Read Timugon Murut SIRAK 22 Bible Online

SIRAK 22 - Timugon Murut bible

SIRAK 22

¹Katiaran am sasambungon Sangulun matiar nogondo' ra majamol; io makatataman am kolondo' masaga' minggaar riso.

³Paat ra mokoondo' anak kalo nakaigila', baal raginio mapakauyu' ra sangulun ama', am sangulun anak ruandu' inanak rondo' kalubatan.

⁴Sangulun ralaa ondo' makaguang makaalap ra ralaki, kaa' sangulun ralaa ondo' kalo mapandai mauyu' mantipagon ra ama' nano.

⁵Sangulun ruandu' ondo' kolondo' guang mapakauyu' ra ama' nano am ralaki nano, am kalo urumaton ru ilo ruo no.

⁶Sumangit paat ra ondo' kalo motopot nogondo' ra mangkuli ra miujik ra tayar ru ulun tatanga' mangulir. Mampalapos ra mangila' masalok rondo' baalon ra motopot.[31]

⁷Sangulun anak ondo' matanda' pangila' kalo mambala' ra papag ru matuo no ra musikin.

⁸Kaa' sangulun anak ondo' kalo matanda' pangila', ondo' malilimbau am masawat guang, mapakalaat ra inggalan moonsoi ru pabukat nano galama'.

⁹Mangila' ra ulun sasambungon nogondo' ra moposokot saguli' ra pagangan nopoto kapoam mangkarat ra ulun intor ra nokororot toojo.

¹⁰Mambala' ra rondo' ra ulun sasambungon nogondo' ra mindagu ra sangulun ondo' matikoolong. Pupus no mangkuot io, “Mokoondo' ra atan?”

¹¹Tangii' noyo ulun matoi sabap ra ilo kalo boo makakito ra matawang; tangii' noyo ulun sasambungon sabap ra ilo kolondo' guang. Kalo pana mangiluk toojo sabap ra ulun matoi sabap ra ilo nakaalap noyo ra kalinuos. Kaa' bayag ru ulun sasambungon malaat poyo ka matoi.

¹²Ulun mangulir saboi tulu' ngoorou tayar ru ulun matoi. Kaa' ulun mangulir buoi ru bayag tayar ru ulun sasambungon am ulun malaat.

¹³Pai' tambuluyo' ulun sasambungon am pai' indagu kabuoi risilo. Ilalain ilo am pai' saboi ra okou tinipagon am imboloon nilo. Inggaluri' noyo ilo, am okou pana makaalap ra kalinuos am kalo mauliso ru sambung nilo.

¹⁴Ulun koson raginio masauk ra saanin ondo' maagat poyo ka tima maitom. Panginggalanan ondo' motopot tayar nano ioginio “i sambungan”.

¹⁵Matasu' poyo mansaan ra agis, usi', am basi' ka lumatok ra ulun sasambungon.

¹⁶Tataun ondo' pinaatang am mapiot ralalom ru baloi, kalo maalap kauyog ra gumonggon ra tana'. Koson niayuk ra ulun ondo' lumansan ra pangkaraan ondo' masukor kalo maimamang ralalom ru baal ondo' mapagon pana kaga'.

¹⁷Pangkaraan ondo' mimpuun ra guang matanda' koson ra bunga' pinosokot ra rinding ondo' marata'.

¹⁸Batu-batu ondo' mongoborok pinabanta' ra rasawat ru timbok[32] kalo tumaan amon ru siobon ru angin. Koson niayuk ra ulun ondo' malaa' sabap ra pangkaraan ondo' sasambungon kalo tumaan ralalom baal ondo' makalalaa'. Pangkubayawan

¹⁹Amon ru tinsukon mato mingkual lomou ru mato, am amon ru susunanin guang masingkual pamalimanan nano.

²⁰Ulun ondo' nomobol ra batu koson manganjau ra susuit; ulun ondo' magasab ra rangan mangukat ra pangkubayawan.

²¹Amon ru mansangor kou kapoam magabu' ra rangan muno, pai' kalawo guang. Lakat poyo mokopobonsoi kou riso. Kaa' moonong rangan magiru' amon ru magasab kou riso, minsawat guang, mambala' ra inopot nano kapoam manumbalik riso.

²³Sauk no ra ulun intopoton ru rangan muno paat ra io musikin, am okou pana maansukan mabaya' riso paat io langkaya'. Lampit no riso ralalom kapaganan, am okou pana matayaran ra tungkuson nano.

²⁴Koson ra lisun-lisun makasigulu ra apui, koson niayuk ra pagasaban makasigulu ra pampatayan.

²⁵Kalo mauyu' aku manindung ra rangan am kalo mansibuni amon gumogot io makiindangan raki'.

²⁶Kaa' amon ru malumaagan aku sabap no io, moonong ulun ondo' mokorongog no koson mononoomol riso. Pakiasian makiampin ra tula

²⁷Gama' ru kabang kutu alungin am bibil kutu saapin ra meterai ru kapintaran. Aku pana makailiu intor ra mambaal ra kasalaan am kalo koson mausung sabap ra masabit ru rila' kutu.