Read Timugon Murut SIRAK 19 Bible Online

SIRAK 19 - Timugon Murut bible

SIRAK 19

¹Sangulun mangngandoi ondo' gagaukon kalo lumangkaya', am ulun ondo' kalo mampalio ra baal boborok, buoi kabuoi masauk ra musikin.

²Inumon makagauk am ruandu' mapalayau ra ulun mapintar, am ulun ondo' lumatok ra ruandu' mantalan ra inan masauk ra lumanja' kalo mononoomol.

³Pupus no paliso ondo' kalo mononoomol magibit risilo ra patayan am inan nilo mootong masauk ra akanon ru lingguang. Makalalaa' ra magagayam

⁴Sasambungon ulun ondo' mataki' mangintopot ra ulun bokon. Ulun ondo' makatula mampalubat ra inan galama'.

⁵Ulun ondo' masaga' mambaal ra kalaatan ukumin.

⁶Ulun ondo' masisang ra mampaluta' mailiwan kapaganan.

⁷Pai' potonowo' atan ondo' rinagu rirun, am okou pana kalo pansagulian guang.

⁸Pai' pantunung ra rangan kapoam pantula', ondo' ak am amon ru mongkoror okou makatula.

⁹Koson raginio baal no sabap ra ulun ondo' mokorongog ra ragu no pagilain no okou, am rondo' paat masisang rirun.

¹⁰Amon ru mokorongog kou ra tanou kalo motopot, paulio' noyo ra guang saboi ra okou matoi, pai' pagalabo, okou kalo lumaput sabap raginio.

¹¹Ulun sasambungon ondo' masaga' mapauli ra inopot maimbolo' koson ra sangulun ruandu' marualan ra maganak.

¹²Rondo' tanou ralalom guang ru ulun sasambungon koson ra anak ru pana makatansok ra kalayam nilo. Mansawai ra rangan

¹³Amon ru mokorongog kou ra rangan muno nambaal ra sala, kuati' io. Ati lair ru baal raginio kalo motopot. Kaa' amon motopot, kalo boo baalon no.

¹⁴Amon ru mokorongog kou ra pasambalayan muno mindagu ra kalo moonsoi, kuati' io. Ati lair ru baal raginio kalo motopot. Kaa' amon ru motopot, kalo boo mindagu io.

¹⁵Amon ru mokorongog kou ra ondo' malaat intor ra rangan muno, kuati' io. Ati lair ru baal raginio sinimbaal. Pai' pangintopot ra ngaangai' ondo' norongog muno.

¹⁶Maaru' lair ru sangulun nasala ragu am sala' ka baal raginio ondo' koon nano. Osoi kia ritakau kalo igondo' pakasala ra rila' nano?

¹⁷Amon ru mokorongog kou ra ondo' malaat intor ra sambalayan muno, kuati' io ra kalo poyo sangitin mu io. Polosoo' noyo baal raginio sama' ra ukum ru Tuhan Ondo' Masawat Kaga'.[26]

¹⁸Malaa' ra Tuhan ioginio talimpuun ru ulun apuon ru Tuhan am ulun mapintar tagamin ru Tuhan.

¹⁹Ulun ondo' makapandai ra susuban ru Tuhan mangapu ra pangilaan intor ra kaayagan. Ulun ondo' mambaal ra atan kasagaan ru Tuhan makasia' ra kawa' intor ra puun ru kaayagan. Kapintaran ondo' kalo motopot am ondo' motopot

²⁰Ngaangai' ru kapintaran nogondo' ra malaa' ra Tuhan am makasimpung noyo ra manugut ra ukum ru Tuhan.[27]

²¹Amon ru sangulun ulipon mindagu ra io kalo masaga' gumagaya' ra tuan nano, kaa' gumagaya' niayuk, magulayun io mampakaruol ra guang ru tuan nano ondo' napaayag riso.

²²Ulun kalo masauk ra mapintar ra mangulig ra malaat, am ulun ondo' mononoomol kalo maya' ra bilin ru ulun ondo' makatula.

²³Mokoondo' kapintaran pakayon koson mambaal ra malaat, am mokoondo' ulun sasambungon kalo kukula' mapintar.

²⁴Moonsoi poyo kalo kukula' mapandai kaa' mapasau guang, intor ra mapintar kaga' kaa' masauk manggal ra ukum.

²⁵Mokoondo' ulun mapintar am matuyu' kaa' kalo matimpok, am mokoondo' poyo mampalimpatui ra moonsoi koson mapamanang ra baal raginio.

²⁶Mokoondo' sangulun malaat mugar tumangkokoong ra bulos mangiluk, kaa' guang nano nototop ra ruung.

²⁷Pinalikar no bulos nano am mitambingai ra kalo mokorongog, kaa' kalo napandayan ra io maringkumaa' intor rirun.

²⁸Amon ru sabap ra rondo' baal io naampangan koson makatula ra paat raino ti, mambaal io ra mataki' amon ru makakaluagan.

²⁹Sangulun mauligan intor ra paliso ru inan nano, am ulun mapintar mauligan intor ra bulos nilo.

³⁰Baal ru sasangulun mapandayan intor ra paliso nano mambayang, makakurit, am mugar.