Read Timugon Murut SIRAK 23 Bible Online

SIRAK 23 - Timugon Murut bible

SIRAK 23

¹Iou Tuhan, Ama' am Manguasa' ra bayag kutu, pai' polosoo' aku kuasaan am maulas ru ragu-ragu kutu.

²Gama' ru pangkaraan kutu sinalingapu ru pitol lalapos ru kapintaran koson mapakatanda' ra guang kutu. Kalo masaga' aku polosoon amon ru aku makasala, am kalo masaga' aku ra rondo' tula pana makatangkus intor ra pantainuin Nano.

³Kasalaan am tula kutu pana kalo rumuang-ruang. Kalo maratu' aku ra kalindu' ru pantula' am kuritin nilo.

⁴Iou Tuhan, Ama' am i Aki Kapuuno' ru bayag kuno, alungi' aku no maa' raginio kalo masauk ra minsawat guang.

⁵Sindungi' noyo aku intor gogoton ra malaat.

⁶Pai' polosoo' aku kuasaan ru mangangkum am laai ru guang. Pai' pataako' aku ra laai-laai ru guang ondo' mampakauyu'. Magibot

⁷Anak-anak kuno, rongogo' noyo pangilaan kutu intor ra ragu-ragu ondo' motopot. Ulun ondo' maya' ra pangilaan kutu kalo malandak.

⁸Ulun ondo' makatula, ulun minsawat guang, am manimbaal ra ragu masulungan ru ragu-ragu nilo galama'.

⁹Pai' indalom koson mampator am manabit ra inggalan ri Aki Kapuuno' ondo' matulai.

¹⁰Sangulun ulipon ondo' magail loposon kalo makapagiru' ra balis-balis. Koson niayuk ra ulun ondo' marayus-rayus magibot ralalom inggalan ru Tuhan kalo mabaguan intor ra tula.

¹¹Sangulun ondo' magail mampator masuang tula nano, am ilo sambaloi kalo makalabus intor ra kaimbalaan. Amon makasala io, io magiba' ra tula nano. Amon io kalo mampalio ra kasalaan nano, tula nano maruangan. Amon io magibot ra magabau, io kalo ampunon am pabukat nano malumpa' ru karaat. Ragu-ragu ondo' kalo moonsoi

¹²Mokoondo' rondo' ralan mindagu ondo' mokopogondo' ra kapatayan. Gama' ru gino ngai' ru ulun ru Israil kolondo' mindagu koson raginio. Ulun moonsoi guang minggalur ra paliso koson raginio am kalo gumuong ralalom ru tula.

¹³Pai' indalom mindagu ra malasang am majamol, sabap baal raginio makatula.

¹⁴Karaa' noyo ama' am ina' muno paat ra okou mantitimung mabaya' ra ulun mangaatang. Pai' masaboi lilianin mu inan galama' am tauyuon ra saang nilo sabap ra kaindalaman muno ondo' kalo moonsoi. Maagu no magulas kou ra orou naganakan muno am gumogot maa' raginio okou kalo igondo' inanak.

¹⁵Sangulun ondo' naindalom noyo mindagu ra kalo moonsoi kalo tumanda' sabuoi ru bayag nano. Tula ru mampajaka'

¹⁶Mokoondo' masuang ralan koson mamparuang ra tula, kaa' rondo' ti namparatong ra kasangitan ru Tuhan. Kalaayan ru guang koson ru apui ondo' bibilak am kalo malasa' saboi makai'. Sangulun ondo' nambaal ra jaka' mabaya' ra laai ru guang galama' ondo' maikang kalo lumonggo' saboi apui i monolob riso.

¹⁷Tayar ra sangulun mangangambi', moonong ralaa mampatabual ra kalaayan ru guang am buoi ru kaayagan nano, kalo maalap io ra jala'.

¹⁸Sangulun ralaki ondo' mansawa' mangkara', “Osoi nua' magilong raki'? Giti molondom; sinilian aku ru timbok am kolondo' makakito. Kalo pana malaa'. Io Ondo' Masawat Kaga' pana kalo mampalio ra tula kutu.”

¹⁹Ulun no malaa' ayuk makito ru ulun. Kalo nalimanan no ra mato ru Tuhan inggopor ngaribu mapaang poyo intor ra mato ru orou. Tuhan magilong ra ngaangai' binaal ru ulun am mato Nano makaantos suku' ra linsuk ondo' nakasibuni toojo.

²⁰Nakapandai Io ra ngaangai' no, ra kalo poyo am nopongo binaal Nano.

²¹Ulun ondo' makatula no rinakop ra bulintok ondo' kalo nakuliman am inukum ra saang ru ulun masuang.

²²Koson raginio niayuk ra sangulun ruandu' ondo' kalo gumagaya' ra ralaki nano am nangani' riso ra anak intor ra ungkuyon bokon.

²³Kasaa', ruandu' no minanggal ra ukum ri Aki Kapuuno' Ondo' Masawat Kaga'. Karuo, makasala io ra ralaki nano. Katalu, nansawa' io koson ra ruandu' mantalan ra inan am naganak ra anak intor ra ungkuyon ondo' sala' ka ralaki nano.

²⁴Io galama' ibiton ra saang ru ulun masuang am imumuyin anak-anak nano ru motopot sala' ka anak sawa'.

²⁵Kolondo' intok nilo ralalom ru mamagun am kalo makapaguot.

²⁶Ruandu' no matatakan ra urumat nano koson ra sabuoi-buoi no. Mopongo ra io matoi, inggalan nano ulason.

²⁷Ngaangai' ulun pana makaliman boo ra kolondo' ondo' moonsoi poyo intor ra kaayagan motopot, am kolondo' ondo' maamis poyo intor ra gumagaya' ra susuban ru Tuhan.