Read Timugon Murut SIRAK 2 Bible Online

SIRAK 2 - Timugon Murut bible

SIRAK 2

¹Gumagaya' ri Aki Kapuuno' Anak kuno, amon ru masaga' kou mangandoi ayuk ra Tuhan, musiti' kou tumampos toojo koson manguma' ra pangkinaman.

²Oroto' noyo am kaikango' noyo guang muno; pai' pagalabo amon makatuum ra kapaganan.

³Musiti' kou gumagaya' ra Tuhan am pai' tuliar intor Riso, maa' raginio maansukan kou ra pupus ru bayag muno.

⁴Apuo' noyo atan ayuk ondo' makalumpa' rirun, am musiti' oroton mu, kabalu' pana asabin kou,

⁵sabap ra mas kininaman ra apui am ulun ondo' tagamin ru Tuhan kininaman ralalom apui pagasaban.

⁶Pangintopot noyo ra Tuhan, am mangindangan Io rirun. Baniso' noyo ralan ru kaayagan muno am kalansan noyo Riso.

⁷Akau ondo' malaa' ra Tuhan, kulimano' noyo kiasi' Nano. Pai' noyo tuliar Riso maa' raginio kalo maratu' kau.

⁸Akau ondo' malaa' ra Tuhan, pangintopot kano Riso. Maaru' akau makaalap ra balos moonsoi.

⁹Akau ondo' malaa' ra Tuhan, kalansan kano ra kaansayan, ra kiasi', am kaansukan ondo' mantilayun.

¹⁰Karaa' noyo papag ondo' nakasigulu am ilai' noyo baal ragitio: Igondo' kia Tuhan nampakaus ra ulun ondo' malansan Riso? Igondo' kia Tuhan nanatang ra ulun ondo' magulayun mangurumat Riso? Igondo' kia Tuhan mangimpai ra ulun makiasi' Riso?

¹¹Tuhan motogom am makaasi'; mangampun Io ra tula am mamayag ritakau paat makakapaganan.

¹²Kaa' aibui boo ra ulun ondo' maimamang am malawo. Aibui boo ra ulun ondo' makatula am ondo' kalo mabanis guang.

¹³Aibui boo ra ulun ondo' mapalo ra guang sabap kalo mangintopot, sabap ilo kalo makaalap ra sindungan.

¹⁴Aibui boo ramuyun amon kalo mingkotog. Atan kia baalon min paat ra Tuhan matong mangkinam ramuyun?

¹⁵Ulun ondo' malaa' ra Tuhan kalo manggal ra susuban Nano, am ondo' motogom ra Tuhan maayag sumugut ra kasagaan ru Tuhan.

¹⁶Ulun ondo' malaa' ra Tuhan kuminam koson mapabansuk ra guang Nano, am ondo' motogom Riso subolon ru Ukum.

¹⁷Ulun ondo' malaa' ra Tuhan masalok tumampos koson mangandoi ayuk Riso. Ilo misisingkamo ra saang Nano am mindagu,

¹⁸“Akai mangkinuo ayuk ra nasip mai' ralalom kalindu' ru Tuhan, am sala' ka ralalom kalindu' ru ulun, sabap ra guang makaasi' ru Tuhan nogondo' gayo no ra katulayan Nano.”