Read Timugon Murut SIRAK 14 Bible Online

SIRAK 14 - Timugon Murut bible

SIRAK 14

¹Kaansukan ru ulun ondo' kolondo' sala Pakaansuk noyo sangulun ondo' kalo mindagu ra mambanyou, sabap ra io kalo malaa' ra mapagon sabap ru tula nano.

²Pakaansuk noyo sangulun ondo' kalo sinonsol ru guang nano am kalo igondo' nairuan ra kalansanan. Sumolon am makalit

³Kalo sama' amon sangulun makalit masauk ra langkaya'. Atan onong ru rapu' ra ulun ondo' makalit toojo?

⁴Osoi ak mangumung ra rapu' saboi mampalubat ra inan galama', sotopot no ulun raginio mampalulur ra kalangkayaan koson ra ulun ra bokon. Koson raginio baal no sabap kalangkayaan muno pakayon ru ulun bokon koson maayag ra matasu'.

⁵Atan koson sangulun mataau ra ulun bokon amon maikal-ikal io ra inan galama'? Io noyo kalo makasia' ra rapu' nano galama'.

⁶Osoi ondo' maulas toojo intor ra sangulun ondo' makalit ra inan nano galama'? Ginio noyo ukuman ra tayar ru kalaatan nano.

⁷Mulu' poyo amon io mambaal ra moonsoi, baal raginio binaal kalo siningon. Buoi kabuoi kalit nano makito niayuk.

⁸Ulun ondo' sumolon ioginio sangulun malaat; ilo mikakalingou am mataman ra ulun ra bokon.

⁹Sangulun ondo' mampaluung kalo igondo' majala' ra linonggom nano. Mampaluung[14] mambaal ra ulun no makasalibuor gumorok.

¹⁰Sangulun makalit magayai toojo, saboi kalo maukop akanon giu' ra mija' nano. Pamakuan ra kalangkayaan ra matanda'

¹¹Anak kuno, ginio ayuk katanggangan muno alungi' noyo inan muno bonsoi-bonsoi, kaa' pagibit niayuk ra pataakon ondo' sama' ra Tuhan.

¹²Karaa' noyo ra rondo' orou okou matoi am okou kalo balain sanggilan orou no.

¹³Ra kalo poyo nasaboi orou no musiti' kou mambaal ra moonsoi ra rangan-rangan muno, am anii' ilo maya' ra katanggangan muno.

¹⁴Pai' impayi' katasuan ondo' raino am pai' oroto' kasagaan ondo' moonsoi,

¹⁵sabap ra ngaangai' ampos ru kandoi muno matatang mu am ampos ru bagui muno tayaron ra ulun bokon.

¹⁶Ginio ra musiti' kou mangani', mangapu, am mamamaan, sabap ra intok ru ulun namagatoi kolondo' boo masiaan.

¹⁷Ulun masauk ra lairon koson ra saputul bayang am sumugut ra inaru' mantilayun, itakau ngai' musiti' matoi.

¹⁸Koson ra puun ru tataun magana', mokoondo' raun matutu' am mokoondo' raun ondo' tumuu', koon niayuk ra ulun: rondo' no matoi ondo' bokon anakon.

¹⁹Ngaangai' binaal ru ulun maapu am mapuso mabaya' ra nambaal no. Kaansukan ru ulun ondo' mangilou ra kapintaran

²⁰Pakaansuk noyo ulun ondo' mangurio ra kapintaran am mangkara' ra karatian nilo.

²¹Ulun ondo' mangkara' ra ralan-ralan ru kapintaran niayuk tumutun ra inopot-inopot nano.

²²Ilowo' noyo kapintaran koson sangulun mampalula' am ampangi' noyo kapintaran giu' ra ralan-ralan nano.

²³Asilo' noyo ra gigimpalan-gigimpalan no am rongogo' noyo giu' ra kulobon nano.

²⁴Pangkim noyo ra kamaaro' ra baloi nano,

²⁵am okou pana makaayanan ondo' moonsoi.

²⁶Paayano' noyo anak-anak muno ralalom sindungan nano. Kaayag noyo ra kaansayan ralalom sindungan nano am ayan no ralalom katulayan nano, nakasindung intor ra orou malasu'.