Read Timugon Murut SIRAK 13 Bible Online

SIRAK 13 - Timugon Murut bible

SIRAK 13

¹Imumui ru ulun langkaya' ondo' malilimbau Ulun ondo' mangambong ra tiir makasait, am ulun ondo' lumatok ra ulun malilimbau masauk koson risilo.

²Pai' kayango' ondo' maagat kaga' rirun, am pai' simpung ra ulun ondo' langkaya' poyo am makakuasa' poyo intor rirun. Paliuk ru tana' pai' paulio' mamaar ra paliuk ru basi', sabap amon makapagingku', maaru' paliuk ru tana' no mapilang.

³Ulun langkaya' mambaal ra kalo matimpok, kaa' lakat poyo magasab. Sangulun musikin naimbolo', kaa' lakat poyo musiti' makimaap.

⁴Amon okou mokoonong, okou pakayon ru ulun langkaya'; kaa' amon okou makiindangan risilo, mangiruan ilo rirun.

⁵Amon okou makarapu', ulun langkaya' mayan simpung rirun am mangingkaut ra kalangkayaan muno ra kalo mapirot galama'.

⁶Amon sasangulun langkaya' makiindangan rirun, jingit-jingit io mampagamis rirun. Ra mantaligamis io mangkuot, “Atan kitaakon muno?”

⁷Mamasug io rirun ra akanon saboi okou manangguang. Pupus no, mopongo kou gaawin induo kapoam kaintalu, magasab io rirun. Tauli no, paat ra okou makatuum riso, kalo masaga' io makaulig rirun am sailin kou ak boo.

⁸Ilalai', pai' saboi' ra okou ruungon am asabin sabap ra sambung muno. Pai' pangintopot ra ulun mangaayo

⁹Amon okou kimaitin mongoi ra baloi ru sangulun ondo' makakuasa', musiti' mapandai kou mampaguang. Okou pana masalok kimaitin no.

¹⁰Pai' antal toojo maa' raginio okou kalo juulin, kaa' pai' niayuk inggalur toojo, maagu no okou lilianin no.

¹¹Pai' karaa' ra okou nogondo' ra ulun ondo' makakuasa' no. Pai' niayuk pangintopot ra ngai' ru ragu nano, sabap ra masuang ragu nano masaga' mangkinam rirun am jingit nano mangambi' rirun.

¹²Mapuka' toojo ulun ondo' kalo mapauli ra opoton muno; io kalo manangguang mamilat rirun kapoam mangaput rirun.

¹³Paulio' noyo opoton muno ra ralalom ru guang am ilalai', sabap ra mugar kou ra intok ondo' makalalaa'.[13]

¹⁴Togom no ra Tuhan sabuoi ru bayag muno am pakitaak no Riso maa' raginio mangindangan Io rirun. Latok no ra ulun ondo' pogondo'

¹⁵Moonong ilo ondo' maayag masaga' toojo ra salinut nano am ulun masaga' ra pogondo' risilo.

¹⁶Koson ra tambiag masisimpung salinut nano, koon niayuk ra ulun mangkukubayau ra ulun ondo' koson risilo.

¹⁷Koson ra taani kalo kumubayau ra anak ru domba, koon niayuk ra ulun ondo' makatula kalo kumubayau ra ulun motopot.

¹⁸Uku' ru kataunan kalo mokopobonsoi ra uku' makaup; koon niayuk ra ulun langkaya' kalo mokopobonsoi ra ulun musikin.

¹⁹Kaladai masigo saamon ru singa' giu' ra tana' makasakot; koon niayuk ra ulun musikin ingkautin ru ulun langkaya'.

²⁰Minggana' guang karaan ra kauyuan ru ulun masumbung; koon niayuk ra musikin karaan kauyuan ru ulun langkaya'.

²¹Amon sangulun langkaya' makasaru, sungkaan ru rangan-rangan nano. Kaa' amon sangulun musikin maratu', io no poyo tunobon ru rangan-rangan nano.

²²Amon sangulun langkaya' masala', masuang manaung riso. Amon mindagu io ra jajajou, ragu-ragu nano intopoton. Kaa' amon sangulun musikin masala', lulutaan io. Mulu' poyo amon ragu-ragu nano ra mapintar, kalo rongogon.

²³Amon sangulun langkaya' mindagu, ngaangai' ru ulun mongkoror am mongompor riso koson ra sawat ru gaun. Kaa' amon sangulun musikin mindagu, moonong ulun mangkuot, “Osoi io?” Amon monontol io, iison io saboi kalo boo makaindagu.

²⁴Langkaya' no moonsoi, ginio ak ra kalo moowot ra ralan ondo' makatula. Kaa' musikin karaan kalo moonsoi ru ulun malaat.

²⁵Suang ru guang ru ulun mapulanuan intor ra bulos ondo' malumpus kapoam maansukan.

²⁶Amon maansukan guang, bulos no niayuk mapulanuan ra maansukan. Kaa' mambaal ra pangabigan piroton ra mingkotog am pamaguangan ondo' masuang.