Read Timugon Murut SIRAK 27 Bible Online

SIRAK 27 - Timugon Murut bible

SIRAK 27

¹Masuang ulun nambaal ra tula sabap ra ruit, am ulun ondo' gumogot sumauk ra langkaya' makito koson ra nobolou.

²Koson ra paku' tataun pinatansok ra lolot ru ruo batu ondo' pinarikit, koson niayuk ra guang kalo mabanis manambusut ra lolot ru mantalan am mambali.

³Sangulun ondo' kalo totopot malaa' ra Tuhan, sasambaloi nano maluoi matutuk. Suang ru guang ru ulun napandayan intor ra ragu

⁴Amon ayakan uyogon, ginsamol nano ayuk soroi. Koson niayuk ondo' majamol minayan ra mabuoi kaga' ralalom pangkaraan ru ulun.

⁵Koson ra rarapu' kininaman ralalom ru apui, koson niayuk ra paliso ru ulun kininam ralalom ru ragu-ragu nano.

⁶Intor ra kawa' nano napandayan pinagalung ra puun nano. Koson niayuk ra ragu ru sasangulun napandayan ginuang nano.

⁷Pai' omporo' sasangulun no ra kalo poyo nakaining ra ralan ru pangkaraan nano, sabap ginio noyo batu pangkinaman nano. Kabanisan ru guang

⁸Amon mangilou kou ra katimpakan, maaru' makaampos kou. Katimpakan koson ra bayang ru pamarinta ondo' nampakaindon poyo rirun.

⁹Susuit tumuop ra susuit nogondo' salinut. Koson niayuk ra ulun ondo' makapaliso ra guang mabanis mambaal ra matanda'.

¹⁰Koson ra singa' mongoror ra saamon nano, tula mongoror ra ulun ondo' mambaal ra kalaatan. Ragu-ragu ondo' sasambungon

¹¹Paat ra ulun moonsoi guang mindagu, ragu-ragu nilo masalok mapintar, ali ka ragu ru ulun sasambungon maimbabalui koson ra bulan.

¹²Amon okou nakaaya' ru ulun sasambungon, paguyum no ra kaluagan koson magiru', kaa' amon okou nakaaya' ra ulun mapintar, ayan no ra kula' pana buoi.

¹³Ragu-ragu ru ulun sasambungon mamparuol ra guang; makakurit ilo ra tatanga' ru kaansukan ru tula.

¹⁴Ibot nilo mampasimu' ra impus ru ulun. Amon ru tumalimpuun ilo mansangor, moonsoi poyo sonsongon talingo.

¹⁵Ragu magasab nilo mampakaus ra guang ru ulun, am pansangaran nilo ondo' lumimbau mangkinibit ra mampapatoi. Mambala' ra ondo' inopot

¹⁶Ulun ondo' masaga' mambala' ra ondo' inopot mangiru' ra intopot ru ulun am kolondo' rangan moonsoi.

¹⁷Tagami' noyo rangan muno am gagaya' no riso. Kaa' amon pinabala' mu noyo ondo' inopot nano, inggaluri' io,

¹⁸sabap ra okou nampalunsai ra pangkubayawan no koson ra ulun namuso ra pantula' nilo.

¹⁹Koson ra sanginan susuit ondo' pinalabus muno kalo boo sumaguli' ra kalindu' muno, koson niayuk ra rirun natatakan ra sangulun rangan, am kalo boo sumaguli' io rirun.

²⁰Pai' pangilou riso, sabap ra maalur io noyo. Nasimbul io koson ra tambang ondo' nagiru' intor ra balatik nano.

²¹Pilat mabangkos am pagasaban maapon. Kaa' kolondo' kalansanan ra tayar ru ulun ondo' nampabala' ra inopot. Paliso ra maabau-abau

²²Sangulun ondo' manguliorom ra mato no rirun maaru' mangatang ra kalaatan, am kolondo' sangulun pana makainga' riso.

²³Paat ra io mabaya' rirun, ragu-ragu nano maamis. Ngaangai' ragu muno omporon no. Kaa' ra talikuron muno ragu-ragu nano sala'; namakai io ra ragu muno koson mamparatu' rirun.

²⁴Kolondo' ondo' kasisangin ku poyo ra tana' ti intor ulun koson raginio am Tuhan niayuk masisang riso.

²⁵Sangulun ondo' namuong ra batu giu' rasawat, nomobol ra rasawat ru ulu nano galama'. Sangulun ondo' namilat, io galama' mapilatan.

²⁶Sangulun ondo' nangkali ra luang maratu' ralalom nano, am sangulun nampaatang ra balatik makasulung galama'.

²⁷Sangulun ondo' nambaal ra kalaatan malumpa' ru kalaatan nano galama', am kalo nakapandai io ati intor no.

²⁸Ulun ra minsawat guang masaga' magasab am mangiis, kaa' ukuman magawang risilo koson ra sanginan singa'.

²⁹Ulun ondo' masaga' magilong ra kaimbalaan ru ulun motopot makasulung ra balatik, am maimbolo' ra kalo poyo io matoi. Mansuli'

³⁰Kasangitan am suli' iono paliso malaat ondo' manguasa' ra ulun makatula.