Read Timugon Murut KAPINTARAN RI SALOMO 3 Bible Online

KAPINTARAN RI SALOMO 3 - Timugon Murut bible

KAPINTARAN RI SALOMO 3

¹Kaa' ulun ondo' moonsoi sindungin ri Aki Kapuuno' am kalo malumpa' ru kaimbalaan.

²Pangkaraan ru ulun sasambungon matoi ilo, am patayan nilono karaan ra karaat.

³Inugaran nilono intor ritakau karaan ra kapusaan, kaa' ilo ralalom ru kaansayan.

⁴Kabalu' pana pagilayan ru ulun ra ilo no inimbolo', kaa' kalansanan maayo nilono ra kaayagan mantilayun.

⁵Kopongo inimbolo' sangkinolor, nakaalap ilo ra taak maayo, sabap ra i Aki Kapuuno' nangkinam ayuk risilo am napandayan ra ilo maaya' masauk ra maya' Riso.

⁶Nangkinam Io risilo koson ra mas ralalom ru apui ra rapuan, am mangapu boo risilo mogondo' ra taak simbalui ondo' mapabansuk ra guang Nano.

⁷Paat ri Aki Kapuuno' mangampin risilo, sinda nilono napabilak am monolob ra ulun malaat koson ra apui murarak giu' ra rami ru umo.

⁸Ulun moonsoi mamarinta ra ngaangai' bansa' am Tuhan masauk ra raja' nilo ra sabuoi-buoi no.

⁹Ulun ondo' mangintopot ri Aki Kapuuno' makarati' ra ngaangai' ralan ri Aki Kapuuno' no motopot. Ulun ondo' gumagaya' ra kaayagan ralalom ru togom ri Aki Kapuuno' sabap ra Io motogom am mataau guang ra ulun ondo' pinili' Nano.[1]

¹⁰Kaa ulun malaat ukumin, maaya' ra pangkaraan nilono, sabap ra giminuor ilo ra Tuhan am kalo mampalio ra atan ondo' motopot.[2]

¹¹Ulun ondo' kalo mampalio ra kapintaran am pangilaan makauma' ra kaayagan ondo' nototop ra kaimbalaan ra kolondo' kalansanan. Ngaangai' gogoton nilono kolondo' onong am ngaangai' naaguyan nilono kolondo' ampos.

¹²Andu' nilono kolondo' guang am anak nilono makalayau. Papag nilono maayag ra kolondo' barakat.

¹³Pakaansuk noyo ruandu' ondo' kalo maganak ondo' maayag ra kolondo' kalaatan. Paat ra Orou Pangakiman mokoowot ilo ra balos moonsoi.

¹⁴Paat ra orou raginio, ungkuyon ondo' inintalian pana aniin ra kaansukan, ginio ayuk amon giminagaya' ilo ra Ukum ri Musa am kalo mangatang ra kalaatan ra Tuhan. Sabap ra gagaya' nilono, mokoowot ilo ra taak moonsoi am intok moonsoi giu' ra inayanan ru Tuhan.

¹⁵Paliso ra moonsoi koson ra puun ondo' mangkawa' ra kawa' ondo' moonsoi kaga', am kapintaran koson ra bakat ondo' masalok mampaayag ra puun.

¹⁶Kaa' anak ondo' inanak intor ra sawa' kapoam pangkubayawan ra kalo iniou mokoowot ra patayan am kalo makasuku' io masukor.

¹⁷Kabalu' pana maawar painawo nilono, karaan ilo ra kalo maatang am urumaton paat ra ilo matutuo.

¹⁸Amon ru mataki' ilo matoi kolondo' kalansanan, am paat ra Orou Pangakiman kolondo' noyo mapakaansuk risilo.

¹⁹Anak ondo' inanak intor ra pangkubayawan kalo iniou masulungan ra sauk malaat.