Read Timugon Murut KAPINTARAN RI SALOMO 4 Bible Online

KAPINTARAN RI SALOMO 4 - Timugon Murut bible

KAPINTARAN RI SALOMO 4

¹Moonsoi poyo kolondo' papag ka kolondo' pangindangan. Pangindangan sungkaan ri Aki Kapuuno' am poyo ru ulun am karaan ra sabuoi-buoi no.

²Ulun ondo' mokoondo' pangindangan alapon ra tiluan moonsoi. Amon paliso no mairu', ulun moondom riso. Pangindangan makasugut ra sabuoi-buoi no am patulayon, am mingkual koson ra ulun namanang intor ra pagugulaan ondo' kolondo' kalaatan.

³Papag ru ulun malaat kolondo' ampos, iou pana ru masuang ilo. Sabap ra intor ra tuor ondo' kalo kopoyo, kalo mapanggol ra puun no am kalo malandom bakat nilono.

⁴Kabalu' pana ra raan-raan no tumuu' kaa' bayag no kalo mabuoi sabap ra bakat no kalo malandom. Mauyog ilo ru angin am gabaan ru bagiu' mapuor kaga'.

⁵Raan no masapi' ra kalo poyo ra paat nano; kawa' no kalo maansak am kolondo' onong.

⁶Paat ra Orou Pangakiman, anak sawa' masauk ra sasi' tayar ru kalaatan ru matuo nilo galama'.

⁷Koson pana raginio, ulun moonsoi makalinos kabalu' pana matoi ilo ra kalo poyo paat nilo.

⁸Ulun ondo' maawar painawo urumaton takau, kaa' sala' ka sabap ra suang ru bilor nilo ondo' masuang,

⁹sabap ra ulun ondo' maawar painawo, ra sotopot no iono ulun ondo' mapintar am maayag moonsoi.

¹⁰Sangulun ondo' iowon ri Aki Kapuuno' tagamin, am io pabandingon ra buoi ru lakat ayuk poyo naayag intor ra ulun ondo' makatula.

¹¹Io no alapon maa' raginio guang am taau nano kalo palayawon ra ruung am kalaatan,

¹²sabap ra ondo' moonsoi sumauk ra majapul sabap ra makaayaaya' ra malaat am saga' ru guang ondo' soosobol makajajou ra paliso ondo' moonsoi.

¹³Ra mataki' io makaalap ra kaansayan, am koon ragino nakaukop ra orou ondo' nabuoi.

¹⁴Sabap ra Tuhan naansayan ra paliso ru bayag nano, am intakio' No nangalap riso intor ra tana' ti ondo' malaat ti. Ulun ondo' nakakito kalo nakarati'. Kalo naratian nilo ra

¹⁵i Aki Kapuuno' motogom am makaasi' ra ulun pinili' Nano am manindung ra ulun ondo' motopot.

¹⁶Ulun moonsoi ondo' minatoi noyo manauyu' ra ulun malaat ondo' lakat poyo naayag. Ulun mamulok ondo' mataki' masauk ra matanda' manauyu' ra ulun malaat ondo' matutuo toojo.

¹⁷Ilo makakito ra patayan ru ulun mapintar, kaa' kalo makarati' ra inatangan ru Tuhan ra tayar nilo, am kua ra Tuhan mompororo' risilo.

¹⁸Ulun malaat mangiis ra patayan ru ulun mapintar, kaa' Tuhan manauyu' risilo.

¹⁹Amon ru matoi ilo, kalo lobongon ilo ra urumaton. Mulu' piboo raginio ra gino ngai' ru ulun minatoi asabin ilo koson ra sabuoi-buoi no. Patirin ilo ru Tuhan saboi makasayang kolondo' bolos. Koson ra baloi, uyogon ilo intor ra puun no am saukon ra malunsai. Maimbolo' ilo am lilianin ra mataki'.

²⁰Mabaya' ra tontol rumampil ilo ra Pangakiman maa' raginio tula-tula nilono untobon. Uwin ilo ru kalaatan nilo galama'.