Read Timugon Murut SIRAK 17 Bible Online

SIRAK 17 - Timugon Murut bible

SIRAK 17

¹Kopongo raginio Tuhan nambaal ra ulun intor ra tana' am nanusub risilo sumaguli' masauk ra tana'.

²Orou-orou ru bayag nilo inanian ra polos, kaa' ilo inanian ra kuasa' ra ngaangai' ra tana' ti.

³Nambaal Io risilo pinogondo' Riso galama' am nangani' risilo ra kaikangan Nano galama'.

⁴Nambaal Tuhan risilo kalaanin ru ngaangai' nilo ondo' maayag am nangani' risilo ra kuasa' ra ngaangai' susuit am bibiag ra bokon no.[19]

⁶Nangani' Io risilo ra rila', mato am talingo nabaya' ra kapintaran koson mangkara'.

⁷Nangani' Io risilo ra kapandayan am pangaratian, am manulu' risilo ati ondo' moonsoi am ati ondo' malaat.

⁸Mampasasar Tuhan ra pangaratian Nano ra ralalom ru guang nilo maa' raginio makakito ilo ra kandoi Nano ondo' matulai.[20]

¹⁰Ilo pana mongompor ra inggalan Nano ondo' matulai am mapatanou ra binaal Nano ondo' matulai.

¹¹Nangani' Tuhan risilo ra kapandayan am nangani' risilo ra ukum koson panuluan ru kaayagan.

¹²Nambaal Io ra nabantuan mantilayun risilo am nambala' ra kapatasan Nano risilo.

¹³Nakakito ilo ra katulayan Nano ondo' matulai am nokorongog ra bolos Nano ondo' matulai.

¹⁴Nampakara' Io risilo maa' raginio kalo mambaal ra malaat, am sigagama' ilaan atan koson pamakuan ra ulun bokon. Tuhan noyo akim

¹⁵Masalok Tuhan makapandai ra paliso ru ulun; kalo lair makasibuni intor Riso.[21]

¹⁶Intor boborok ilo masaga' ra kalaatan; guang nilo mokotog koson ra batu, am ilo kalo makakulau raginio masauk ra ulun poyo toojo.

¹⁷Nantayar-tayar Io ra bansa'-bansa' ra titikop ru tana' ti. Moonong bansa' inanian No sangulun mangunguasa', kaa' Israil iono longgom ru Tuhan galama'.[22]

¹⁹Masalok Tuhan mangurio ra kandoi ru ulun. Ra tayar Nano ngaangai' ondo' baalon nilo matalinuan koson ra matawang.

²⁰Kolondo' kalaatan ru ulun ondo' masibuni ra tayar ru Tuhan; ngaangai' tula mapandayan No.[23]

²²Indangan ondo' tinaakan takau ra ulun musikin soroi ra Tuhan koson ra sinsing meterai. Pangimayaan ra togom ru ulun alungin ru Tuhan koson unor ru mato Nano.

²³Tauli no Tuhan mambalos ra ulun; sigagama' balasin No.

²⁴Ulun ondo' pansagulian guang iowon sumaguli' Riso am ulun ondo' mariwa' guang aniin No ra kaansukan. Piau koson tumalikur intor ra tula

²⁵Tatango' noyo tula muno am ratong no ra Tuhan. Pakiasi' no ra saang Nano am pai' rayus mambaal ra kalaatan.

²⁶Saguli' no ra Tuhan Ondo' Masawat Kaga' am pai' noyo boo pambaal ra tula. Musiti' topot-topot masisang ra kalaatan.

²⁷Ulun maayag maringkuanang ra Tuhan. Kaa' intok ru ulun matoi osoi kia makaparimbai mongompor Riso Ondo' Masawat Kaga'?

²⁸Ulun ondo' maayag am maligag mokoompor ra Tuhan. Kaa' ulun ondo' minatoi kolondo' boo; liminonggo' ilo noyo maringkuanang.

²⁹Mapara' kia gayo ru guang makaasi' ru Tuhan am mangampun ra ulun ondo' sumaguli' Riso.

³⁰Kaa' ulun kalo noyo mokolonggom ra ngaangai' no sabap ra ilo ondo' maayag ondo' mapandai matoi.[24]

³¹Kolondo' mapaang poyo intor ra mato ru orou, kaa' sinda nano pana masauk majuut. Mulu' poyo ra ulun mapandai matoi ondo' mangkara' ayuk ra malaat.

³²Tuhan makakito ra ngaangai' butitin giu' ra limbowon, kaa' ulun sait am kaau ayuk.