Read Timugon Murut KAPINTARAN RI SALOMO 8 Bible Online

KAPINTARAN RI SALOMO 8 - Timugon Murut bible

KAPINTARAN RI SALOMO 8

¹Ikang nano natitip ra titikop ru tana' ti am ngaangai' no inatur no koonsoyo'.

²Monogom aku ra kapintaran am naguyum riso intor ra aku mamulok. Tagamin ku kinoonsoi nano am moogot pasaukon ra ambai kuno.

³Mamanggo kapintaran ra intor nali ondo' matulai sabap ra makasimpung ri Aki Kapuuno', am tagamin ru Tuhan ondo' nanguasa' ra ngaangai' no.

⁴Nakatutun kapintaran ra baal-baal inopot ri Aki Kapuuno' am maya' mangaru' ra moonong angunon ru Tuhan.

⁵Moonong ulun makaguang manimung ra rapu' ralalom ru bayag nano. Kaa' kolondo' ondo' mologo poyo ka kapintaran ondo' mangandoi ra ngaangai' no.

⁶Kapintaran takau mokoonong toojo. Kaa' kolondo' moonsoi poyo ka kapintaran ondo' mambaal ra ngaangai' ondo' mokoondo'.

⁷Amon ru sangulun monogom ra katimpakan, am ngaangai' boo ru kaindanganan no ampos ru kapintaran ioginio: katimpakan am baani, katagaman galama' am karatian. Ginio noyo ondo' mokoonong toojo ralalom ru bayag ti.

⁸Ulun ondo' gumogot ra kapandayan ra masuang mokoowot io, sabap ra kapintaran makapandai ra ondo' nakapagulu am mangkinam ra ondo' matong, mapatutun ra sulabit ru ulun am manaam ra pangkuatan, makapandai ra kaimuagan-kaimuagan ondo' baalon ri Aki Kapuuno', am atan kosonon ru sejarah koson masalangai' makatanou.

⁹Ginio ra namatas aku koson saukon io ra rangan ru bayag kuno, sabap ra makapandai aku ra kapintaran maminson am mapabansuk raki' ralalom ru kaimbalaan am kapaganan.

¹⁰Ampos ru kapintaran, ulun mangurumat raki' am kalansanan ru ulun matutuo kabalu' pana aku lakat ayuk poyo mamulok.

¹¹Kamotopot pamaguangan kuno malandom toojo ralalom mangani' ra kapatasan am mokosolong ngaangai' tingganai.

¹²Amon ru mongkoror aku, maginaa ilo; amon ru mindagu aku, mangkirongog ilo. Amon ru mindagu aku kaawaron, mokosolong ilo ra mangkirongog.

¹³Sabap ru ampos ru kapintaran, makaalap aku ra kaayagan mantilayun; karaan aku ra sabuoi-buoi no ru ilo ondo' sumunu' raki'.

¹⁴Mamarinta aku ra bansa'-bansa', am kuasaan ku ilo.

¹⁵Ulun-ulun mamparuung ondo' makalalaa' monontol amon ru mokorongog ra inggalan kuno. Mauligan aku koson ra raja' ondo' moonsoi am sangulun saujor ondo' mapanggol am baani.

¹⁶Amon ru muli' aku, mangani' kapintaran raki' ra kalinasan, sabap ra bayag masimpung riso kalo mangulig ra kapaganan kapoam mangiluk guang, kaa' kaansukan am kaansayan.

¹⁷Ngaangai' no karaan ku am undasain ku. Maayag lumampit ra kapintaran arati' no mokoowot ra kaayagan mantilayun.

¹⁸Monogom riso mangani' ra kaansayan motopot, am mambaal ra kandoi nano mambaal ra ulun lumangkaya'. Sumimpung riso mangani' ra karatian am mindagu riso sumauk ra ulun urumaton kaga'. Aku pana nangkara' toojo ra io saukon ra rangan ru bayag kuno.

¹⁹Andang intor ra boborok moonsoi inan kuno am guang kuno moonsoi.

²⁰Kapoam motopot poyo, sabap ra moonsoi aku, aku inanak ra inan maligag.

²¹Kaa matutunan ku ra aku kalo mokoowot ra kapintaran amon ru kalo tinaakan ri Aki Kapuuno' raki'. Nakapandai ra osoi nangani' ra kapintaran, ginio pana tatandu' ru karatian. Aku pana topot-topot makiasi' am makitaak ri Aki Kapuuno':