Read Timugon Murut KAPINTARAN RI SALOMO 6 Bible Online

KAPINTARAN RI SALOMO 6 - Timugon Murut bible

KAPINTARAN RI SALOMO 6

¹Akau raja'-raja' am akau mangunguasa' ra titikop ru tana' ti, rongogo' noyo sulabiton kutu am igigila' no saboi makarati'.

²Urioo' noyo, akau ondo' namarinta ra masuang ulun am mamanggo sabap ra masuang bansa' rumuku' ramuyun,

³sabap ra inapu min noyo kuasa' intor ra Tuhan Ondo' Masawat Kaga'. Mangimumui Io ra ngaangai' baalon min am magilong toojo ra ngaangai' atangon mino.

⁴Musiti' kau mapaugar ra pamarintaan ru Tuhan. Kaa' kalo mamarinta kau ra matimpok, kalo sumugut ra ukum am kalo mambaal ra kasagaan ri Aki Kapuuno'.

⁵Ginio ra pamakuan ramuyun mataki' ra bulingatin toojo ru Tuhan, sabap ra tayar ru mangunguasa', ukuman no maagat.

⁶Amon ru ulun ragana' mambaal ra kasalaan, mataki' ilo ampunon sabap ra guang makaasi'. Kaa' kasalaan ru mangunguasa' ukumin ra maagat.

⁷Tuhan ondo' manguasa' ra ngaangai' no kalo malaa' ra osoi ayuk am kalo mampalio ra pangkat ru ulun ra ati niayuk. Io nambaal ra ondo' maayo am ondo' boborok, am ngaangai' no alungin No ra mogogondo' ayuk pamakuan.

⁸Kaa ulun ondo' makakuasa' imumuyin no ra matanda'.

⁹Ginio ra ragu-ragu ragitio posoboyon ku ramuyun, ulun mangunguasa', maa' raginio migila' kau mampaugar ra matanda' am makainggalur ra kasalaan,

¹⁰sabap ra ulun ondo' mapasau guang mambaal ra ukum-ukum ondo' mapasau pabalaan ra mapasau. Ulun ondo' nasauk ra mapandai kaga' ralalom baal raginio saungon giu' ra Pangakiman ra tauli no.

¹¹Ginio ra kasaga' kano am koondom kano ra pangilaan kutu, am akau pana masauk ra ulun ondo' mapandai kaga'.

¹²Kapintaran makasinda ra mapaang am kalo mapandai moboot. Ulun ondo' monogom am maguyum riso matasu' makatuum riso.

¹³Kapintaran mataki' makimagulig ru ulun ondo' moondom riso.

¹⁴Ulun ondo' tumirong ra susuab ti koson maguyum ra kapintaran kalo pana kumantisuk, sabap ra makatuum ilo riso ra taluma' ru kulobon.

¹⁵Ulun ondo' mangurio ra kapintaran makaalap ra pangaratian matanda'. Ulun ondo' kalo maagui maguyum ra kapintaran mataki' makaliman luminos,

¹⁶sabap ra kapintaran galama' saliput-liput maguyum ra ulun maaya' mompolonggom riso. Kapintaran masaga' mintalang ra ulun ra ati pana intok nilo, am makatuum risilo ralalom moonong pangkaraan nilo.

¹⁷Kapintaran tumalimpuun paat ra ulun totopot makaguang migigila'; ulun ondo' makaguang masaga' koson migigila' monogom ra kapintaran.

¹⁸Monogom riso arati' no gumagaya' ra ukum-ukum nano, am gumagaya' ra ukum-ukum nano jamin ra kaayagan mantilayun.

¹⁹Kaayagan mantilayun mampalampit ra ulun am i Aki Kapuuno'.

²⁰Kasaga' ra kapintaran mampatampos ra ulun koson mamarinta.

²¹Ginio ra akau mangunguasa' ru bansa', amon ru masaga' kau ra maningganai am kuasa' mino, urumato' noyo kapintaran maa' raginio makapamarinta kau ra sabuoi-buoi no.

²²Tunungon ku atan ginio kapintaran no am ati intor no. Kalo bunion ku atan-atan. Ngai' ru tunung koson imumuyin kuno intor ra talimpuun am ngai' ru katapatan nano patunungon ku maa' raginio moonong ulun makapandai.

²³Marara' ku bunion ra ulun bokon, sabap ra paliso sumolon koson raginio manggal ra kapintaran.

²⁴Sumuang ulun mapintar, maya' boo kabayag poyo tana' ti. Raja' ondo' mapintar mangani' ra kaansayan ra mamagun nano.

²⁵Gino poyo apuo' noyo pangilaan kutu maa' raginio mokoonong ramuyun ra tauli no.