Read Timugon Murut SIRAK 15 Bible Online

SIRAK 15 - Timugon Murut bible

SIRAK 15

¹Pambalos ra katimpakan Sangulun ondo' malaa' ra Tuhan mampakito riso ralalom ru baalon nano. Ulun ondo' gumagaya' ra Taurat ru Tuhan mokoowot ra kapintaran.

²Kapintaran manguma' rirun ra koson ra sangulun ina' kapoam ulun inuot ondo' lakat poyo ralaa.

³Nangani' io rirun ra pangaratian koson ra akanon am kapintaran koson ra inumon.

⁴Ulun ondo' sumandig riso kalo maratu' am ulun ondo' mangintopot riso kalo mauyu'.

⁵Okou sinauk ra urumaton poyo intor ra rangan-rangan muno am okou inanian ra ragu-ragu ondo' motopot paat okou mindagu ra saang ru masuang ulun.

⁶Makatuum kou ra kaansayan am kaansukan ondo' motopot am inggalan muno karaan ra sabuoi-buoi no.

⁷Ulun sasambungon kalo mokoowot riso am ulun makatula kalo makakito riso.

⁸Kapintaran no maalur intor ra ulun malilimbau am kalo nakara' ru ulun ondo' masaga' magabau.

⁹Rimbai-rimbai pangamparan kalo sama' rimbayon ru ulun makatula, sabap rimbai-rimbai no sala' ka intor ra Tuhan.

¹⁰Rimbai pangamparan ondo' motopot ioginio ragu kapintaran am intor ra Tuhan galama'. Kasagaan lumabus

¹¹Pai' sonsolo' Tuhan sabap tula muno am pai' baalo' ondo' kasisangan Nano.

¹²Pai' indagu ra Tuhan napalayau rirun, sabap ra Io kalo gumogot makiindangan ra ulun makatula.

¹³Masisang Tuhan ra ngaangai' binaal ra malaat, am ulun ondo' malaa' ra Tuhan niayuk kalo mabunduk ra binaal malaat.

¹⁴Paat Tuhan nambaal ra ulun ra talimpuun i, nangani' Io risilo ra kuasa' koson mangalap ra kapatasan.

¹⁵Amon masaga' kou, maalap mu kagagaya' susuban-susuban ru Tuhan. Makapampili' kou ra gumagaya' Riso kapoam kalo.

¹⁶Noposoroi Tuhan ra apui am timug ra saang muno. Alapo' ayuk ati kasaga' muno.

¹⁷Maayag am matoi soroi ra ulun. Atan pilion nilo pataakin risilo.

¹⁸Maayo noyo kuasa' am kapintaran ru Tuhan, am Io makakito ra ngaangai' no.

¹⁹Makapandai Io ra ngaangai' baalon ru ulun am magilong ra ulun ondo' motopot.

²⁰Kalo manusub Io ra ulun masauk ra malaat am kalo mangani' ra osoi-osoi ak mambaal ra tula.