Read Timugon Murut SIRAK 16 Bible Online

SIRAK 16 - Timugon Murut bible

SIRAK 16

¹Mangukum i Aki Kapuuno' ra ulun ondo' makatula Pai' kasaga' masuang anak ra kalo matanda' am pai' pakaansuk sabap anak ra mapuka'.

²Masuang pana anak muno, pai' pamanggo ra suang no amon ru kalo malaa' ilo ra Tuhan.

³Pai' kalansan ra umur nilo ra maawar, am pai' kalansan ra anak masuang. Moonsoi poyo mokoondo' sangulun anak ka saribu,[15] am moonsoi poyo matoi ra kolondo' anak ka makaanak ondo' mapuka'.

⁴Sabap no ra sangulun ondo' mapintar, ulun ru bandar rumuang ra masuang, kaa' bansa' ondo' mapuka' makai' kaluus.

⁵Baal koson raginio masalok makito kuno, mulu' poyo ra baal ondo' igondo' jojok poyo morongog kuno.

⁶Apui manimbula' ra tatanga' ru tinimungan ru ulun ondo' makatula am sangit ru Tuhan nasimbulukan ra bansa' ondo' kalo gumagaya'.

⁷Galing i Tuhan kalo nangampun ra ngaangai' maayo ulun ondo' lumansan ra ikang nilo galama' am ondo' manggal Riso.

⁸Masisang Io ra ulun malilimbau ondo' maayag ra rondo' bandar ri Lot am Io kalo makaasi' risilo.

⁹Bansa' ondo' makatula no kalo tinagaman No, kaa' luuson No sabap ra tula nilo.

¹⁰Koson niayuk ra nasip ru 600,000 ngaulun ralalom pangkiralanan giu' ra tana' kaagisan ondo' bambalingatan timinimung koson gumuor.

¹¹Amon mokoondo' sangulun ayuk bambalingatan, rondo' kaimuagan amon io makalabus intor ra ukuman. Maayo guang makaasi' ru Tuhan kaa' makasangit niayuk. Makakuasa' Io mangampun, kaa' niayuk mapalumpa' ra sangit Nano.

¹²Maayo kaga' guang makaasi' ru Tuhan, kaa' ukuman Nano pana maagat toojo. Mangakim Io ra ulun sama' ra binaal nilo.

¹³Ulun makatula am kuliamos ra tinakou nilo kalo makalabus, ondo' ulun mapasau guang ondo' mokoorot kalo sindualin.

¹⁴Moonong ulun ondo' mapasau guang mangapu ra ayup nali[16] am sigagama' mangapu ra sama' ra binaal nano.[17] Pambalos no musiti' matong

¹⁷Pai' indagu, “Mansibuni Aku intor ra Tuhan. Giu' ra rasawat no kolondo' sangulun mangkara' raki'. Aku kalo mauligan ra susuang ru ulun. Aku kolondo' arati' ralalom ru binaal ondo' kolondo' polos ti.”

¹⁸Paat ra Tuhan matong, ngaangai' mauyog: tana' am raat ondo' malangka' ra ragana' no, limbowon am intok malangka' giu' ra rasawat no.

¹⁹Gunung-gunung mauyog am lonor-lonor ru tana' monontol paat ilain ru Tuhan.

²⁰Kaa' ginio ngaangai' kalo nakara' ru ulun am kolondo' nampalio ra ralan-ralan ru Tuhan.

²¹Kasuangan binaal ru Tuhan nasibuni koson ra bagiu' ondo' kalo makito ru ulun.

²²“Osoi masaga' mampatanou ra binaal-binaal ru Tuhan ondo' matimpok am osoi lakat maginaa Riso? Koson raginio baal no sabap mototoi kaga' Tuhan mambaal atan ondo' binantu' Nano.”

²³Ginio noyo guang ru ulun ondo' maningka' napandayan no, sasambungon am nakalayau. Kapintaran ri Aki Kapuuno' ralalom binaal Nano

²⁴Anak kuno, rongogo' noyo am lioo' noyo ragu-ragu kutu maa' raginio okou mokoowot ra kapandayan.

²⁵Mampasuku' aku ra pangilaan ra masusui am kapandayan ra matuyu'.

²⁶Paat ra talimpuun i, i Aki Kapuuno' nambaal ra ngaangai' no[18] am Io mangaru' ra moonong intok no.

²⁷Ngaangai' binaal inaru' No koson sabuoi-buoi no, am koson moonong ilo ondo' maayag am papag no inaru' wilayah kinuasa' no. Kolondo' naitilan am kolondo' naagui kapoam liminonggo' ra nangandoi.

²⁸Ondo' rondo' kalo mampajajal ra bokon am kolondo' igondo' minanggal ra susuban ru Tuhan.

²⁹Kabaal ngaangai' no, Tuhan nampulolou ra tana' ti am nanuang ra ngaangai' ondo' moonsoi.

³⁰Io nonotop ra ralimbou ru tana' ti ra ngaangai' salinut ru ilo ondo' maayag. Ngaangai' nilo ondo' maayag iono mapandai matoi am musiti' sumaguli' masauk ra tana'.