Read Timugon Murut SIRAK 20 Bible Online

SIRAK 20 - Timugon Murut bible

SIRAK 20

¹Paat ondo' motopot koson mindagu Mokoondo' sawai ondo' paraguon paat kalo motopot. Mokoondo' poyo mapintar poyo koson mongkoror ayuk.

²Kaa' moonsoi poyo mansawai ka magulayun sumangit.

³Ulun ondo' mangiou ra kasalaan kalo malubatan.

⁴Ulun ondo' masaga' mampajajal ra ukum ra kuligaan nogondo' ra ulun kinambiri' ondo' masaga' manawa' ra sangulun ralaa.

⁵Mokoondo' ulun ondo' karaan ra mapintar sabap ra kalo masuang ragu, am mokoondo' kasisangin sabap ra ragu-ragu nano.

⁶Mokoondo' mongkoror sabap ra kalo nakapandai ra taam no, am mokoondo' mongkoror sabap ra nakapandai ra paat ondo' motopot koson mindagu.

⁷Sasangulun ondo' mapintar mongorot ra raguon nano saboi paat ondo' motopot, kaa' ulun sasambungon am maluluta' mindagu masailan polos ru jam.

⁸Ulun ondo' mindagu mabuoi kaga' am kalo mangani' ra kaluagan ra ulun bokon mindagu kasisangin. Baal-baal ondo' nansasala'

⁹Kapaganan makapagibit ra maulian, am nasip moonsoi ondo' kalo kinara'-kara' makapagibit ra kalubatan.

¹⁰Sanganuan ra bulintok taak muno totopot kalo makapagibit ra maulian kou, kaa' mokoondo' niayuk taak muno balasin ra mauli' kaga'.

¹¹Mokoondo' ulun ondo' paingganaan kinibit ru maguyum ra inggalan moonsoi kaga', kaa' mokoondo' niayuk ondo' makatirong intor ra inasaban saboi ra urumaton.

¹²Sanganuan ra bulintok rorondo' ondo' balion ra logo maningka', kaa' bayarin ra mologo kaga'.

¹³Amon ulun mapintar mindagu, makaalap ilo ra masuang rangan. Kaa' amon ulun sasambungon mindagu ra molomoi, baal raginio papalo ayuk.

¹⁴Taak ru sangulun sasambungon kolondo' onong ra tayar muno, sabap ra io malansan ra masuang balos no.

¹⁵Mangani' io koborok kaa' masuang mampaluta', am io mindagu ra mosongou maa' raginio morongog ru ngaangai' ulun. Orou raiti' mapaira' io am suabon no sikaan no sagulio'. Ulun koson raginio sotopot no kasisangin.

¹⁶Ulun sasambungon mindagu, “Aku kolondo' rangan. Kolondo' mindagu ra paringkuanangan ra binaal moonsoi kuno. Masaga' ilo mangapu ra pataakon kuno, kaa' talikur kuno ilaaton nilo inggalan kuno.”

¹⁷Ulun sasambungon koson raginio magulayun iison ru ulun. Ragu-ragu ondo' kalo matanda'

¹⁸Moonsoi poyo maratu' ra masala tumpang ka maratu' ra masala ragu. Ulun malaat maratu' nogondo' koson ra ulun maratu' ra makasunsuyar.

¹⁹Ulun ondo' kalo nakapandai ra kaulayan koson ra sunur kalo matanda' ondo' pasasandulion ru ulun sasambungon.

²⁰Abig ondo' paraguon ru ulun sasambungon kalo apuon, sabap ra paraguon paat ondo' kalo motopot.

²¹Mokoondo' ulun ondo' makailiu intor ra tula sabap musikin toojo. Makatangus io ra kalo mauliso ru bolos ru guang nano.

²²Mokoondo' ulun ondo' mairuan urumat ru inan sabap mauyu' koson mindagu ra saang ru ulun sasambungon.

²³Mokoondo' ulun mauyu' manugut ra bantu'-bantu' ondo' binaal ra rangan, am kalo musiti' no rangan raginio saukon no ra pantula'.

²⁴Abau rondo' sait ondo' malaat ra sasangulun; ulun ra malaat paliso marayus-rayus magabau.

²⁵Sangulun mantatakou moonsoi poyo intor ra sangulun magabau, kaa' karuruo no sumuku' ra kapusaan.

²⁶Kaindalaman ru magabau ioginio rorondo' mampakauyu', am uyu' nano kalo mairu'. Kinoonsoi toojo am baalon maatang ru ulun mapintar

²⁷Ulun ondo' mapintar mindagu makasingkot, am ulun mapintar kasagain ru ulun mangaayo pangkat.

²⁸Ulun ondo' mangandoi ra tana' mangumung ra kumoson ondo' mauli' kaga'. Koson niayuk ra ulun ondo' kasagain ru ulun mangaayo pangkat makaalap ra pangampunan ru kasalaan nilo.

²⁹Indangan am tangguang momolou ra mato ru ulun mapintar am mongompong risilo ra mansawai.

³⁰Kapintaran ondo' sinibuni koson ra rapu' ondo' nolobong; karuruo no kolondo' onong.

³¹Moonsoi poyo ulun ondo' manibuni ra sambung ka ulun ondo' manibuni ra kapintaran.