Read Timugon Murut SIRAK 18 Bible Online

SIRAK 18 - Timugon Murut bible

SIRAK 18

¹Kinaayo ru Tuhan Tuhan ondo' maayag ra sabuoi-buoi no nambaal ra limbowon am tana' ti.

²Io ayuk ondo' motopot.[25]

³Tinuyu' No tana' ra kalindu' Nano am ngaangai' gumagaya' Riso. Io noyo raja' ru ngaangai' am kuasa' Nano mampatuliar ra ondo' mapasau intor ra kalo mapasau.

⁴Kolondo' sangulun pana inanian No ra kuasa' koson mapatanou ra binaal ru Tuhan am kolondo' sangulun pana makatutun toojo ra baalon Nano ondo' matulai.

⁵Osoi makapanuku' ra kuasa' Nano ondo' maayo kaga'? Osoi poyo makapantunung ra ngaangai' binaal Nano ondo' makaasi' toojo.

⁶Itakau kalo makapamparuang kapoam mangiruru' raginio. Kaimuagan ru Tuhan kalo maalap kaimumuyi'.

⁷Amon mamupus takau ra tunung no, itakau sotopot no kalo poyo nakatalimpuun; liminonggo' takau sabap naubong naguyum ra ragu-ragu. Ulun Kolondo' arati'

⁸Atan kia ulun no am atan onong ilo? Atan arati' ru moonsoi am malaat ondo' binaal nilo?

⁹Umur ru ulun maatus ngambilor no maawar noyo kaga'.

¹⁰Pogondoon ra mantilayun, bilor-bilor raginio koson somposok timug giu' ra raat malangka' ondo' malandom kapoam koson saputir agis.

¹¹Ginio noyo sabap ra Tuhan mokoorot kaga' ritakau am Io makaasi' toojo.

¹²Magilong Io ritakau am makapandai ra mapara' itakau ti mapasa', ginio ra mangampun Io ritakau.

¹³Ulun makaasi' ayuk ra gino ngai' nilo, kaa' Tuhan makaasi' ra ngaangai' ulun. Io mansawai, mapatanda' am mangila' ritakau. Magibit Io ritakau muli' Riso koson ra magagalung magalung ra domba nilo.

¹⁴Makaasi' Io ritakau amon mangapu takau ra ila' Nano am masaga' mangapu ra kapatasan Nano. Kaansayan am togom

¹⁵Anak kuno, pai' pangindangan ra ulun liliwa' sumangit risilo. Amon mangindangan kou, pai' pabayaa' ra ragu-ragu ondo' mapakaruol ra guang.

¹⁶Ragu-ragu muno koson ra bolobou ondo' mampasalui paat mogorou ra malasu' am mokologo poyo ka mangani'.

¹⁷Rinagu ondo' motopot mokologo poyo ka mangani' ra tangguang ondo' moonsoi. Kaa' ulun ondo' mataau toojo mangani' ra karuo-ruo no.

¹⁸Ulun sasambungon kalo mangani', ka mampaluta'. Mangani' ondo' pabayaan ra sangit kalo mambaal ra ulun maansayan. Mangimumui ra inan

¹⁹Migila' ra kalo poyo mindagu am alungi' kaligagan muno ra kalo poyo marualan.

²⁰Imumuyi' noyo guang muno ra kalo poyo Tuhan mangakim rirun, maa' raginio masaboi paat raginio ampunon kou.

²¹Isisingkamo' noyo ra kalo poyo okou ukumin ra maruol. Paat ra okou makatula, pambala' no ra okou tumalikur intor ra tula.

²²Amon okou mabantu' ra Tuhan, suguto' toojo bantu' no ra paat ra inaru', am pai' injuli' saboi okou matoi.

²³Kaa' ra kalo poyo mambaal ra bantu', tampos noyo koson manugut raginio am pai' kinami' kaaratan ru Tuhan.

²⁴Karaa' noyo sangit ru Tuhan ra orou patayan muno am pambalos Nano paat ra Io manalikur rirun.

²⁵Paat okou langkaya' am malabaan, karaa' noyo paat ra maitilan am musikin.

²⁶Baal ti maalap kabalui ralalom songorou ayuk. Ngaangai' no ra mataki' masauk ra saang ru Tuhan.

²⁷Ulun mapintar totomolon ralalom ngai' baalon nilo. Giu' ra tatanga' ru ulun makatula ilo mononoomol maa' raginio kalo mambaal ra sala.

²⁸Moonong ulun mapintar makaulig ra kapintaran am mongompor ra ulun ondo' minintutun ra kapintaran no.

²⁹Ulun ondo' makarati' ra amsal masauk ra mapintar am mindagu masuang amsal ondo' motopot. Manguasa' ra inan galama'

³⁰Pai' makuasa' ru kasagaan-kasagaan muno, kaa' kuasaa' noyo ngai' kalaayan ru guang muno.

³¹Amon maguyum kou ra kajalaan ralalom ru ngaangai' kasagaan muno, masauk kou ra kasuatan ru pantula' muno.

³²Pai' paguyum ra katasuan ralalom ru bayag ra masuang rapu' am pai' ibangkil ra inan koson maya' mambayar ra balanja' no.

³³Amon kolondo' ruit muno, pai' pagira' koson munsag maa' raginio okou kalo masauk ra musikin.