Read Timugon Murut SIRAK 24 Bible Online

SIRAK 24 - Timugon Murut bible

SIRAK 24

¹Ompor tayar ru Kapintaran Kapintaran mongompor ra inan galama' am mamanggo ra tatanga' ru ulun ru Israil ulun nano,

²ra saang ru ulun ri Aki Kapuuno' Ondo' Masawat Kaga' am ra saang ru kuasa' Nano:

³“Aku ragu ondo' intor ri Ondo' Masawat Kaga', koson ra gaun mapulak siliin ku ra tana' ti.

⁴Minayan aku ra intok ondo' masawat, intok turungan kuno mokoondo' giu' ra tampak ru gaun.

⁵Misangulun aku liminiput ra limbowon am monggolob ra raat ra ragana' ru tana'.

⁶Manguasa' Aku titikop ra tana' am kinulun ru raat, am niayuk ngaangai' bansa'.

⁷Maguyum aku ra intok ayanan ra gino ngai' ru ilo: rondo' wilayah koson lumayun mayan.

⁸Io pana ondo' Nambaal ra tana' ti ondo' nambaal raki' mangaru' ra intok ayanan kuno. ‘Ayan no ra Israil,’ susuban Nano, ‘papag ri Jakub masauk ra longgom muno.’

⁹Binaal No aku intor noyo ra talimpuun am sumoroi koson ra sabuoi-buoi no.

¹⁰Mangandoi aku Riso giu' ra ralalom Kim ru Tuhan am lumayun ayan giu' ra Bulur Sion.

¹¹Nomposoroi Io raki' giu' ra bandar katagaman Nano; inanian aku ra kuasa' ra bandar Jirusalim.

¹²Aku pana manambakat boo ra tatanga' ru bansa' ondo' noompor ondo' pinili' ru Tuhan sumauk ra longgom Nano galama'.

¹³Tinumuu' aku koson puun ru sidar giu' ra Libanon, koson puun ru sipris giu' ra Gunung Girmon.

¹⁴Mungkalar aku koson ra puun kurma giu' ra In-Gidi,[33] koson ra bunga' ros giu' ra Jiriko, koson ra puun jaitun ondo' moonsoi giu' ra tana' malimparang koson ra puun berangan ondo' giminayo ra kiing ru timug.

¹⁵Maamis owou kuno koson ra kaningau, koson ra umau maamis owou am kaminyan pinili'; iul-iul koson ra owou mangaamis am lisun ru kaminyan ra giu' Kim ru Tuhan.

¹⁶Koson puun ru oak pinabingkal ku raan-raan kuno; raan-raan kuno moonsoi ilain.

¹⁷Koson puun ru anggur nampatuu' aku ra talantar-talantar moonsoi, busak kuno sumauk ra kawa' ondo' masuang am maamis.[34]

¹⁹Ratong no, osoi ayuk ondo' gumogot raki', akano' noyo kawa'-kawa' kuno saboi maasug.

²⁰Pangkaraan kuno maamis poyo intor ra ruu' ru maningot, mompolonggom raki' maamis poyo intor ra tambaloi ru maningot.

²¹Ondo' nangakan raki' lakat poyo maitilan am ondo' nanginum raki' lakat poyo pinaason.

²²Ulun ondo' gumagaya' raki' kalo malumpus guang am ondo' mangandoi mabaya' ra ila' kuno kalo makatula.” Kapintaran am Ukum

²³Kapintaran mokoondo' ralalom ru Nabantuan ri Aki Kapuuno' Ondo' Masawat Kaga', iono ukum ondo' tinaakan ri Musa ritakau koson ra tungkus ru ulun ru Israil.[35]

²⁴Musiti' masalok maikang ralalom ru Tuhan. Ayan no Riso maa' raginio ikangon kau. Kolondo' i Aki Kapuuno' ondo' ak am Tuhan Ondo' Maayo Kaga' Kuasa' am kolondo' mamamayag ondo' ak am Io.

²⁵Ukum no nototop ra kapintaran lumuab-luab koson ra Sungoi Pison kapoam Sungoi Tigris bulintok mangkawa'.

²⁶Ukum no nampaluab ra arati' koson ra Sungoi Iprat kapoam Sungoi Jordan bulintok mangkumos.

²⁷Ukum no nampatilis ra pangilaan koson ra Sungoi Nil[36] kapoam Sungoi Gigon bulintok mangupu' ra kawa' ru anggur.

²⁸Ulun ra kasaa' kalo makaulig ra kapintaran ra matanda', am ulun ra pamupusan pana kalo makai' kapandayi',

²⁹sabap ra pangkaraan nano makasuang poyo intor ra raat am bilin nano malandom poyo intor ra raat malangka' ra ragana' ru tana' ti.

³⁰Aku ti koson ra parit ondo' nampatilis ra timug intor ra sungoi suku' ra taman.

³¹Kuayan kutu timugin umo kuno am bokok pantanaman kuno. Kaa' pulali' ru parit kuno nasauk ra sungoi, am sungoi nasauk ra raat.

³²Gumogot aku mampasinda ra pangilaan kuno maa' raginio makito saboi maalur koson ra orou tumawang.

³³Gumogot aku mampasalula' ra pangilaan kuno koson ra ragu manala' am patungkuson ku ra ngaangai' anak ondo' matong.

³⁴Kapandai no ra aku kalo mampabagui ra inan kuno galama', kaa' ra ngaangai' ulun ondo' sumauk ra mapintar.