Read Timugon Murut SIRAK 21 Bible Online

SIRAK 21 - Timugon Murut bible

SIRAK 21

¹Tula Anak kuno, amon ru makatula kou, pai' boo pambaal ra tula, kaa' pakiasi' no maa' raginio tula muno ampunon.

²Inggaluri' noyo tula koson minggalur ra kukuo. Amon ru inggaarin mu io, maaru' tindukon no okou. Ripon nano koson ra ripon ru singa' ondo' makapatoi ra ulun.

³Moonong manggal ra ukum manatang ra pilat ondo' kalo mapali', koson ra tobok ru ilang ruo mato.

⁴Kalaatan am puka' makapuso ra rapu' kalangkayaan. Koson niayuk ra baloi ru ulun malilimbau malunsai.

⁵I Aki Kapuuno' momporongog ra pakiasian ru ulun musikin am mataki' mangani' risilo ra katimpakan.

⁶Ulun ondo' kalo masaga' sawayon, maya' ra ralan ru ulun ondo' makatula. Kaa' ulun ondo' malaa' ra Tuhan tumalikur intor ra tula ralalom ru guang.

⁷Ulun ondo' maayo kabang mauligan ra ati-ati, kaa' sangulun ondo' mapintar makaliman amon mambaal io ra sala.

⁸Sangulun ondo' magira' ra ruit koson mambaal ra baloi nano, nogondo' ra sangulun ondo' manimung ra batu koson labangan nano.[28]

⁹Santimungan ulun malaat koson ra tuntur ru tataun suruin; pupus no maluus ilo maumpo ru apui.

¹⁰Ralan ondo' bayaan ru ulun makatula malumot am marata', kaa' ralan no sumuku' ra intok ru ulun minatoi. Kapintaran am sasambungon

¹¹Sangulun ondo' gumagaya' ra Ukum makapanguasa' ra pangkaraan nano. Ulun ondo' mapintar ioginio ulun ondo' malaa' ra Tuhan ralalom ru ngaangai' baal.

¹²Ulun mapintar ayuk maalap kaila', kaa' mokoondo' niayuk kapintaran ondo' maparatong ayuk ra mapait.

¹³Kapandayan ru ulun mapintar koson ra liur ondo' lumabai. Bilin nilo rumayus tumilis koson ra taur ru timug ondo' maayag.

¹⁴Kaa' pangkaraan ru ulun sasambungon koson rarapu' naabat; atan ayuk ondo' inigigilaan nilo mataki' mairu'.

¹⁵Amon ru sangulun mapandai kaga' mokorongog ra ragu-ragu mapintar, mongompor io am mokoowot ra pangkaraan ra bokon. Kaa' ru amon ulun ondo' kalo kukula' mangkara' mokorongog raginio, kalo maansukan io am kalo mangapu raginio.

¹⁶Mangkirongog ra sunur ru ulun sasambungon, nogondo' ra mansaan ra maagat paat ra mangkiralan, kaa' mangkirongog ra ragu-ragu ru ulun mapintar masauk ra katasuan.

¹⁷Ragu-ragu ru ulun mapintar anggakon ru pasimpungan ulun am posoroton ra ralalom ru guang.

¹⁸Tayar ru ulun sasambungon, kapintaran kolondo' onong koson ra baloi ondo' nalunsai noyo. Kapandayan ru ulun sasambungon masauk ra ragu-ragu ondo' kalo naratian nilo galama'.

¹⁹Pangilaan koson ra babangkil ra tayar ru ulun sasambungon,

²⁰kaa' koson ra golong mas ra tayar ru ulun mapintar. Ulun sasambungon masuatan, kaa' ulun mapandai mongkoror ra jumingit.

²²Ulun sasambungon mansigo intor kulobon ru baloi ulun ra bokon am tutului sumubol, kaa' ulun nakaigigila' bonsoi-bonsoi maginaa ra tuma' ru kulobon.

²⁴Ulun kolondo' guang mangintalingo giu' ra kulobon, kaa' ulun ondo' nakaigigila' mauyu' mambaal koson raginio.

²⁵Sangulun mampaluta' mangulit ra ragu ru ulun ra bokon,[29] kaa' ulun makaguang mononoomol ra paraguon nano.

²⁶Ulun sasambungon mindagu ra atan ayuk ondo' makara' nilo, kaa' ulun mapintar mangkara' galing ra kalo poyo mindagu.

²⁷Amon ru ulun malaat magulas ra riwato,[30] magulas ilo ra inan galama'.

²⁸Sangulun ondo' masaga' manimbaal ra ragu lumaat ra inan galama', am kasisangin io ru ulun ra libung nano.