Read Timugon Murut KAPINTARAN RI SALOMO 9 Bible Online

KAPINTARAN RI SALOMO 9 - Timugon Murut bible

KAPINTARAN RI SALOMO 9

¹Iou i Aki Kapuuno' ru kinamatuaan kuno, Tuhan ondo' makaasi', ra ragu Muno ngaangai' no sinauk Muno.

²Mabaya' ra kapintaran Muno sinauk Mu ulun koson manguasa' ra ngaangai' ondo' maayag ondo' binaal Muno,

³koson mamarinta ra tana' ti ra matimpok am mapasau, am mangakim riso ra kabanisan ru guang.

⁴Anii' aku no ra kapintaran ondo' soroi ra sapapa' ru intok turungan Muno am anii' aku no ra intok ra gino ngai' ru anak-anak Muno.

⁵Aku ti ulipon Muno, anak intor ra ulipon Muno, ulun malawo am mariwa' painawo. Kolondo' naratian kuno ra Ukum ri Musa am undang-undang.

⁶Mulu' piboo amon ru mokoondo' sangulun matanda', io karaan kolondo' onong amon kolondo' ra kapintaran ondo' intor Rirun.

⁷Okou noyo nampili' raki' masauk ra raja' ru ulun Muno koson mangakim ra anak-anak Muno.

⁸Sinusub Mu aku mambaal Rirun ra baloi giu' ra bulur Muno ondo' mapasau, am rondo' altar giu' ra bandar inayanan Muno, rondo' tiniluan intor ra kim mapasau ondo' pinongo Mu noyo intor ra talimpuun.

⁹Kapintaran mabaya' Rirun am makaulig ra baalon Muno; kapintaran matong paat Okou namingkal ra tana' ti. Kapintaran nakatutun ra atan ondo' kasagaan Muno, atan motopot am maaya' ra susuban Muno.

¹⁰Kasaga' noyo mangator riso intor ra suruga' Muno ondo' mapasau. Patuuno' noyo kapintaran intor intok turungan Muno ondo' matulai maa' raginio kapintaran mingkotog mabaya' raki', am makatutun aku ra atan kasagaan Muno.

¹¹Sabap no ra kapintaran makatutun am makarati' ra ngaangai' no, maningganai io raki' ra mapintar ralalom ru ngaangai' paliso kuno, am katulayan nano manindung raki'.

¹²Aku pana maaya' manturung ra intok turungan ri ama' kuno am mamarinta ra ulun Muno ra matimpok, am ngaangai' baalon kuno apuon.

¹³Osoi kia makapandai ra inatangan am kasagaan ri Aki Kapuuno'?

¹⁴Pangkaraan ru ulun ondo' kalo maaru'-aru' kolondo' arati' am pamaguangan takau kalo kalansanan,

¹⁵sabap no ra inan takau ondo' mapandai matoi masauk ra simbagat ru painawo, am inan takau ondo' binaal intor ra tana' makabagat ra ngaangai' pangkaraan moonsoi.

¹⁶Makaraan takau ayuk atan mokoondo' ra tana' ti. Nabaya' ra mapagon toojo itakau migigila' ra baal-baal ra mamaar. Osoi nua' boo makapangundasa' ra baal-baal giu' ra suruga'?

¹⁷Kolondo' makaulig ra kasagaan Muno amon ru kalo mangani' Kou ra kapintaran am mapatuun ra Ambiluo Muno ondo' matulai no riso.

¹⁸Koon raginio noyo ra Okou maningganai ra ralan kaayagan ru ulun ra tana' ti. Ilo ilaan ra atan ondo' kasagaan Muno am bayagon ru kapintaran.