Read Timugon Murut SIRAK 26 Bible Online

SIRAK 26 - Timugon Murut bible

SIRAK 26

¹Kaansukan ru ulun ondo' makaandu' ra moonsoi Pakaansuk no sangulun ralaki ondo' makaandu' ra moonsoi. Umur nano rumuang induo poyo.

²Sangulun andu' ondo' moonsoi guang mampaansuk ra guang ru ralaki nano saboi io maayag mamimio suku' ra pupus ru kaayagan nano.

³Andu' ondo' moonsoi iono taak ondo' pinataak ra ulun ondo' malaa' ra Tuhan.

⁴Ru langkaya' kapoam musikin, guang nilo masalok matasu' am bulos nilo maansukan. Andu' ondo' malaat

⁵Mokoondo' talu baal ondo' makalalaa' ra guang kutu, iono: ragu sinimbaal ondo' pinatanou giu' ra bandar, ulun nasuangan ondo' timinimung, am panguwan kalo motopot. Ngaangai' no malaat poyo intor ra kapatayan. Baal ra kaapat mambaal raki' malaa', iono

⁶kalumpusan am maruol guang ondo' pinaratong ru sangulun ralaa ondo' mangusolon ra ralaa ru bokon, am ondo' manginguli' ra moonong ulun.

⁷Sangulun andu' ondo' malaat koson ra kuk ru sapi' ondo' maunga'; mampaguut riso nogondo' ra mampaguut ra lingait.

⁸Sangulun ruandu' ondo' nagauk mampasangit toojo ra ulun sabap ra io kalo mapandai mampasibuni ra paliso nano ondo' makauyuyu'.

⁹Sangulun andu' ondo' kalo gumagaya' mauligan intor ra tontong nano ondo' mangambi' am lumaya'.

¹⁰Pagigilai' noyo toojo sangulun anak ruandu' ondo' mokotog ulu. Amon kalo, sasala' pakuan nano ra moonong kaluagan ondo' noowot nano.

¹¹Tainui' noyo tontong nano ondo' kalo mapandai mauyu', am pai' pangimuag amon makatula io rirun.

¹²Giu' ra ati ayuk, manturung io kumanjal ra saang ru moonong ungkuyon ondo' malaai riso, koson ra ulun tumanggau ondo' pinaason manginum ra atan ayuk ondo' naalap nano. Pangamparan ra andu' ondo' moonsoi

¹³Kinantalur ru sangulun andu' mampabansuk ra ralaki nano, am kapandayan nano mampaligag riso.

¹⁴Andu' ondo' moomor iono taak intor ra Tuhan; kolondo' mologo poyo intor ra andu' ondo' naila'.

¹⁵Andu' ondo' moonsoi am mapasau mologo toojo, am kolondo' nakatilu riso.

¹⁶Kinantalur ru andu' ondo' moonsoi ralalom ru baloi ondo' nalulur koson ra mato ru orou ondo' suminda giu' ra limbowon ru Tuhan.

¹⁷Bulos ondo' mantalur am inan ondo' moonsoi koson ra lampung ondo' mapaang ra tampakan ra lampung giu' ra baloi ru Tuhan.

¹⁸Kalayam ondo' moonsoi am lalakuon ru kalayam ondo' maikang[40] koson ra lugu' ru mas ondo' inapinan ra pirok.[41]

¹⁹Anak kuno, alungi' kaligagan muno ra okou lakat poyo mamulok am pai' taaki' kaikangan muno ra ulun bokon.

²⁰Giu' ra titikop ru pagun paguyum no sampila' umo ondo' malabung am tanami' ra sampug muno galama', am lumansan ra papag moonsoi muno galama'.

²¹Anak-anak muno pana am magulayun maayag am masukor sabap ra mangintopot ra sasambaloi nano ondo' moonsoi.

²²Sangulun ruandu' mantalan ra inan kinara' koson ra tiwog, ali ka sangulun andu' no motopot koson ra kubu ondo' magibit ra kapatayan ra ulun ondo' masaga' marulug riso.

²³Ulun ondo' kalo mampalio ra ukum ru Tuhan makaalap ra andu' ondo' malaat, ali ka ulun ondo' malaa' ra Tuhan makaalap ra andu' ondo' moonsoi guang.

²⁴Sangulun ruandu' ondo' kalo mapandai mauyu', paliso nano masalok makauyuyu'. Kaa' sangulun ruandu' ondo' moonsoi paliso magulayun niayuk moonsoi ra ralaki nano.

²⁵Ruandu' ondo' mokotog ulu kinara' koson ra uku', ali ka ruandu' ondo' moonsoi paliso malaa' ra Tuhan.

²⁶Andu' ondo' mangurumat ra ralaki kinara' mapintar ru ngaangai' ulun, ali ka andu' ondo' malilimbau am kalo mangurumat ra ralaki mauligan koson ra ruandu' malaat. Pakaansuk no ralaki ondo' makaandu' ra moonsoi, sabap ra umur nilo rumuang induo poyo ruli'.

²⁷Ruandu' ondo' makakabang maayo am masaga' mindagu ra kolondo' ampos, koson ra bujung ondo' samputin bulintok mangayou. Ulun ondo' makaandu' koson raginio musiti' maayag ralalom baal ru pangayawan buoi ru kaayagan nano. Panguriaan ondo' mampangiluk ra guang

²⁸Ruo baal mampangiluk ra guang kuno am ondo' katalu mampasangit raki', iono: sangulun saujor ondo' nasauk ra musikin, sangulun maikang ondo' kalo inurumat, am sangulun moonsoi ondo' nasauk ra malaat. Ulun koson raginio ukumin ru Tuhan mabaya' ra kapatayan.

²⁹Mapagon kaga' ra sangulun ulun mantalan koson kalo mambaal ra kasalaan. Kolondo' ulun mantalan ondo' nakalabus intor ra tula.