Read Timugon Murut KAPINTARAN RI SALOMO 5 Bible Online

KAPINTARAN RI SALOMO 5 - Timugon Murut bible

KAPINTARAN RI SALOMO 5

¹Paat orou raginio ulun mabanis guang migor ra totopot mangintopot ra saang ru ulun ondo' nangimbolo' riso am magusun ra kapiratan nano.

²Mangimuag ilo makakito ra ulun mabanis guang no naayag, am monontol sabap ra malaa' kaga'.

³Ilo pana pansagulian guang ra pinamakuan nilo am magangus sabap magalabo, magindagu ilo ra rondo' am bokon,

⁴“Io noyo ulun ondo' kinuritan takali am inasaban takali ragili. Itakau ti ulun sasambungon sabap mangkara' ra bayag nano koson ra ulun mantuyang am patayan nano kalo urumaton.

⁵Ragino io nakasimpung ra gino ngai' ru anak-anak ri Aki Kapuuno' am intok nano ra nakaaya' ra ulun mangapasau guang.

⁶Itakau noyo ondo' nakalayau intor ra ralan ondo' motopot. Itakau kolondo' sinda mapaang ru katapatan am kalo igondo' namparakop ra sinda no.

⁷Gagawar ru painawo, itakau makauma' ra ralan-ralan makatula ondo' sumuku' ra kapusaan. Mansail takau ra tana' kaagisan ondo' kolondo' ralan no. Ralan-ralan ru Tuhan kalo natutunan takau.

⁸Lumimbau takau galama' am mindagu intor ra suang ru rapu' takau. Kaa' ragino atan ampos ru ginio ritakau?

⁹Ngaangai' no natatak koson ra babara', koson ra tanou ondo' ra napasingiu ayuk.

¹⁰“Rondo' parau ondo' masundoi sumasak ra kinulun ru raat kalo manatang ra babaya' am kolondo' sonor ra parau no ra igondo' pansail.

¹¹Sanginan susuit ondo' nansiab sumail ra gaun kalo manatang ra babaya' ra intok ondo' nansailan nano, sabap ra gaun ondo' mamaan piniruo no ra kabul ru kawo nano. Maribok io mansiab am kolondo' babaya' giu' ra intok nansailan ru susuit.

¹²Rondo' anak ru panah ondo' patimbakon tampilon ra tuma' mamiruo ra gaun. Kaa' gaun ondo' tayaron no sumaguli' mataki' masimpung, saboi ralan ondo' nansailan no kalo mapandayan ru ulun.

¹³Koson niayuk ra baal takati; bagu ayuk anakon, itakau kalio noyo. Kolondo' babaya' ru kaindanganan ondo' tatangon takau; napuso takau ru kalaatan takau galama'.”

¹⁴Kalansanan ru ulun malaat koson ra apol ondo' nasiab ru angin, koson ru puta' ru timug ru raat ondo' lumiot ra ralalom ru bagiu' mapuor kaga'. Kalansanan raginio koson ra lisun ondo' pinantutuliar ru angin kapoam koson ra pangkaraan ra tambului ondo' matong songorou ayuk.

¹⁵Kaa' sotopot no ulun mabanis guang maayag ra mantilayun. Sindungin ilo ru Tuhan am makaapu ra balos moonsoi intor Riso Ondo' Masawat Kaga'.

¹⁶Omporon ilo koson ra raja' am inanian ra karaun moonsoi toojo. Tuhan sumaung am manindung risilo ra kalindu' Nano ra maikang.

¹⁷Pampakayon No ilo ra kasaga' Nano toojo koson kaukapan ru pangayawan. Ngaangai' ru inangun Nano susubon No koson kinandoi mangayou mampakaala ra pantula'.

¹⁸Katimpakan masauk ra bayag ru basi' Nano am kapatasan ondo' mabanis masauk ra tupi' basi' Nano.

¹⁹Kapasawan iono perisai Nano ondo' kalo maalap kalaan,

²⁰am sangit Nano moporos masauk ra ilang Nano ondo' inasa'. Ngaangai' kaikangan ru tana' ti sinusub No gumula' ra ulun sasambungon ondo' manggal Riso.

²¹Pinana ru ganit am natuma' toojo, koson ra Tuhan tatanga' namanah ra gaun koson ra busur Nano.

²²Nabaya' ra sangit, pinapatir ru Tuhan rasam batu ra ulun malaat; raat am sungoi-sungoi nanggayo nampaliur risilo.

²³Malumpa' ilo ru bagiu' mapuor kaga' am pantutuliaron. Kalaatan mamuso ra titikop ru tana' ti am masuang pamarintaan maratu' sabap ra binaal malaat.