Bible Online

KAPINTARAN RI SALOMO 19 - Timugon Murut bible

KAPINTARAN RI SALOMO 19

¹Kaa' sangit Muno ondo' kalo makaasi' lumumpa' ra ngaangai' ulun malaat no saboi ra pupus. Napandayan Mu noyo kalalair atan ondo' baalon nilo.

²Nakapandai Kou ra ulun ru Misir nangiou ra ulun Muno mugar am nanusub risilo mintor ra mataki', kaa' pupus nali ilo koson nangulau ra guang am nangilou ra ulun Muno.

³Liliwa' raginio ulun ru Misir lakat poyo mangulir am mantatangi' giu' ra kalabangan ru ulun nilo ondo' minatoi, nalilianan nilo atan ondo' nasauk no. Ulun ondo' kitaakon toojo maa' raginio mugar karaan ra ulun nagigiru', am namatas ilo kalo motopot koson mangilou ra ulun Muno. Maangatan ilo koson mambaal raginio maa' raginio makaalap ra suwo intor ukuman am kaimbalaan ondo' maaya' risilo.

⁵Ilo matoi ra baal makalalaa' liliwa' ulun Muno makaili' ra rondo' ugar ondo' makaimuag.

⁶Sumugut ra susuban Muno, ngaangai' ukum ru limbowon am tana' ti kinulau maa' raginio ulun Muno kalo makaalap ra karaat.

⁷Nagilong ilo ra gaun mampaluub ra pangkiman nilo am tana' mapua' minujak ra intok ondo' pagulu i nototop ra timug. Giu' ra gino ngai' ru kinulun maayo ondo' makaputa' giu' ra Raat Galaga nakito noyo rondo' limayak ra makasakot masansam am ralan ra kolondo' mokoompong.

⁸Ngaangai' ulun Muno nakakito ra kaimuagan no am siminindaup ra ragana' ru panindungan Muno.

⁹Koson ilo ra kuda ondo' bagu ayuk labusi' ra pangkakatapan am mitutulindak koson ra anak ru domba am mongompor Rirun, iou Tuhan, ondo' namayag noyo risilo.

¹⁰Lakat nilo makara' ondo' nailian nilo koson ra ulun pinatiran bulintok pagun nampasayat ra namuk pasugulon ra bibiag tinambiag, am sungoi mapasayat ra masuang kaga' antit suali ru papait.

¹¹Kopongo raginio bulintok ru ulun Muno matiakan kaga' ra akanon maamis, nakito nilo susuit-susuit ondo' kalo poyo nauligan nilo.

¹²Ginio noyo susuit tantarau ondo' minatong intor ra raat koson mapaikang risilo.

¹³Lapos ru ganit ondo' moporos kaga' ioginio ukuman ondo' mataki' lumumpa' ra ulun ru Misir ondo' makatula. Nakaalap ilo ra ukuman ondo' pinogondo' ra kalaatan nilo, sabap ra ilo masisang kaga' ra ulun bansa' bokon.

¹⁴Namagun ru Sodom kalo masaga' mangapu ra ulun bansa' bokon ondo' kalo nauligan nilo, kaa' ulun ru Misir nangulipon ra tambului ondo' nambaal ra moonsoi risilo.

¹⁵Namagun ra Sodom inukum sabap ra nanguma' ra ulun bansa' bokon ra pantulaan.

¹⁶Kaa' pagulu i ulun ru Misir nanguma' ra ulun bansa' bokon ra pangiantakan ru kaansukan am nangani' ra kaapuan ondo' pinogondo' risilo, kaa' tauli no nangimbolo' risilo ra kandoi ondo' mapagon.

¹⁷Ginio ra ulun ru Misir niayuk nalumpa' ru moolou koson ra ulun ru Sodom ondo' minatong ra baloi ri Lot, ulun motopot no, bulintok ilo naliputan ru kalandaman ondo' molondom kaga' am musiti' mangulangkam maguyum ra kulobon ru baloi galama'.

¹⁸Moonong tali ru jitor mokoondo' ra bolos nano galama', kaa' ngaangai' bolos ra pinasimpung no manangampos ra rimbai ondo' nansasala'. Koon niayuk ra baal-baal ru tana' ti mantutuluk mambaal ra tampos ondo' bagu. Baal raginio makito toojo amon ru ilain takau atan ondo' nasauk noyo:

¹⁹Bibiag ru lantur tumalimpuun maayag ra ralalom ru timug am bibiag ondo' maayag ralalom ru timug masak ra lantur.

²⁰Apui pana manimbula' ra marayus ralalom ru timug, am timug nakalilian ra makapampalasa' ra apui.

²¹Kaa' apui no kalo mokosolob ra ilo ondo' mapandai matoi ondo' mugar ra ralalom no, am kalo niayuk boo mampaliou ra akanon intor ra suruga' ondo' kaindalaman no maluoi lumiou koson ra ais.

²²Iou Tuhan, ralalom ru ngaangai' no ulun Muno sinauk Mu urumaton am matulai. Ilo kalo igondo' Mu liliani', kaa' masalok indanganon Mu ra ati-ati ayuk.