Read Timugon Murut SIRAK 25 Bible Online

SIRAK 25 - Timugon Murut bible

SIRAK 25

¹Ulun ondo' sotopot no omporon Mokoondo' talu baal ondo' kasagain ku toojo ondo' mampabansuk ra guang ri Aki Kapuuno' kapoam ulun,[37] iono: pabukat-pabukat ondo' maayag ra kaansayan, sambalayan ondo' mangkubayau am suput ru mansawo ondo' maayag ra maansukan.

²Mokoondo' talu salinut ru ulun ondo' kasisangin kuno am paliso nilo ra majamol toojo, iono: ulun musikin ondo' minsawat guang, ulun langkaya' ondo' masaga' magabau, am ungkuyon matutuo ondo' sasambungon am masaga' mansawa'.

³Atan ondo' kalo inigilaan paat ra mamulok maaru' lair kolondo' moowot paat ra matutuo.

⁴Mampaguang ondo' motopot am pinson ondo' moonsoi maaya' ra sangulun matutuo ondo' makauan.

⁵Kapintaran, pangaratian, am pinson maaya' ra ulun urumaton toojo ondo' matutuo.

⁶Karaun ru ulun matutuo iono masuang kaga' nailian, am malaa' ra Tuhan noyo ra ilo mamanggo.

⁷Siam ngaulun ondo' karaan kuno ra maayag maansukan, am ondo' koopor no omporon ku ra maansukan, iono: sangulun ondo' maansukan sabap ra anak-anak nano, sangulun ondo' ralalom ru kaayagan nano makarampot magilong ra naratuan ru pantula' nano,

⁸sangulun ondo' mokoondo' ra andu' ondo' mapintar, sangulun ondo' kolondo' tula ra kabang nano, sangulun ondo' kalo mangandoi ra tuan nano ondo' kalo sotopot no urumaton,

⁹sangulun ondo' makaalap ra pangaratian, sangulun ondo' rinongog toojo paat ra io mindagu.

¹⁰Mapara' gayo ru ulun ondo' makaalap ra kapintaran! Kaa' ondo' maayo kaga' intor ra ngaangai' no iono ulun ondo' malaa' ra Tuhan.

¹¹Ulun koson raginio kolondo' makatilu, sabap malaa' ra Tuhan iono baal ondo' masawat kaga' ra tana' ti.[38] Ruandu' malaat

¹³Kolondo' napilatan ondo' malanjag poyo intor ra pilat ru guang. Kolondo' kalaatan ondo' maagat poyo intor ra kalaatan ru sangulun ruandu'.

¹⁴Kolondo' kaimbalaan ondo' maagat poyo intor ra ondo' kinibit ru ulun masisang. Kolondo' kalikatan ondo' makalalaa' poyo intor ra kalikatan ru pantula'.

¹⁵Kolondo' tuwo[39] ondo' makalalaa' intor ra tuwo ru kukuo, am kolondo' kasangitan ondo' makalalaa' intor ra kasangitan ru pantula'.

¹⁶Moonsoi poyo mayan rondo' baloi ra singa' am tambuakal intor ra mayan ra sangulun andu' ondo' malaat.

¹⁷Kalaatan ru sangulun ruandu' makabalui ra baal ru bulos nano am mampakarus ra bulos nano saboi nogondo' ra bulos ru baawang.

¹⁸Ralaki nano mugar ak kalalaat am mangakan giu' ra sambalayan, am maaru' io mampalaa ra mapait.

¹⁹Moonong kalaatan makito ra boborok paat ra pinogondo' ra kalaatan ru sangulun ruandu'. Gama' ru ukumin io koson ra ulun ondo' makatula.

²⁰Ungkuyon moomor ondo' mokoondo' ra andu' mabaji' koson ra sangulun matutuo ondo' musiti' magaloi ra gunung kaagisan.

²¹Pai' gogoto' ruandu' am pai' kaambi' ra kinantalur nilo.

²²Amon sangulun andu' mampakan ra ralaki nano, maaru' sumangit io, magasab, am manauyu' ra ralaki nano.

²³Sangulun andu' ondo' malaat nambaal ra ralaki nano malaut bulos, maruol guang, am makarus bulos. Sangulun andu' ondo' kalo mampakaansuk ra ralaki nano mampasauk riso ra ulun ondo' malawo am kalo makalulu'.

²⁴Tula tumalimpuun intor ra sangulun ruandu', am sabap riso itakau ngaangai' musiti' matoi.

²⁵Pai' polosoo' sangulun andu' ondo' malaat mindagu ra babanyou, koson ra timug ralalom ru tangki' niayuk kalo polosoon lumawas.

²⁶Amon kalo gumagaya' io ra ragu muno, alio' noyo io.