Read Timugon Murut KAPINTARAN RI SALOMO 7 Bible Online

KAPINTARAN RI SALOMO 7 - Timugon Murut bible

KAPINTARAN RI SALOMO 7

¹Koson ra ulun bokon aku pana ulun mapandai matoi, papag ru ulun kasaa' binaal intor ra tana'. Aku tininai' intor ra sayat ru sangulun ungkuyon ralalom nailian ra parulugan ru mansawo. Siam ngambulan aku nasauk ralalom tinai' ru ina' kuno.

³Aku inanak koson niayuk ra ulun kaindalaman am mamainawo nogondo' niayuk ra pamainawo ru ngaangai' ulun. Koson ra moonong ulun, bolos kasaa' ondo' pinorongog kuno ioginio bolos ru tangi'.

⁴Kinusib aku ra konoon am tinalaanak ra tinagaman toojo.

⁵Kolondo' raja' ondo' mokoondo' ra talimpuun ru kaayagan ondo' mansasala',

⁶ginio sabap ra ralan sumubol am mingkual ru kaayagan ioginio rondo' am nogondo' ayuk ra ngaangai' ulun.

⁷Aku pana makiasi' am aniin ra karatian; nakitaak aku am ambiluo ru kapintaran pasuangon ra ralalom ru guang kutu.

⁸Maansukan aku toojo raginio ka turungan ru raja' am karaun. Pogondoon ra kapintaran, rapu' karaan ku ra kolondo' logo.

⁹Busining ru balian ondo' mologo kalo mokogondo' riso; giu' ra saang nano ngaangai' ru mas ra tana' ti koson ayuk ra sogonggom agis, am pirok losok ayuk.

¹⁰Pangkaraan kuno riso mologo poyo ka kaligagan am bulos ra maindon. Masaga' aku poyo riso ka ngaangai' sinda, sabap ra kinapaang ru kapintaran kalo igondo' moboot.

¹¹Mabaya' ra kapintaran maalap ku ngai' rapu'; kapintaran maparatong ra kalangkayaan ra mauli' raki'.

¹²Maansukan aku mangapu ra ngaangai' raginio sabap ra kapintaran noyo ondo' manuyu' no. Kaa' kalo poyo nakatutun aku ra ngaangai' no intor riso.

¹³Mabaya' ra guang mabanis migigila' aku intor riso, am masaga' ku tatayaron ginio, am kinalangkaya' no kalo bunion ku.

¹⁴Kapintaran ioginio rapu' ondo' kalo mapandai makai'. Ulun ondo' mampakai no masauk ra rangan ri Aki Kapuuno', sabap ra i Aki Kapuuno' masaga' ra ampos ru kapintaran.

¹⁵Gama' ru i Aki Kapuuno' mapaindagu raki' ra pangaratian, am pangkaraan kuno maya' ra pataakon Nano raki', sabap i Aki Kapuuno' galama' maningganai ra ulun mapintar am mansawai ra kasalaan nilo,

¹⁶sabap ra itakau am ngaangai' ru pangkaraan, ragu am katasikan takau soroi ra kuasa' Nano.

¹⁷Io galama' mangani' raki' ra karatian ondo' motopot intor ra pinalulur baal ru tana' ti am ngaangai' ru kaikangan no,

¹⁸intor ra talimpuun, tatanga', am pupus ru orou, intor ra minsir mato ru orou, am bulintok ra mantalison,

¹⁹intor ra limpuong ru bilor am intok ru butitin-butitin,

²⁰intor ra paliso ru bibiag am kasaga' ru bibiag masangit, intor ra puor ru angin am palasan ru pangkaraan ru ulun, intor ra mansalinut tatanom am labung ru bakat nano ra makababas.

²¹Migigila' aku ra baal-baal ondo' natutunan noyo am poyo ondo' lakat poyo nakasibuni sabap ra ilaan ru kapintaran ondo' napaangun ra ngaangai' no.

²²Ambiluo ru kapintaran no makatutun toojo am mapasau; io rondo' ayuk kaa' masuang ralan nano mambala' ra inan nano. Io mononok am mugar ra ati ayuk angayan, mainsaawan, mapasau, masinda, am kalo maalap kalunsai. Io matasik am masaga' ra moonsoi.

²³Io kalo maalap kaala, io mataau guang am makaasi' ra ulun. Io malansanan, kalo makulau guang, am kalo mangkara' ra mapagon. Magilong am manguasa' io ra ngaangai' no am niayuk mangurio toojo ra ngaangai' ambiluo mapintar am mapasau, am poyo ondo' mononok toojo.

²⁴Kapintaran matasu' poyo mugar ka intor ra ngaangai' ugaron, sabap ra mapasau, io manubol ra ngaangai' no.

²⁵Kapintaran ioginio pamainawaan ru kaikangan ri Aki Kapuuno', sinda mapasau intor ra katulayan ru Io Ondo' Maayo Kaga' Kuasa'. Kaa' kolondo' rondo' pana ondo' makajamol makasubo ra ralalom no,

²⁶sabap ra kapintaran ioginio masilau ru sinda mantilayun am saramin moonsoi tayar ru baal am kaansayan ri Aki Kapuuno'.

²⁷Misasangulun pana, kapintaran makabaal ra ngaangai' no. Kabalu' pana kapintaran galama' kalo makulau, kapintaran manalimbagu ra ngaangai' no. Sayat-sayat boo kapintaran sumubol ra ralalom ru guang ru ulun mangapasau guang am mampasauk risilo ra nabi am rangan ri Aki Kapuuno'.

²⁸Kolondo' ulun ondo' tagamin poyo ru Tuhan intor ra ulun ondo' bayag no natuba' ra kapintaran,

²⁹sabap ra kapintaran moonsoi toojo ka mato ru orou am lulur ru butitin-butitin. Kapintaran moonsoi poyo ka matawang,

³⁰sabap ra matawang sumuali ra molondom, kaa' kapintaran kalo makuasa' ru kalaatan.