Read Timugon Murut SIRAK 12 Bible Online

SIRAK 12 - Timugon Murut bible

SIRAK 12

¹Pai' koonsoi ra ulun kalo nauligan Amon mambaal kou ra moonsoi, imansai' noyo koson ri osoi baalon raginio, am okou pana makaalap ra balos moonsoi.

²Koonsoi noyo ra ulun ondo' motopot, okou pana balasin; amon sala' ka intor risilo, maaru' intor ra Tuhan Ondo' Masawat Kaga'.

³Ulun ondo' marayus mambaal ra malaat kalo makaapu ra moonsoi, nogondo' baal no ra ulun kalo masaga' mangani'.

⁴Pangani' no ra ulun ondo' motopot, kaa' pai' indangano' ulun ondo' makatula.

⁵Pambaal no ra ondo' moonsoi ra ulun ondo' minggana' guang, kaa' pai' anii' ra atan-atan ra ulun malaat. Pai' anii' ilo ra akanon, maa' raginio ilo kalo maikang poyo intor rirun. Koson raginio baal no sabap ra ngaangai' kinoonsoi muno risilo balasin nilo ra kalaatan saboi induo ruli'.

⁶I Aki Kapuuno' Ondo' Masawat Kaga' pana masisang ra ulun ondo' makatula, am mangukum Io risilo.

⁷Ginio ra anii' noyo ulun moonsoi, kaa' pai' indangano' ulun ondo' makatula. Rangan motopot am rangan kalo motopot

⁸Paat ra kaansayan, mapagon manutun osoi rangan ondo' motopot, kaa' paat ra kapaganan matasu' mauligan pantula'.

⁹Paat sasangulun makakaansayan, pantula'-pantula' nano mangaruol guang; kaa' paat io makakapaganan, rangan-rangan nano pana mangiruan riso.

¹⁰Pai' lingon pangintopot ra pantula', sabap ra kalaatan nilo mapalunsai koson ra togol.

¹¹Kabalu' pana minggana' guang nilo am mugar tumangkokoong, ilalain toojo ilo. Pamakuan risilo koson ra sangulun mangisas ra galas logam; pupus no mairu' niayuk togol no.

¹²Sangulun pantula' pai' anii' ra intok ra sapapa' muno, maagu no insion kou am talisonon intok muno. Pai' polosoo' io manturung ra pamiris muno; maagu no mamulir io rirun intor ra intok panturungan maatang muno. Pupus no okou pana mangiou ra katapatan ru ragu-ragu kutu am pansagulian guang amon makara' bilin kutu.

¹³Kolondo' sangulun pana makaasi' amon sangulun babalian ru kukuo kapoam mampakaup ra bibiag mangasangit tindukon.

¹⁴Koson niayuk ra kolondo' makaasi' paat ra okou lumatok ra ulun ondo' makatula am makaaya' ra kalaatan nano.

¹⁵Koson ra buoi mayan io sumimpung rirun. Kaa' amon okou makakapaganan, pangkubayawan nano mapupusan boo.

¹⁶Sangulun pantula' mindagu maamis, kaa' ralalom ru guang nano mangatang koson mamparatu' rirun. Babaalon no maya' kalumpus, kaa' amon mokoondo' ra kaluagan, mampatoi io rirun.

¹⁷Amon malumpa' kou ra kalungganangan, makito mu io maginaa, babaalon no masaga' mangindangan; kabalu' pana nakatampos io mangkayang ra tunob muno maa' raginio maratu' kou.

¹⁸Bulos nano malui am maansukan io ra kapaganan muno; pisik-pisik io am mapatanou ra ragu magabau intor rirun.